កុំប្រហែស! មនុស្ស ៨ប្រភេទនេះអនាគតអាចក្រដុនដាប បើមិនព្រមកែប្រែ

2018-02-28 00:49:00
ចំនួនមតិ 0 | ចំនួនចែករំលែក 0

មនុស្សជាច្រើនរូបអាចនឹងមិនដឹងថាអ្វីដែលខ្លួនកំពុងធ្វើនៅពេលនេះវាល្អឬយ៉ាងណា ប៉ុន្តែជឿជាក់ថាគ្រប់គ្នាមិនចង់ឲ្យអនាគតរបស់ខ្លួនដែលជារឿងមើលមិនឃើញនោះទៅជាអាក្រក់នោះឡើយ។ ដូច្នេះប្រសិនបើមិនចង់ឲ្យខ្លួនឯងធ្លាក់ខ្លួនលំបាកលំបិនទៅថ្ងៃមុខ សូមបញ្ឈប់ចរិតទាំងនេះជាបន្ទាន់ប្រសិនបើអ្នកកំពុងមាន៖

១. យកមុខជាធំ

មនុស្សប្រភេទនេះចូលចិត្តគិតថា បើសិនក្លាយជាអ្នកមាន ពួកគេអាចចេញលុយប៉ាវ ឬចិញ្ចឹមអ្នកណាក៏បាន ដូច្នេះហើយពួកគេក៏ចាយលុយយ៉ាងខ្ជះខ្ជាយដើម្បីរក្សាមុខមាត់របស់ខ្លួន ដូចជាមានប្រាក់ខែ ៥០០ដុល្លារ ប៉ុន្តែចាយវាយដូចខ្លួនឯងមានប្រាក់ខែ ១០០០ដុល្លារ លេងខ្លួនឡូយឆាយ ហ៊ឺហាប៉ាវមិត្តភ័ក្ដិ រហូតអ្នកខ្លះឲ្យតែបានមុខមាត់ នៅផ្ទះអត់អីហូបក៏សុខចិត្ត។

២. យកលុយទិញស្នេហា

មនុស្សជាច្រើនត្រូវការការទទួលស្គាល់ពីមនុស្សដែលខ្លួនស្រឡាញ់ ដោយការបង្ហាញថាខ្លួនឯងជាអ្នកមាន ដូច្នេះហើយរាល់ពេលជួបគ្នាក៏រកតែហាងអាហារទំនើបថ្លៃៗ ទិញតែកាដូប្រ៊េនថ្លៃៗឲ្យគូស្នេហ៍ រហូតក្លាយជាទម្លាប់។ បែបនេះក៏ធ្វើឲ្យស្ថានភាពហិរញ្ញវត្ថុរបស់ខ្លួនមានបញ្ហាដែរ ជាពិសេសអ្នកដែលសុខចិត្តជំពាក់បំណុលគេដើម្បីប្ដូរជាមួយស្នេហា។

៣. លេងល្បែងចង់មាន

រឿងនេះជាអ្វីដែលអ្នកក្រមួយចំនួននិយមធ្វើ ព្រោះពួកគេគិតថាខ្លួនក្រ មិនអាចទៅធ្វើការ មិនមានសមត្ថភាពប្រកបអាជីពអ្វីទេ ដូច្នេះវិធីតែមួយដែលជួយឲ្យគេក្លាយជាអ្នកមានបាន គឺការលេងឆ្នោត ឬលេងល្បែង។ តែការពិតគ្មានអ្នកណាមានដោយសារល្បែងបានឡើយ ប៉ុន្តែមានតែកាន់តែក្រ និងបន្ថែមចរិតខ្ជិលឲ្យខ្លួនឯងថែមទៀត។

៤. បណ្ដាក់ទុនដោយងងឹតងងល់

ព្រោះតែចង់ក្លាយជាអ្នកមាន អ្នកខ្លះពេលមានលុយមួយចំនួនហើយក៏ចង់ធ្វើមុខជំនួញដែលគេកំពុងពេញនិយម ដោយមិនបានសិក្សា ឬប្រមូលបានព័ត៌មានច្បាស់លាស់មុនបណ្ដាក់ទុន។ ជាលទ្ធផល ការបណ្ដាក់ទុនរបស់ពួកគេមិនអាចទទួលបានជោគជ័យឡើយ។ ជាក់ស្ដែងមួយរយៈចុងក្រោយនេះ ជំនួញហាងតែកាហ្វេកំពុងតែពេញនិយមខ្លាំង ដូច្នេះអ្នកមួយក្រុមនេះក៏បណ្ដាក់ទុនទិញ Franchise គេមកបើកដែរ តែមិនបានសិក្សាព័ត៌មានទីផ្សារ និងរូបបែបនៃការធ្វើការរបស់គេ ដូច្នេះហើយមុខជំនួញរបស់ពួកគេក៏ត្រូវខាតបង់។

