រាសីហាក់ស្រុត! ទិនហ្វី ត្រូវគេប្ដឹងទារឲ្យសង ១៣១លានដុល្លារ

2021-06-08 07:50:00
ចំនួនមតិ 0 | ចំនួនចែករំលែក 0

ដោយសារតែទីផ្សារភាពយន្តត្រូវរងការប៉ះទង្គិចខ្លាំងពីជំងឺកូវីដ ១៩ កំពូលតារាសម្ដែងហុងកុង Stephen Chow ត្រូវដៃគូសហការរកស៊ីប្ដឹងទារសំណងរាប់រយលានដុល្លារ ព្រោះគ្មានចំណេញ។

កាលពីថ្ងៃទី ៧ ខែមិថុនាមុននេះ បណ្ដា្ព័ត៌មាន Faren Magazine បានរាយការណ៍ថា តុលាការអន្តរជាតិហុងកុង កំពុងតែទទួលសំណុំរឿងប្ដឹងផ្ដល់របស់ក្រុមហ៊ុនកម្សាន្ត New Culture Media ដែលមានទីស្នាក់ការនៅទីក្រុងសៀងហៃ ប្រទេសចិន ជាមួយតារាសម្ដែងប្រុសជើងចាស់ Stephen Chow។

តាមពាក្យបណ្ដឹងរបស់ដើមចោទ ក្រុមហ៊ុនខាងលើបានទិញ ភាគហ៊ុន៤០% ពីក្រុមហ៊ុន PDAL របស់ទិនហ្វី កាលពីឆ្នាំ២០១៦។ ភាគីទាំងសងខាងបានធានាភាគីទិញភាគហ៊ុននឹងចំណេញក្នុងរយៈពេល៤ឆ្នាំ ទោះបីជាមានរឿងអ្វីកើតឡើងក៏ដោយ។

៣ឆ្នាំដំបូង ភាគីទាំងសងខាងនៅតែសហការគ្នាជាធម្មតា ដល់ឆ្នាំ២០២០ ក្រុមហ៊ុនខាងលើបានឲ្យដឹងថា តារាប្រុសអាយុ ៥៩ឆ្នាំ បានរំលាយកិច្ចសន្យាដោយឯកត្តោភាគី ធ្វើឲ្យក្រុមហ៊ុននេះខាតអស់ជាច្រើន។ អាស្រ័យហេតុនេះហើយ ភាគីនេះបានប្ដឹងតួរឿងស្តេចល្បែងទិនហ្វី ទារសងជំងឺចិត្ត ១៣១លានដុល្លារ។

មុននោះដែរ កាលពីខែ កុម្ភៈឆ្នាំនេះ ទិនហ្វី បានប្ដឹងក្រុមហ៊ុនខាងលើដូចគ្នា ដោយលើកហេតុផលថា ក្រុមហ៊ុននេះ មិនទាន់សង ២៨.១លានដុល្លារ ថ្លៃទិញភាគហ៊ុននោះទេ។ គួរបញ្ជាក់ផងដែរថា ចាប់តាំងពីឆ្នាំ ២០១៦ មកទល់ពេលនេះ ពោលគឺក្រោយរឿង The Mermaid ស្នាដៃក្រោយៗរបស់តារារូបនេះ ភាគច្រើនបានត្រឹមមួយរួចខ្លួន ឬចំណេញតិចតួចបំផុត ដែលធ្វើឲ្យអ្នកវិនិយោគស្រែកគ្រប់គ្នា៕

ប្រភព៖ vnexpress ប្រែសម្រួល៖ Caramel