ផលប៉ះពាល់ធ្ងន់ធ្ងរនៃការសេពគ្រឿងស្រវឹង ដែលអាចសម្លាប់យើងបានគ្រប់វិនាទី

2017-04-14 03:30:00
ចំនួនមតិ 0 | ចំនួនចែករំលែក 0

ចូលឆ្នាំខ្មែរជាពិធីបុណ្យដ៏ធំមួយរបស់ពលរដ្ឋកម្ពុជា ហើយក៏ជាពេលវេលាជួបជុំគ្រួសារដ៏រីករាយ។ ឱកាសនៃការជួបជុំនេះក្រុមគ្រួសារនីមួយៗត្រៀមរៀបចំការទទួលទានអាហារ ញុំាភេសជ្ជៈ និងគ្រឿងស្រវឹងច្រើនផងដែរ។ ការពិសារគ្រឿងស្រវឹងមិនមែនជារឿងខុសនោះទេ ប៉ុន្តែវាអាចបង្កឲ្យមានផលប៉ះពាល់ដល់សុខភាព និងបញ្ហាផ្សេងទៀតជាច្រើនទៀត។

ញុំាគ្រឿងស្រវឹងអាចជាប្រភពនៃបញ្ហាដល់រាងកាយ ផ្លូវចិត្ត និងសង្គមធ្ងន់ធ្ងរ។ គ្រឿងស្រវឹងប៉ះពាល់ដល់មនុស្សគ្រប់រូបផ្សេងៗគ្នា និងមានហានិភ័យសុខភាពជាក់លាក់ចំពោះការពិសារគ្រឿងស្រវឹងច្រើនលើសលប់។ សារធាតុគីមីម្យ៉ាងក្នុងគ្រឿងស្រវឹងអាចធ្វើឲ្យពុល និងរលាកដល់សាច់ដុំបេះដូង។ ការទទួលទានគ្រឿងស្រវឹងលើសលប់អំឡុងពេលថ្ងៃឈប់សម្រាកអាចបង្កឲ្យមានជំងឺបេះដូង (atrial fibrillation) ដែលជាហេតុធ្វើឲ្យបេះដូងដើរខុសចង្វាក់ បង្កើនហានិភ័យនៃជំងឺដាច់សរសៃឈាមខួរក្បាល គាំងបេះដូង និងជំងឺខ្សោយបេះដូង។

គ្រោះថ្នាក់សុខភាពមួយទៀតនៃការញុំាគ្រឿងស្រវឹងច្រើនពេកអាចធ្វើឲ្យបាត់បង់សមត្ថភាពក្នុងការសម្រេចចិត្តឲ្យបានម៉ត់ចត់។ ពេលស្រវឹង អ្វីគ្រប់យ៉ាងនឹងក្លាយទៅជាស្រពេចស្រពិល ហើយអ្នកនឹងមានបញ្ហាក្នុងការប៉ាន់ស្មានពីចម្ងាយ និងពេលវេលាដែលវាជាមូលហេតុចម្បងបង្កឲ្យមានគ្រោះថ្នាក់ចរាចរណ៍។

ផលប៉ះពាល់នៃការញុំាគ្រឿងស្រវឹងច្រើន៖

១. ពុលស្រា

ជាតិអាល់កុលច្រើនពេកនៅក្នុងរាងកាយអាចនឹងនាំឱ្យមានការពុលសុរា។ ការពុលសុរានេះអាចនាំឲ្យមានផលប៉ះពាល់ដល់មុខងារនៃរាងកាយ។ ផលប៉ះពាល់ទាំងនេះរួមមាន ប៉ះពាល់ដល់ផ្នែកមួយនៃខួរក្បាលដែលមានមុខងារពាក់ព័ន្ធនឹងបេះដូង ការដឹងខ្លួន និងសូម្បីតែការដកដង្ហើម។

នៅពេលដែលអ្នកញុំាំជាតិអាល់កុលកាន់តែលឿន កំហាប់ជាតិអាល់កុលក្នុងឈាមរបស់អ្នកនឹងកាន់តែកើនឡើង ដែលវានឹងធ្វើឲ្យការបំពេញមុខងារទាំងផ្លូវកាយ និងផ្លូវចិត្តរបស់អ្នករងផលប៉ះពាល់។ ការពុលគ្រឿងស្រវឹងជាញឹកញាប់អាចបណ្តាលឲ្យប្រកាច់ ក្អួត ព្រមទាំងបាត់បង់ការសម្របសម្រួល។ ២. ញៀនសា្រ

ញៀនស្រាកើតឡើងនៅពេលដែលរាងកាយរបស់អ្នកមិនអាចបំពេញមុខងារបានដោយគ្មានការសេពគ្រឿងស្រវឹង។ តើពេលខ្លះអ្នកមានអារម្មណ៍ថា បើមិនញ៉ាំស្រវឹង ដូចជាមិនស្រួលខ្លួនមែនទេ? តើជារឿយៗ អ្នកនៅតែចង់បន្តញុំាទោះជាមិត្តភក្តិនិយាយថាពួកគេលែងទៅរួចហើយដែរទេ? ជួនកាលទៀតអ្នកនៅតែមានអាការស្រវឹងមិនបាត់ជាច្រើនថ្ងៃមែនទេ? អ្នកអាចនឹងក្លាយជាមនុស្សញៀនស្រា ប្រសិនបើជួបប្រទះយ៉ាងហោចណាស់មួយក្នុងចំណោមចំណុចទាំងនេះ។

៣. ស្រវឹង

ជាធម្មតាមនុស្សម្នាក់ដែលស្រវឹងតែងជួបប្រទះនឹងអាការមួយចំនួនដូចជា ឈឺក្បាល ក្អួត ចង្អោរ បែកញើស អស់កម្លាំង និងឆាប់ខឹង។ ខួរក្បាលក៏ត្រូវរងផលប៉ះពាល់ផងដែរ ដូចជាការធ្វើសេចក្តីសម្រេចធ្លាក់ចុះ។ ផលប៉ះពាល់ភ្លាមៗនៃការស្រវឹងរួមមានរាគ សេពគ្រឿងស្រវឹងច្រើនបង្កឱ្យមានការរំខាននៅក្នុងការបឺតស្រូបសារធាតុចិញ្ចឹម និងវីតាមីនមួយចំនួនក្នុងពោះវៀន វាអាចនាំឱ្យមានបាក់តេរីច្រើននៅក្នុងពោះវៀន។