៥. ដេកចាំឱកាស

រឿងមួយដែលយើងតែងឃើញមនុស្សមិនជោគជ័យនិយមធ្វើគឺ ពួកគេរង់ចាំឱកាសមកដល់មុខខ្លួនឯង ដោយមិនដើរទៅរកវា គឺដេកចាំវាសនា ចាំជោគជតា។ អ្នកខ្លះវិញត្រូវទៅឲ្យគ្រូទាយខ្លួនឯងរហូតថាតើខ្លួនឯងនឹងអាចមាននៅពេលណា ប៉ុន្តែមិនព្រមបញ្ចេញសកម្មភាពធ្វើអ្វីឡើយ។

៥. ជប់លៀងមិនស្វាង

នេះជាចរិតមួយទៀតដែលធ្វើលុយក្នុងហោប៉ៅត្រូវរលាយ។ ដូចដែលយើងឃើញស្រាប់ហើយថា អ្នកចូលចិត្ត Party ច្រើនតែមានបញ្ហារឿងលុយ ព្រោះលុយដែលត្រូវចំណាយម្ដងៗគឺមិនតិចឡើយទាំងថ្លៃអាហារ ឬគ្រឿងស្រវឹងម្ដងៗគឺស្មើនឹងថ្លៃបាយខ្លួនឯងមួយអាទិត្យបាត់។

៦. ធ្វើការតែមួយមុខ

អ្នកខ្លះគិតថាខិតខំធ្វើការតែមួយមុខក៏អាចឲ្យពួកគេមានចំណូលគ្រប់គ្រាន់បាត់ទៅហើយ ប៉ុន្តែពួកគេក៏ភ្លេចគិតដល់ហានិភ័យនៃអាជីពរបស់ខ្លួនទៅអនាគត ព្រោះថាគ្មានអ្វីមួយដែលស្ថិតស្ថេររហូតនោះទេ គឺអាចមានរឿងខ្លះដែលយើងនឹកមិនដល់ ដូចជាក្រុមហ៊ុនដែលយើងធ្វើការនោះត្រូវមានបញ្ហាក្ស័យធុនជាដើម។

៧. គិតតែរឿងចាយលុយ

មនុស្សប្រភេទនេះគិតត្រឹមតែថារកលុយដើម្បីចាយតែមួយមុខ ប៉ុន្តែមិនគិតដល់ការឲ្យអ្នកដទៃ ការចែករំលែក នោះក៏ធ្វើឲ្យខ្លួនឯងមិនចម្រើនដូចគ្នា។

៨. គិតអ្វីក៏ធំតែមិនដែលធ្វើឲ្យដល់

នេះគឺជាអ្វីដែលអ្នកមានគំនិតក្រចូលចិត្តធ្វើ គឺមួយថ្ងៃៗតែងស្រមើស្រមៃចង់ក្លាយជាអ្នកមាន ចង់មានមុខជំនួញជារបស់ខ្លួនឯង ប៉ុន្តែមិនហ៊ានបណ្ដាក់ទុន ឬចង់ឡើងតំណែងប៉ុន្តែមិនហ៊ានបញ្ចេញគំនិតអ្វីដែលធ្វើឲ្យក្រុមហ៊ុនមានចំណូលកាន់តែច្រើន ឬអភិវឌ្ឍទៅមុខជាដើម។ ទីបំផុតការគិតរបស់ពួកគេបានត្រឹមតែជាការរវើរវាយឥតប្រយោជន៍ ខុសពីអ្នកមានគំនិតជាអ្នកមានដែលគិតភ្លាម ធ្វើភ្លាម ៕

ចុចអាន៖

ប្រភព៖ pentahugs ប្រែសម្រួល៖ ស្វាយ វ៉ាន់ថន