ទម្លាប់ ៥យ៉ាងដែលគូស្នេហ៍មានសុភមង្គលធ្វើរៀងរាល់យប់មុនពេលចូលគេង

2018-01-09 08:21:31
ចំនួនមតិ 0 | ចំនួនចែករំលែក 0

រៀបការហើយប្ដីប្រពន្ធតែងប្រាថ្នារស់នៅជាមួយគ្នាដោយមានក្ដីសុខ ប៉ុន្តែបើសិនជាអ្នកមានទម្លាប់មិនល្អ នោះជីវិតគ្រួសារក៏អាចជួបបញ្ហាទៅតាមហ្នឹងដែរ។ ខាងក្រោមនេះជាទម្លាប់ ៥យ៉ាងដែលគូស្នេហ៍មានសុភមង្គលធ្វើរៀងរាល់យប់មុនពេលចូលគេង ដែលអ្នកអាចយកជាគំរូ ៖

១. ទុកទូរស័ព្ទមួយឡែករហូតដល់ព្រឹក

មុនពេលគេងប្ដីប្រពន្ធដែលមានក្ដីសុខគេមិនដែលកាន់ទូរស័ព្ទជាប់ដៃនោះទេ គេតែងទុកវាមួយឡែក។ មានតែពេលយប់នេះហើយពួកគេមានពេលនៅជាមួយគ្នាបានយូរ ដូច្នេះពួកគេមិនអាចឲ្យរបស់ក្រៅខ្លួនមកបំផ្លាញពេលវេលា និងភាពផ្អែមល្ហែមរបស់ពួកគេឡើយ។

រូបតំណាង

**២. មិននិយាយអីរឿងការងារ**

ដល់ម៉ោងសម្រាកសម្រាប់ជីវិតឯកជនហើយ ហេតុអីត្រូវស្ពាយរឿងការងារមកនិយាយដល់ក្នុងបន្ទប់ទៀត? គូសេ្នហ៍ដែលល្អពួកគេមិននាំរឿងការងារមកផ្ទះនោះទេ ព្រោះពួកគេគ្រាន់តែចង់មានពេលរីករាយ ឲ្យខ្លួនឯងធូរស្រាលពីរឿងមិនសប្បាយចិត្តពីខាងក្រៅប៉ុណ្ណោះ។

៣. ចូលគេងដំណាលគ្នាតាមតែអាចធ្វើទៅបាន

បើគ្មានការងារអីសំខាន់ខ្លាំងនោះទេ ពួកគេតែងតែចូលគេងដំណាលគ្នា ព្រោះការធ្វើបែបនេះអាចឲ្យទាំងសងខាងមានអារម្មណ៍ថាកក់ក្ដៅ និងសប្បាយចិត្ត។ ម្យ៉ាងទៀតពេលរៀបការហើយគ្មានអ្នកណាចង់គេងតែឯងនោះទេ ព្រោះអាចឲ្យពួកគេមានអារម្មណ៍ថាឯកា និងគ្មានភាពស្និទ្ធស្នាល។

៤. ឆុងតែ និងជួយធ្វើសរសៃឲ្យគ្នា

ភាពចុករោយ និងមិនស្រួលលើរាងកាយតែងតែមាន ដូច្នេះមុនពេលចូលគេងពួកគេតែងញ៉ាំតែក្ដៅមួយកែវ ហើយមានការច្របាច់ដៃ ច្របាច់ស្មាឲ្យគ្នាទៅវិញទៅមក។ ទម្លាប់នេះគឺពិតជាល្អខ្លាំងណាស់សម្រាប់ប្ដីប្រពន្ធ។

៥. និយាយពាក្យផ្អែមល្ហែមឲ្យបានច្រើនមុនពេលចូលគេង

ពេលមកពីធ្វើការវិញតែងតែហត់នឿយ អស់កម្លាំងតែបើមុនពេលចូលគេងបានស្ដាប់ពាក្យល្អៗ និងផ្អែមល្ហែមនោះអារម្មណ៍មិនល្អក៏រសាយទៅតាមហ្នឹងដែរ។ ដូច្នេះប្ដីប្រពន្ធដ៏ល្អមួយគូតែងតែនិយាយពាក្យល្អៗ ដូចជា «ថ្ងៃនេះមើលទៅបងហត់ខ្លាំងណាស់ តែបងនៅតែសង្ហា» ឬ «ឆាប់សម្រាកទៅព្រោះបងហត់ហើយ រាត្រីសួស្ដីបងសម្លាញ់ អូនស្រឡាញ់បង» ជាដើម។