គន្លឹះមួយចំនួនមានប្រយោជន៍ចំពោះអ្នកមានបញ្ហាគេងមិនលក់

2023-09-09 00:02:00
ចំនួនមតិ 0 | ចំនួនចែករំលែក 0

ការគេងមិនគ្រប់គ្រាន់អាចធ្វើឲ្យប៉ះពាល់សុខភាពបេះដូង។ ការគេងមិនគ្រប់គ្រាន់អាចបណ្ដាលមកពីយើងមិនសូវមានពេលគេង ឬក៏មានបញ្ហាក្នុងការគេង។ បើសិនជាគ្នាយើងមានបញ្ហាក្នុងការគេង អាចសាកល្បងអនុវត្តទម្លាប់ទាំងនេះទំនងជាអាចជួយបានច្រើន។

កំណត់ម៉ោងពេលត្រូវគេង៖ គេងបានគ្រប់គ្រាន់គឺជារឿងសំខាន់ចំពោះសុខភាពបេះដូង ក៏ដូចជាសុខភាពទូទៅដែរ។ ដើម្បីទទួលបានដំណេកល្អមួយ CDC អាមេរិកបានណែនាំឲ្យយើងកំណត់ម៉ោងជាក់លាក់មួយសម្រាប់ចូលគេង និងភ្ញាក់ពីគេង ឲ្យបានរាល់ថ្ងៃ។ សម្រាប់ការគេងត្រូវគេងក្នុងបន្ទប់ងងឹត គ្មានសំឡេងរំខាន មានផាសុកភាព និងមិនត្រូវប្រើឧបករណ៍អេឡិចត្រូនិកកៀកនឹងម៉ោងគេងពេក។ ដូចគ្នាដែរគួរកុំញ៉ាំគ្រឿងស្រវឹង អាហារមានជាតិកាហ្វេអ៊ីន ឬញ៉ាំអាហារច្រើន បើជិតដល់ម៉ោងចូលគេង។

ទម្លាប់ហាត់ប្រាណ៖ ការមានសកម្មភាពរាងកាយ ឬការធ្វើលំហាត់ប្រាណ អាចរួមចំណែកជួយឲ្យគេងលក់ស្រួលនៅពេលយប់។ លំហាត់ប្រាណទាំងនោះអាចមានដូចដើរ រត់ ជិះកង់ ឬហែលទឹកជាដើម។ លំហាត់ប្រាណទាំងនេះមិនត្រឹមតែជួយដល់ការគេងនៅពេលយប់ទេ តែក៏រួមចំណែកជួយកាត់បន្ថយហានិភ័យជំងឺបេះដូងដែរ។

ញ៉ាំអាហារល្អចំពោះសុខភាព៖ អាហារល្អចំពោះសុខភាពគឺអាហារមានជាតិស្ករទាប និងខ្លាញ់ទាប ហើយជាអាហារសម្បូរជាតិសរសៃ។ អាហារសម្បូរដោយបន្លែ និងផ្លែឈើ ជាអាហារល្អចំពោះសុខភាព ហើយអាចរួមចំណែកដល់ការគេងដែរ។

គ្រប់គ្រងស្ដ្រេស៖ អ្នកមានបញ្ហាស្រ្តេសច្រើនអាចរំខានដល់គុណភាពនៃការគេង ហើយស្ត្រេសក៏ជាកត្តាហានិភ័យមួយនៃជំងឺបេះដូងដែរ។ រៀនគ្រប់គ្រងស្រ្តេសឲ្យបានល្អជួយឲ្យគេងលក់ស្រួល និងកាត់បន្ថយហានិភ័យជំងឺបេះដូង។

គ្រប់គ្រងទម្ងន់ឲ្យបានល្អ៖ បើសិនជាយើងធាត់លើសទម្ងន់ នឹងធ្វើឲ្យយើងមានហានិភ័យជំងឺបេះដូង និងបញ្ហាគេងបាត់ដង្ហើម ដែលបញ្ហានេះរំខានដល់ដំណេក។ យើងអាចរក្សាទម្ងន់ដងខ្លួនល្អបានតាមរយៈរបបអាហារល្អចំពោះសុខភាព និងការហាត់ប្រាណជាប្រចាំ។

ប្រឹក្សាជាមួយគ្រូពេទ្យ៖ បញ្ហាដំណេក ដូចជាបញ្ហាដេកបាត់ដង្ហើម អាចរំខានដល់គុណភាពដំណេកបាន។ ស្វែងរកការប្រឹក្សាជាមួយគ្រូពេទ្យបើសង្ស័យថាខ្លួនកំពុងមានបញ្ហាដំណេក និងរំខានដល់ការរស់នៅប្រចាំថ្ងៃ។

ប្រភព៖ Harvard | webmd អត្ថបទ៖ ទូច សុខា