រឿងភាគបុរាណថ្មីរបស់ Fan Bingbing ត្រូវពន្យារពេលមិនកំណត់ព្រោះឈុតស្រើបស្រាល (វីដេអូ)

2018-01-18 03:39:29
ចំនួនមតិ 0 | ចំនួនចែករំលែក 0

មិនត្រឹមតែត្រូវពន្យារពេលចាក់ផ្សាយ រឿងភាគថ្មីរបស់កំពូលតារាសម្ដែង Fan Bingbing ក៏ត្រូវតែផ្លាស់ប្ដូរឈ្មោះរបស់ខ្លួនទៀត និងប្រឈមមុខនឹងការមិនអាចចាក់ផ្សាយថែមទៀត។

កាសែតប្រជាជនប្រចាំថ្ងៃរបស់ចិន កាលពីថ្ងៃទី១៧ខែមករាមុននេះបានចុះផ្សាយថា ស្នាដៃរឿងភាគចុងក្រោយរបស់ Fan Bingbing ដែលមាននាងជាអ្នកផលិត និងដើរតួឯកនោះ ទើបតែត្រូវប្ដូរឈ្មោះពី “Win The World” មកជា “The Legend of Ba Qing” វិញព្រោះឈ្មោះមុនមិនសមស្រប។ មិនត្រឹមតែប៉ុណ្ណោះ រឿងនេះក៏កំពុងប្រឈមមុខនឹងភាពលំបាកពីការកំណត់ថ្ងៃចាក់ផ្សាយដែរ។

មុននោះដែរ ស្នាដៃថ្មីបំផុតរបស់ស្រីស្អាតត្រកូល Fan ត្រូវបានគេរំពឹងទុកថានឹងទទួលបានជោគជ័យពេលចាក់បញ្ចាំង។ បើតាមគម្រោង "Win The World” នឹងត្រូវបានចាក់ផ្សាយនៅសប្ដាហ៍ទី២ខែមករា តែកាលបរិច្ឆេទនេះក៏ត្រូវបានលើកវិញ។ ការពន្យារនេះបានធ្វើឲ្យភាគហ៊ុនរបស់ក្រុមហ៊ុនផលិតធ្លាក់ចុះ៣៥%។

តាមប្រភពកាសែតខាងលើ ការលើកថ្ងៃចាក់ផ្សាយនេះគឺបណ្ដាលមកពី ក្រសួងចាក់ផ្សាយរបស់ចិនចង់ជំរុញការចាក់ផ្សាយរឿងសម័យ កាត់បន្ថយរឿងបុរាណ។ ម្យ៉ាងវិញទៀត ដូចគ្នានឹង "មហិច្ឆតាអ៊ូម៉ីនាង" ដែរ នៅក្នុងរឿងនេះ ក៏មិនខ្វះឈុតឆាកក្ដៅសាច់ដែរ ដែលជាហេតុរឿងនេះជួបរឿងស៊យបែបនេះ។ មកត្រឹមពេលនេះ គេមិនទាន់ដឹងទេថា "Win The World” នឹងត្រូវបានចាក់ផ្សាយ ឬក៏អត់នោះទេ ៕