ឈប់បានជាការល្អ! ទម្លាប់ញ៉ាំអីពេលយប់ៗអាចឲ្យអ្នកមានជំងឺបេះដូង
- 2018-02-03 09:20:32
- ចំនួនមតិ 0 | ចំនួនចែករំលែក 0
ឈប់បានជាការល្អ! ទម្លាប់ញ៉ាំអីពេលយប់ៗអាចឲ្យអ្នកមានជំងឺបេះដូង
យោងតាមសារព័ត៌មាន The Sun ការញ៉ាំអាហារពេលយប់ៗពេកអាចនាំឲ្យប្រឈមកាន់តែខ្ពស់នឹងជំងឺបេះដូង និងជំងឺផ្សេងៗទៀតដូចជាជំងឺទឹកនោមផ្អែមជាដើម។
អ្នកស្រាវជ្រាវក្នុងប្រទេសម៉ិកស៊ីកូបានរកឃើញថា កណ្ដុរគឺមិនសូវអាចសម្អាតជាតិខ្លាញ់ចេញពីចរន្តឈាមរបស់ពួកវាបានទេក្រោយពីឲ្យស៊ីអាហារក្នុងពេលដែលវាត្រូវការសម្រាក ឬដេក។
អ្នកស្រាវជ្រាវបានធ្វើការពិសោធន៍មួយចំនួនទៅលើសត្វកណ្តុរ។ លទ្ធផលបានបញ្ជាក់ថា តំបន់មួយនៃខួរក្បាលដែលសម្រួលដល់ចង្វាក់នៃការគេង គឺទទួលខុសត្រូវលើរបៀបដែលខ្លាញ់ត្រូវរំលាយ។ នៅពេលសត្វនេះត្រូវបានឲ្យស៊ីអាហារក្នុងពេលដែលវាត្រូវដេកធម្មតា គេបានរកឃើញថា ជាតិខ្លាញ់ចេញពីអាហារនឹងត្រូវការពេលយូរដើរតួនាទីជា Triglycerides ក្នុងចរន្តឈាម។ កាលណាជាតិខ្លាញ់ Triglycerides ក្នុងចរន្តឈាមកាន់តែខ្ពស់ ត្រូវបានគេរកឃើញថាបង្កើនការប្រឈមនឹងជំងឺបេះដូងសរសៃឈាមកាន់តែខ្លាំងដែរដូចជា ជំងឺគាំងបេះដូងជាដើម។ យើងដឹងហើយថា អ្នកដែលធ្វើការវេនយប់គឺប្រឈមខ្ពស់នឹងជំងឺបេះដូងណាស់ ហើយនេះក៏ដោយសារតែការឡើងខ្ពស់របស់ជាតិខ្លាញ់ Triglycerides ក្នុងឈាមរបស់ពួកគេដែរ។ ថ្វីបើការសិក្សានេះធ្វើតែលើសត្វកណ្តុរ នឹងមិនអាចប្រាកដថា លទ្ធផលនេះអាចប្រើលើមនុស្សបានក៏ដោយ តែការរកឃើញមួយនេះអាចបញ្ជាក់ថា រាងកាយគឺមានការរំលាយជាតិខ្លាញ់ល្អនៅពេលដែលវាស្ថិតក្នុងភាពសកម្មបំផុត។ យ៉ាងណាមិញ មានរឿងតិចតួចដែលអ្នកអាចធ្វើបានទៅលើរបៀបរបបនៃការងាររបស់អ្នកនៅពេលធ្វើការពេលយប់ អ្នកក៏អាចញ៉ាំអាហារណាដែលផ្តល់សុខភាព និងហាត់ប្រាណដើម្បីបន្ថយការប្រឈមនឹងជំងឺបេះដូងបានដែរ។ សម្រាប់អ្នកដែលធ្វើការនៅពេលថ្ងៃ ការសិក្សាបាននិយាយថា វាប្រហែលជាពេលវេលាដ៏ល្អបំផុតដែលត្រូវចៀសវាងការញ៉ាំអាហារច្រើនៗនៅពេលយប់ជ្រៅៗ ៕