ធ្វើយ៉ាងម៉េចទើបជោគជ័យថ្ងៃបង្ហាញខ្លួនមុខឪពុកម្ដាយខាងប្រុសលើកទី១?

2018-02-19 04:07:00
ចំនួនមតិ 0 | ចំនួនចែករំលែក 0

ត្រូវចងចាំថា ការបង្ហាញមុខលើកដំបូងចំពោះមនុស្សណាម្នាក់គឺសំខាន់ខ្លាំងណាស់ ព្រោះវានឹងកំណត់ថាគេនឹងគិតពីយើងវិជ្ជមាន ឬអវិជ្ជមាននៅថ្ងៃក្រោយ។ ដូចនេះដើម្បីទទួលបានការស្វាគមន៍របស់អ្នកមានគុណខាងប្រុស យើងក៏ត្រូវមានតិចនិកនៅក្នុងថ្ងៃបង្ហាញមុខផងដែរ។ បើមិនទាន់ដឹងថាត្រូវខ្លួនដូចម្ដេចក្នុងថ្ងៃបង្ហាញមុខទី១ អាចមើលវិធីខាងក្រោមបាន។

១. ជ្រើសរើសសំលៀកបំពាក់ឲ្យសមរម្យ

រឿងស្លៀកពាក់គឺពិតសំខាន់ខ្លាំងណាស់ក្នុងថ្ងៃបង្ហាញមុខអនាគតប៉ាម៉ាក់ក្មេក។ យើងត្រូវដឹងថាគ្រួសារខាងនោះ ចូលចិត្តឬមិនចូលចិត្តការស្លៀកពាក់យ៉ាងម៉េច។ ត្រូវស្លៀកពាក់យ៉ាងម៉េចឲ្យបានសមរម្យ តែយើងនៅតែមានភាពជឿជាក់លើខ្លួនឯង។

២. កុំភ្លេចត្រៀមកាដូយកទៅ

ជាកង្វះខាតមួយប្រសិនបើអ្នកទៅបង្ហាញមុខហើយទៅដោយដៃទទេ។ ទោះភ័យ ឬអៀនយ៉ាងណាក៏ដោយ គួរណាស់យើងមានអំណោយបន្តិចបន្តួចទៅជូនខាងប្រុស ដើម្បីបង្ហាញពីទឹកចិត្តរបស់យើង។

៣. កុំផាត់មុខក្រាស់ពេក

ទោះចង់ឬមិនចង់ ក៏យើងមិនគួរផាត់មុខក្រាស់ដូចតួល្ខោនទៅលេងគ្រួសារខាងគេដែរ។ ក្រែមម្សៅក្រាស់ឃ្មឹក រឹតតែធ្វើឲ្យគេពិបាកមើលមកយើងវិញទេ គួរតែតែងមុខបែបធម្មជាតិដើម្បីទាក់ទាញតែមិនឡូយឆាយពេក។

៤. ស្វែងយល់ពីសមាជិកគ្រួសាររបស់មិត្តប្រុស

ទោះស្ថិតក្នុងគ្រួសារតែ១ តែមិនប្រាកដថាសមាជិកទាំងអស់មានអត្តចរិតដូចគ្នានោះទេ។ ខណៈអ្នកខ្លះមិនចូលចិត្តនិយាយច្រើន អ្នកខ្លះវិញបែរជាចូលចិត្តជជែកគ្នាទៅវិញ។ យើងត្រូវដឹងសភាពការណ៍ឲ្យបានច្បាស់លាស់ ជៀសវាងមានការធ្វេសប្រហែស។

៥. សុភាពរាបសារជារឿងចាំបាច់

សំដីសំដៅ ការដើរ ការអង្គុយគឺត្រូវធ្វើទៅមួយៗ ជៀសវាងសំដីទ្រគោះបោះបោក ហើយក៏មិនស្ងាត់ជ្រងំពេកដែរ ត្រូវដឹងពេលត្រូវនិយាយ និងពេលរក្សាភាពស្ងៀមស្ងាត់។

៦. កុំបង្ហាញភាពស្និទ្ធស្នាលជ្រុលពេកជាមួយសង្សារនៅមុខប៉ាម៉ាក់គេ

ដំបូន្មានដ៏ល្អមួយទៀតនោះគឺ កុំបង្ហាញមនោសញ្ចេតនាស្និទ្ធពេកជាមួយកូនប្រុសគេ។ ទោះជាយ៉ាងណាក៏ដោយ ក៏ប្រជាជនអាស៊ីយើងមិនទាន់បើកចំហរឿងស្និទ្ធស្នាលនៅមុខគេមុខឯងនេះច្រើនដែរ ដូចនេះយកល្អគួរតែជៀសវាងរឿងនេះ។

៧.ត្រៀមខ្លួនរួចជាស្រេចសម្រាប់ចូលផ្ទះបាយ

ស្ទើរតែឪពុកម្ដាយក្មេកគ្រប់រូបទៅហើយ ដែលមិនចង់ឲ្យកូនខ្លួនរៀបការនឹងមនុស្សស្រីដែលមិនចេះវិជ្ជាមេផ្ទះអ្វីទាំងអស់។ ដូចនេះទោះបីយើងចេះតិចក្ដីច្រើនក្ដី ក៏ត្រូវបង្ហាញថាយើងហ៊ានចូលចង្ក្រានបាយ មិនមែនប្រភេទចាំបាយលើកដល់មាត់នោះទេ។