គេងមិនគ្រប់គ្រាន់អាចបង្កើនហានិភ័យកើតជំងឺបេះដូង

2023-09-08 04:01:28
ចំនួនមតិ 0 | ចំនួនចែករំលែក 0

ការគេងមិនគ្រប់គ្រាន់ត្រូវគេដឹងថាអាចបង្កផលអវិជ្ជមានច្រើនយ៉ាងដល់សុខភាពបេះដូង។ ដូចនេះហើយយើងត្រូវមានពេលវេលាគេងឲ្យបានត្រឹមត្រូវដើម្បីកុំឲ្យប៉ះពាល់ដល់សុខភាពរាងកាយ និងបេះដូង។ តើការគេងមិនគ្រប់គ្រាន់ប៉ះពាល់សុខភាពបេះដូងបែបណា?

ឡើងសម្ពាធឈាម៖ ការគេងមិនបានគ្រប់គ្រាន់ជាមូលហេតុមួយធ្វើឲ្យសម្ពាធឈាមមានការកើនឡើង ហើយការកើនឡើងសម្ពាធឈាមនេះ ក៏ជាកត្តាហានិភ័យមួយនាំឲ្យមានបញ្ហាគ្រោះថ្នាក់សរសៃឈាមខួរក្បាល។

បង្កើនហានិភ័យជំងឺសរសៃឈាមបេះដូង៖ អ្នកមានបញ្ហាគេងមិនលក់ ឬគេងមិនបានគ្រប់គ្រាន់ជាប្រចាំ អាចមានហានិភ័យខ្ពស់ក្នុងការកើតជំងឺសរសៃឈាមបេះដូង។ គេងមិនបានគ្រប់គ្រាន់អាចធ្វើឲ្យយើងប្រឈមនឹងបញ្ហាធាត់លើសទម្ងន់ សម្ពាធឈាមខ្ពស់ និងប្រឈមនឹងជំងឺទឹកនោមផ្អែមផងដែរ ដែលអ្វីទាំងនេះសុទ្ធតែជាកត្តារួមចំណែកនាំឲ្យមានជំងឺសរសៃឈាមបេះដូង។

បង្កើនការរលាកក្នុងរាងកាយ៖ អ្នកគេងមិនគ្រប់ ឬអ្នកមានបញ្ហាគេងមិនលក់ ក៏អាចនាំឲ្យកើតមានបញ្ហារលាកក្នុងរាងកាយដែរ ដែលបញ្ហារលាកនេះអាចធ្វើឲ្យហានិភ័យនៃបញ្ហាសរសៃឈាមបេះដូងកើតឡើងដែរ។

ហានិភ័យជំងឺបេះដូងផ្សេងទៀត៖ ការសិក្សារកឃើញថាអ្នកដែលគេងបានតិចជាង៦ម៉ោងក្នុងមួយយប់ទំនងជាមានភាគរយខ្ពស់ក្នុងការវិវត្តទៅជាធាត់លើសទម្ងន់ វិវត្តទៅរកជំងឺទឹកនោមផ្អែម និងអាចកើតជំងឺសរសៃឈាមបេះដូងខ្ពស់ ជាងអ្នកដែលបានគេងចន្លោះពី៧ទៅ៨ម៉ោងក្នុងមួយយប់។ ការសិក្សាខ្លះទៀតបង្ហាញថាការគេងមិនបានគ្រប់គ្រាន់ ឬតិចជាង៦ម៉ោងក្នុងមួយយប់នេះអាចបង្កហានិភ័យកើតជំងឺបេះដូងបីដងខ្ពស់ជាងអ្នកគេងបានគ្រប់គ្រាន់។

ដូចនេះយើងគួរគេងឲ្យបានគ្រប់គ្រាន់ដើម្បីបង្ការហានិភ័យទាំងនេះ។ បើតាមសមាគមសុខភាពបេះដូងអាមរិក មនុស្សពេញវ័យគួរគេងឲ្យបាន៧ទៅ៩ម៉ោងក្នុងមួយយប់។ ក្នុងករណីយើងមានបញ្ហាគេងមិនលក់ ពិបាកគេងឲ្យលក់ ឬសង្ស័យថាខ្លួនកំពុងមានបញ្ហាគេង គួរស្វែងរកការពិគ្រោះយោបល់ជាមួយគ្រូពេទ្យដើម្បីបានធ្វើរោគវិនិច្ឆ័យ និងការព្យាបាលត្រឹមត្រូវ។

ប្រភព៖ webmd | Hopkinsmedicine អត្ថបទ៖ ទូច សុខា