វិធីបំបាត់មុខប្រហោងបានដោយខ្លួនឯងនៅផ្ទះ

2016-12-20 04:19:49
ចំនួនមតិ 0 | ចំនួនចែករំលែក 0

ប្រហោងធំៗដែលមាននៅលើថ្ពាល់ និងច្រមុះធ្វើឱ្យអ្នកមើលទៅមិនមានសុខភាពល្អ ហើយថែមទាំងចាស់ជាងវ័យផងដែរ។មនុស្សជាច្រើនបានចំណាយប្រាក់កាសដ៏ច្រើនសន្ធឹកសន្ធាប់ដើម្បីទិញផលិតផលថ្លៃៗក្នុងគោលបំណងដើម្បីបំបាត់មុខប្រហោងដ៏អាក្រក់មើលនេះ។ សម្រាប់អ្នកមិនសូវមានលុយ ពេលនេះយើងនឹងបង្ហាញជូនអ្នកនូវវិធីសាស្ត្រដែលអ្នកអាចធ្វើដោយខ្លួនឯងបាននៅផ្ទះ ហើយថែមទាំងមិនចាំបាច់ចំណាយថវិកាច្រើនផងដែរ។

តោះ! វិធីសាស្រ្តដ៏ពិសេសៗមាននៅខាងក្រោមនេះឯង៖

ទឹកកក៖ ខណៈដែលទឹកកកត្រជាក់ខ្លាំង វាពិតជាជួយឱ្យស្បែករបស់អ្នករក្សាបាននូវភាពត្រជាក់ ហើយជួយកាត់បន្ថយប្រហោងធំៗដែលកើតមាននៅលើស្បែកមុខ។ វាអាចជួយការពារស្បែកពីផលប៉ះពាល់ដោយកត្តាបរិស្ថានផ្សេងៗផងដែរ។ អ្វីដែលអ្នកត្រូវធ្វើគឺយកដុំទឹកកកមកត្រដុសលើផ្ទៃមុខ មុនពេលចូលគេងជារៀងរាល់យប់។

ទឹកខ្មេះផ្លែប៉ោម៖ វាជួយធ្វើឱ្យស្បែកមុខតឹង ថែមទាំងមានកម្រិត pH ស័ក្ដិសមនឹងស្បែកមុខរបស់អ្នកផងដែរ។ យកសំឡីជ្រលក់ជាមួយនឹងទឹកខ្មេះផ្លែប៉ោមរួចជូតឱ្យសព្វផ្ទៃមុខ។ ដើម្បីទទួលបានលទ្ធផលកាន់តែឆាប់រហ័ស អ្នកត្រូវធ្វើវាឱ្យបាន២ដងក្នុងមួយថ្ងៃ។

ផ្នែកពណ៌សនៃស៊ុត៖ ផ្នែកពណ៌សនៃស៊ុតជាដំណោះស្រាយដ៏មានប្រសិទ្ធភាពបំផុតក្នុងការកម្ចាត់ប្រហោងធំៗដែលមាននៅលើមុខ។ ខណៈដែលស៊ុតមានសមត្ថភាពពិសេសក្នុងការបឺតស្រូបយកជាតិខ្លាញ់ និងជួយពង្រួមរន្ធញើសផងដែរ។ យកវាមកលាបលើផ្ទៃមុខឱ្យសព្វ ទុកឱ្យស្ងួតល្អ រួចលាងនឹងទឹកស្អាតជាការស្រេច។ អ្នកត្រូវធ្វើវា ២ ទៅ ៣ ដងក្នុង១សប្ដាហ៍ដើម្បីលទ្ធផលគួរជាទីគាប់ចិត្តក្នុងរយៈពេល១ខែ។

ស្រ្កាប់ផ្សំពីស្ករស៖ ស្រ្កាប់នេះជួយកម្ចាត់កោសិកាចាស់ៗ និងពង្រួមរន្ធញើសធំដែលមាននៅលើផ្ទៃមុខ។ វាក៏ជួយសម្អាតធូលីដីដែលជាប់ស្អិតលើផ្ទៃមុខ ដែលអាចឱ្យស្បែកដកដង្ហើមបានស្រួល។ យកស្រ្កាប់ស្ករសមកត្រដុសលើផ្ទៃមុខឱ្យសព្វ រួចលាងសម្អាតជាមួយនឹងទឹក។

ម៉ាសធ្វើពីមេម្សៅសម្រាប់ដុតនំ Baking Soda៖ មេម្សៅសម្រាប់ដុតនំជួយកម្ចាត់ខ្លាញ់ និងធូលីចេញពីផ្ទៃមុខ ថែមទាំងជួយធ្វើឱ្យស្បែកមានសំណើមផងដែរ។ វាក៏អាចជួយការពារផ្ទៃមុខរបស់អ្នកពីការកើតមុនផងដែរ។ អ្នកត្រូវលាយមេម្សៅសម្រាប់ដុតនំជាមួយនឹងទឹកដើម្បីបង្កើតជាល្បាយខាប់ៗ រួចលាបឱ្យសព្វផ្ទៃមុខ រក្សាទុកមួយសន្ទុះធំ រួចលាងសម្អាតជាការស្រេច៕

កុំភ្លេចសាកធ្វើណា ងាយៗហើយអស់លុយតិចទៀត!

ប្រភព៖ Zeppfeed ប្រែសម្រួល៖ ដេត ធន្នី