គ្រូពេទ្រជំនាញបកស្រាយរឿងស្អំថ្ម ឬទឹកក្ដៅ ក្រោយសម្រាលធ្វើឲ្យប៉ះពាល់សុខភាពស្ត្រី
- 2018-05-09 02:36:05
- ចំនួនមតិ 0 | ចំនួនចែករំលែក 0
គ្រូពេទ្រជំនាញបកស្រាយរឿងស្អំថ្ម ឬទឹកក្ដៅ ក្រោយសម្រាលធ្វើឲ្យប៉ះពាល់សុខភាពស្ត្រី
ពេលសម្រាលកូនរួច ប្រជាជនខ្មែរតែងតែអនុវត្តតៗគ្នា គឺត្រូវសង្កត់ពោះដោយរបស់ក្ដៅដូចជាក្អម ថ្ម ឬស្អំទឹកក្ដៅជាដើម។ ការធ្វើបែបនេះគេជឿថានឹងធ្វើឲ្យឆ្អិនសរសៃខ្ចី ហើយទទួលបានសាច់ចាំ សាច់ស្អាតជាដើម។
កិច្ចសម្ភាសន៍របស់ **កញ្ញា** ជាមួយអ្នកស្រី យ៉ាញ់ គឹមឡៃ អាយុ ៥៥ ឆ្នាំ មុខរបរមេផ្ទះ បានប្រាប់ឲ្យដឹងថា៖ ពីដើមក្រោយសម្រាលកូនអ្នកស្រីត្រូវចាស់ៗបង្គាប់ឲ្យស្អំថ្មដុត ដោយមានជំនឿថា ជួយឲ្យឆ្អិនសរសៃ ឈាមរត់ស្រួល ហើយអ្នកស្រីក៏បានអនុវត្តតាម តែមិនមានផលប៉ះពាល់អ្វីទេ គឺសុខសប្បាយរហូតមក។ ចំណែកអ្នកស្រី ធារ៉ា អាយុ ៣០ ឆ្នាំ មុខរបរលក់បាយ នៅម្ដុំមហាវិថីព្រះមុនីវង្សបានប្រាប់ដូចគ្នាថា គាត់អនុវត្តវិធីនេះតាមចាស់ៗ ហើយក៏មិនមានបញ្ហាអ្វីដែរ។
ប៉ុន្តែបើមកស្ដាប់ការពន្យល់របស់វេជ្ជបណ្ឌិតឯកទេសសម្ភព និងរោគស្ត្រី អ្នកគ្រូ លី ឈីវអៀង បានឲ្យដឹងថា យោងតាមវេជ្ជសាស្ត្រពុំទាន់មានការសិក្សាស្រាវជ្រាវណាអាចបញ្ជាក់បានថា វិធីស្អំថ្មពិតជាត្រឹមត្រូវ ឬមានគុណប្រយោជន៍ដល់សុខភាពនោះទេ។ អ្នកគ្រូបញ្ជាក់ថា ចំពោះការស្អំរបស់ក្ដៅដែលអាចនិយាយបានថានឹងធ្វើឱ្យមានគ្រោះថ្នាក់ដល់ស្ត្រី គឺពិបាកនឹងសន្និដ្ឋានបាន១០០% ព្រោះថាការសិក្សាដើម្បីសន្និដ្ឋានបាន ទាល់តែមានការសិក្សាឱ្យបានគ្រប់ករណី។
"និយាយរួម បើគេធ្វើការសិក្សាលើគ្រប់ស្ត្រីទាំងអស់ បន្ទាប់ពីស្អំម៉ោ ផលល្អអីខ្លះ ផលវិបាកអីខ្លះ យើងចេញជាការសិក្សាមួយទើបអាចសន្និដ្ឋានបាន តែបើពឹងតែលើករណី១-២ គឺវាត្រឹមតែជាការសន្មត់ក្រោយរឿងហ្នឹងកើតឡើង ដែលគាត់ជួបប្រទះផ្ទាល់។ អ៊ីចឹងបើសួរថា គេសិក្សាបានប៉ុន្មានករណីហើយ? ទាល់តែយកករណីទាំងអស់មកសើរើឡើងវិញ ទើបអាចចេញជាការសន្និដ្ឋានច្បាស់មួយបាន។ អ៊ីចឹងទើបក្រសួងរបស់យើងអាចចេញជាបទបញ្ញត្តិមួយថា អូខេ គ្រប់ស្ត្រីទាំងអស់ដែលទើបសម្រាលគួរហាមបែបនេះបែបនោះ។"
