តើស្ត្រេសអាចប៉ះពាល់សុខភាពបេះដូងបែបណា?

2023-09-06 04:25:02
ចំនួនមតិ 0 | ចំនួនចែករំលែក 0

តើស្ត្រេសជាអ្វី? ស្ត្រេសគឺជាស្ថានភាពមួយនៃការព្រួយបារម្ភ ឬមានភាពតានតឹងផ្លូវចិត្ត បង្កឡើងដោយស្ថានភាពលំបាកណាមួយ។ ស្ត្រេសគឺជាការឆ្លើយតបជាធម្មជាតិរបស់រាងកាយយើងទៅនឹងបញ្ហាប្រឈមនានា ឬការគំរាមកំហែងណាមួយដល់ជីវិត ឬការរស់នៅ។ ដូចគ្នាដែរស្រ្តេសកើតចេញពីហេតុការណ៍ ឬការគិតដែលអាចនាំឲ្យយើងមានអារម្មណ៍ខឹង មួម៉ៅ ឬភ័យព្រួយ។

ស្ត្រេស និងសុខភាពបេះដូង

ស្ត្រេសអាចធ្វើឲ្យប៉ះពាល់អវិជ្ជមានដល់សុខភាពបេះដូងតាមវិធីច្រើនយ៉ាង។ អ្នកដែលមានបញ្ហាស្ត្រេសរ៉ាំរ៉ៃអាចនាំឲ្យមានសម្ពាធឈាមខ្ពស់ ដែលអាចនាំឲ្យមានហានិភ័យកើតបញ្ហាគាំងបេះដូង ឬគ្រោះថ្នាក់សរសៃឈាមខួរក្បាល។

ក្រៅពីនេះ ស្រ្តេសក៏បង្កើនការរលាកក្នុងរាងកាយ ដែលផ្សារភ្ជាប់ទៅនឹងកត្តាដែលអាចបង្កគ្រោះថ្នាក់ដល់បេះដូង ដូចជាសម្ពាធឈាមខ្ពស់ និងការធ្លាក់ចុះនៃកូលេស្តេរ៉ូលល្អជាដើម។ ដូចគ្នាដែរ បើស្ថានភាពស្ត្រេសកើតឡើងមានរយៈពេលយូរអង្វែង ក៏អាចប៉ះពាល់លើកំណកឈាមដែលអាចធ្វើឲ្យមានសភាពកាន់តែស្អិត និងបង្កើនហានិភ័យបញ្ហាគ្រោះថា្នក់សរសៃឈាមខួរក្បាល។

ក្រៅពីនេះ ស្ត្រេសក៏អាចធ្វើឲ្យលំហូរឈាមទៅកាន់សាច់ដុំបេះដូងមិនល្អ ដែលជាហេតុអាចនាំឲ្យបេះដូងមិនអាចទទួលបានអុកស៊ីសែនគ្រប់គ្រាន់។ បន្ថែមពីនេះ អ្នកកើតស្រ្តេសខ្លះអាចឈានដល់ការជក់បារី ឬញ៉ាំអាហារមិនល្អចំពោះសុខភាព ឬញ៉ាំអាហារច្រើនជ្រុល និងមិនសូវធ្វើសកម្មភាពរាងកាយ ដែលអ្វីទាំងនេះ គឺសុទ្ធតែជាកត្តាធ្វើឲ្យប៉ះពាល់សុខភាពបេះដូង។

ការគ្រប់គ្រងស្រ្តេសបានល្អមិនត្រឹមតែជួយដល់សុខភាពបេះដូងប៉ុណ្ណោះទេ តែក៏រួមចំណែកជួយដល់សុខភាពរាងកាយទូទៅផ្សេងទៀតផងដែរ។ ជ្រើសរើសវិធីកាត់បន្ថយស្ត្រេសបានត្រឹមត្រូវ គឺជួយដល់សុខភាពបេះដូង និងសុខភាពទូទៅ។

ប្រភព៖ mayoclinic | CDC | Hopkinsmedicine អត្ថបទ៖ ទូច សុខា