ចង់ទទួលបានការស្រឡាញ់ចូលចិត្តពីមិត្តរួមការងារ វិធី៦យ៉ាងនេះអាចជួយបាន

2018-03-17 08:11:00
ចំនួនមតិ 0 | ចំនួនចែករំលែក 0

ជាការពិតណាស់ សម្រាប់ជីវិតអ្នកធ្វើការ ត្រូវចំណាយពេលជាមួយមិត្តរួមការងារច្រើនជាងអ្នកណាៗទាំងអស់។ ហេតុនេះ ប្រសិនបើអ្នកមិនមានភាពចុះសម្រុងជាមួយពួកគេទេ វាពិតជាធ្វើឲ្យជីវិតរបស់អ្នកមានភាពអាប់អួខ្លាំង។ ដើម្បីដោះស្រាយជាមួយបញ្ហានេះ អនុវត្តវិធីសាស្ត្រទាំង៦ខាងក្រោម នោះអ្នកប្រាកដជាទទួលបានការស្រឡាញ់ ចូលចិត្តពីពួកគេវិញជាមិនខាន៖

១-គោរពពាក្យសម្ដីខ្លួនឯង

រាល់ពេលអ្នកនិយាយថាធ្វើអ្វីមួយ អ្នកត្រូវតែធ្វើវាឲ្យបានតាមអ្វីដែលអ្នកសន្យា។ កាលណាធ្វើមិនសម្រេច ឬយឺតយ៉ាវ វាក៏ធ្វើឲ្យប៉ះពាល់ដល់ការងារអ្នកដែលពាក់ព័ន្ធផងដែរ។ ភាពហ្មត់ចត់បែបនេះ នឹងជួយឲ្យអ្នកទទួលបានភាពជឿជាក់ ស្រឡាញ់ ទុកចិត្តពីថ្នាក់លើ មិត្តរួមការងារ អតិថិជន ក៏ដូចជាអ្នកផ្គត់ផ្គង់គ្រប់គ្នាតែម្ដង។

២-ចាប់អារម្មណ៍ចំពោះជីវិតពួកគេ

មិនមែនឲ្យចាប់អារម្មណ៍ ឈឺឆ្អាលខ្លាំង រហូតប្រឹងជជីកសួរ ដេញដោលរហូតគេធុញនោះទេ។ អ្នកគ្រាន់តែបង្ហាញឲ្យពួកគេដឹងថា អ្នកយកចិត្តទុកដាក់ចំពោះសម្ដីដែលពួកគេបាននិយាយគ្រប់យ៉ាង។ ទម្លាប់ចង់ដឹងឮរឿងរ៉ាវអ្នកជុំវិញបន្តិចបន្តួចបែបនេះ នឹងធ្វើឲ្យអ្នកក្លាយជាមនុស្សមានប្រជាប្រិយភាពខ្លាំងមិនខាន។

៣-លើកទឹកចិត្ត ផ្ដល់ភាពងាយស្រួលឲ្យពួកគេ

គ្មានមនុស្សណាដែលតែងមានភាពជឿជាក់គ្រប់ពេលវេលានោះទេ ដូច្នេះប្រសិនអ្នកសង្កេតឃើញថាពួកគេកំពុងភ័យ ព្រួយបារម្ភ រារែក ចំពោះកិច្ចការអ្វីមួយ អ្នកត្រូវចេះជួយលើកទឹកចិត្ត លួងលោម និងជំរុញពួកគេឲ្យមានភាពក្លាហានឡើងវិញ។

៤-ជាមនុស្សពូកែស្ដាប់

រាល់កិច្ចសន្ទនា តែងតែមានការដូរវេនគ្នានិយាយម្ដងម្នាក់។ យ៉ាងណាមិញ ប្រសិនអ្នកអាចដើរតួជាអ្នកស្ដាប់ឲ្យបានច្រើន ដោយមិនសូវលូកមាត់ បញ្ចេញគំនិតខ្លួនឯងពេក វាពិតជារឿងប្រសើរខ្លាំងណាស់។ នៅពេលមនុស្សម្នាក់កំពុងតែពិបាកចិត្ត ធុញថប់ គេគ្រាន់តែត្រូវការមនុស្សម្នាក់ដែលស្ដាប់ទុក្ខសោកគេប៉ុណ្ណោះ មិនមែនអ្នកដែលដណ្ដើមនិយាយគ្រប់ពេលដែរនោះទេ។

៥-ដឹងគុណ

ប្រសិនអ្នកទទួលបានការជួយជ្រោមជ្រែងពីអ្នកណាម្នាក់ សូមកុំភ្លេចថ្លែងអំណរគុណពួកគេ នៅពេលអ្នកប្រកាសជោគជ័យនោះជាសាធារណៈ។ ភាពមិនអាត្មានិយម មិនយកមុខមាត់តែឯងបែបនេះ ពិតជាធ្វើឲ្យមនុស្សជុំវិញពេញចិត្ត និងចង់រាប់អានអ្នកខ្លាំងណាស់។

៦-ចាំឈ្មោះបានល្អ

វាជារឿងទូទៅ និងសាមញ្ញបំផុត ព្រោះមនុស្សណាក៏ចង់ឲ្យគេស្គាល់ និងហៅឈ្មោះខ្លួនបានត្រឹមត្រូវដែរ។ ដូច្នេះត្រូវយកចិត្តទុកដាក់រាល់ពេលពួកគេណែនាំខ្លួន ហើយព្យាយាមកុំច្រឡំមនុស្ស ឬឈ្មោះពួកគេឲ្យសោះ៕

ប្រភព៖ popsugar ប្រែសម្រួល៖ អូន បញ្ញា