អ្នកស្រីវេជ្ជបណ្ឌិតបានលើកឡើងពីការស្អំរបស់ក្ដៅថា "ទី១ ក្ដៅផង! ស្អំអាហ្នឹងក្ដៅផង ស្ត្រីត្រូវដេកលើគ្រែជាប់រហូត អត់អាចងើបដើរបានទេ អ៊ីចឹងសួរថាឈាមហ្នឹងធ្លាក់អស់អត់? ហើយនៅពេលដែលគាត់ងើបដើរ គាត់ដេកយូរថ្ងៃ ចលនាដៃជើងគាត់នៅស្ពឹកស្រពន់ អ៊ីចឹងសួរថា សុខភាពគាត់ល្អអត់? អ៊ីចឹងនេះជាផលវិបាកដែលយើងអាចមើលដឹងពីខាងក្រៅ ហើយបើសួរថា ស្ត្រីទាំងអស់ដែលស្អំប៉ះពាល់ដល់ស្បួនខាងក្នុងយ៉ាងម៉េចខ្លះ ទាល់តែយើងយកស្ត្រីដែលស្អំទាំងអស់នោះ មកពិនិត្យទាំងអស់ទើបដឹងអាហ្នឹងវាប៉ះពាល់យ៉ាងម៉េច។"
អ្នកស្រីវេជ្ជបណ្ឌិតបន្ថែមថា ទោះយ៉ាងណា គ្រូពេទ្យជំនាញមិនណែនាំឱ្យធ្វើការស្អំរបស់ក្ដៅបែបនេះឡើយ គឺហាមតែម្ដង ដោយសារមិនឃើញពីផលចំណេញដែលបានមកពីការធ្វើបែបនេះ ហើយអ្វីដែលគួរបារម្ភខ្លាំង គឺសម្រាប់ស្ត្រីសម្រាលដោយវះកាត់ ព្រោះតែបារម្ភថាមានផលវិបាកច្រើនសម្រាប់ស្ត្រី ចំណែកស្ត្រីដែលសម្រាលដោយធម្មជាតិកម្រនឹងមានបញ្ហាណាស់ តែក៏នៅមិនជំរុញឱ្យធ្វើបែបនេះដែរ។ ម្យ៉ាងទៀត បច្ចុប្បន្នចំនួនអ្នកសម្រាលដោយការវះកាត់មានច្រើនជាងមុន ហើយផលវិបាកក៏មានច្រើនជាងសម្រាលដោយធម្មជាតិ ដូច្នេះបើយករបស់ក្ដៅមកស្អំពីលើមុខរបួសដែលទើបដេររួច វារឹតតែអាចមានគ្រោះថ្នាក់។
"ជាធម្មតា សរីរាង្គរបស់ស្ត្រីក្រោយសម្រាលរួចនឹងត្រូវប្រែមកជាធម្មតាវិញ បានន័យថា ស្បូនដែលរីកធំក្នុងពេលសម្រាលនឹងកន្ត្រាក់រួមតូចមកវិញក្នុងចន្លោះពី១ខែកន្លះ ទៅ២ខែ ដូចស្ត្រីដែលអត់មានកូន អ៊ីចឹងតាមលក្ខណៈធម្មជាតិ គឺវានឹងវិវត្តមកជាធម្មតាវិញ ទោះបីយើងមិនធ្វើអីក៏វាត្រូវមកដូចដើមវិញ"។
ចំណែកការស្អំទឹកកក អ្នកស្រីវេជ្ជបណ្ឌិតបានឱ្យដឹងថា វាទៅតាមករណីជាក់ស្ដែងដូចជា ករណីស្បូនមិនកន្ត្រាក់ មានធ្លាក់ឈាមជាដើម គឺក្រុមគ្រូពេទ្យអនុញ្ញាតឱ្យស្អំសម្រាប់ស្ត្រីសម្រាលដោយធម្មជាតិ។ ប៉ុន្តែសម្រាប់ស្ត្រីដែលវះកាត់គួរប្រឹក្សាជាមួយគ្រូពេទ្យជាមុន ព្រោះការស្អំទឹកកកអាចធ្វើឱ្យសើមមុខរបួស ហើយអាចទៅជាឆ្លងមេរោគ៕
ចុចអាន៖អ្នកមានជំងឺប៉ុន្មានមុខនេះ ហាមកោសខ្យល់បើមិនចង់មានគ្រោះថ្នាក់ដល់ជីវិត