ជំងឺរលាកសន្លាក់ (arthritis) មានច្រើនសណ្ឋាន ប៉ុន្តែជំងឺរលាកសន្លាក់មួយដែលគេតែងជួបប្រទះញឹកញាប់ គឺជំងឺដែលកើតឡើងដោយសារការលើសអាស៊ីតអ៊ុយរីកក្នុងឈាម។

ជំងឺនេះភាគច្រើនកើតលើមនុស្សប្រុសដែលមានអាយុចន្លោះពី ៣០-៤៥ឆ្នាំ និងច្រើនកើតលើមនុស្សស្រីក្រោយអាយុ ៥៥ឆ្នាំ។ យ៉ាងណាមិញ មនុស្សទាំងពីរភេទក្រោយអាយុ ៦៥ឆ្នាំ សុទ្ធតែអាចប្រឈមនឹងជំងឺនេះ។

មានកត្តាជាច្រើនដែលអាចបណ្តាលឲ្យបរិមាណអាស៊ីតអ៊ុយរីកក្នុងឈាមលើស ដែលកត្តាទាំងនោះត្រូវបានគេចាត់ទុកជាដើមចមលាក់មុខទាំង៧ មានដូចខាងក្រោម៖

• ការលើសទម្ងន់
• ការពិសាជាតិអាល់កុលញឹកញាប់ ជាពិសេស ស្រាបៀរ ស្រាវីស្គី
• ការញុំាអាហារច្រើនលើសកម្រិត ឬទុកពោះទទេរយូរពេក
• អ្នកមានជំងឺខ្សោយតម្រងនោមរ៉ាំរ៉ៃ
• អ្នកជំងឺលើសសម្ពាធឈាម
• អ្នកចូលចិត្តបរិភោគសាច់ និងគ្រឿងសមុទ្រក្នុងបរិមាណច្រើន
• អ្នកកំពុងប្រើថ្នាំមួយចំនួន (ដោយមិនបានពិគ្រោះពេទ្យ) ដែលនាំទៅរកការលើសអាស៊ីតអ៊ុយរីកក្នុងឈាម

តើជំងឺលើសអាស៊ីតអ៊ុយរីកក្នុងឈាមមានរោគសញ្ញាអ្វីខ្លះ?

រោគសញ្ញានៃជំងឺលើសអាស៊ីតអ៊ុយរីករួមមាន៖

• នៅលើស្បែក និងនៅលើសន្លាក់ មានលេចចេញជាដុំពកៗ
• នៅតម្រងនោមឃើញមានក្រួសតម្រងនោម
• សន្លាក់ដែលមានការប៉ះពាល់ខ្លាំង ជាពិសេសគឺសន្លាក់ ជង្គង់ កដៃ កជើង និងមេជើង គឺមានជាលក្ខណៈ ហើម ក្តៅ ឡើងក្រហម និងឈឺចាប់ខ្លាំង ពិសេសស្តែងចេញភ្លាមៗពិបាកនឹងទ្រាំ។

ការធ្វើរោគវិនិច្ឆ័យនិងព្យាបាល

ប្រសិនបើមានលេចចេញរោគសញ្ញាណាមួយដូចរៀបរាប់ខាងលើ អ្នកជំងឺត្រូវជួបពិគ្រោះជាបន្ទាន់ជាមួយគ្រូពេទ្យជំនាញ ដើម្បីធ្វើរោគវិនិច្ឆ័យឲ្យបានច្បាស់លាស់ និងកំណត់វិធីសាស្ត្រព្យាបាល តាមដានឲ្យបានត្រឹមត្រូវ និងទាន់ពេលវេលា ជៀសវាងការប្រើថ្នាំដោយខ្លួនឯង ដែលអាចបណ្តាលឲ្យមានគ្រោះថ្នាក់ធ្ងន់ធ្ងរ។