ទារកកើតមកចេះតែយំពេលយប់និងឆេវឆាវ មកពីអំឡុងពពោះអ្នកម្តាយមើលស្រាលលើរឿងនេះ

2021-01-19 00:00:00
ចំនួនមតិ 0 | ចំនួនចែករំលែក 0

អំឡុងពពោះ ទម្លាប់មួយចំនួនដែលមិនត្រឹមត្រូវ ពិតជាជះឥទ្ធិពលយ៉ាងខ្លាំងដល់សុខភាពទារក។ ស្ត្រីមានផ្ទៃពោះដែលតែងចូលគេងយប់ជ្រៅ ឬគេងតិចម៉ោងពេក បង្កហានិភ័យដល់ទារកដូចជា៖

រូបតំណាង

**១. ងាយកើតជំងឺវិកលចរិតកុមារ**

ពេលដែលចូលគេងយឺតពេក ប្រព័ន្ធជីវសាស្ត្រក្នុងខ្លួនរបស់អ្នកម្ដាយចាប់ផ្ដើមប្រែប្រួលនិងរំខានដល់អរម៉ូន ដែលជះឥទ្ធិពលដល់មេតាបូលីសឹមក្នុងរាងកាយផងដែរ។ ភាពមិនស្រួលដែលកើតឡើងក្នុងប្រព័ន្ធឈមរត់និងប្រព័ន្ធរំលាយអាហារ ជះផលអាក្រក់និងមិនល្អទាល់តែសោះដល់ការវិវត្តរបស់ទារក។

២. បណ្ដាលឲ្យអ្នកម្ដាយស្លេកស្លាំង

ចាប់ពីម៉ោង៩ យប់ទៅ រាងកាយនិងសរីរាង្គខាងក្នុងត្រូវការសម្រាក។ ហើយចាប់ពីម៉ោង ១១យប់ ដល់៣ភ្លឺ ប្រព័ន្ធរាងកាយនឹងផលិតឈាម ថ្លើមនិងទឹកប្រមាត់ឡើងវិញ។ ដូច្នេះ នៅពេលស្ត្រីមានផ្ទៃពោះមិនបានចូលគេងឲ្យគ្រប់គ្រាន់ នឹងងាយកើតអាការៈស្លេកស្លាំងព្រមទាំងទារកថែមទៀត។

រូបតំណាង

៣. ពេលកូនកើតមក មានការលូតលាស់យឺត

ផលវិបាកដែលអ្នកម្ដាយចូលគេងក្រោយម៉ោង១១យប់ មិនត្រឹមប៉ះពាល់សុខភាពខ្លួនឯងទេ ថែមទាំងដល់ទារកនៅពេលគេកើតមកទៀតផង ។ ដោយសារតែមិនបានស្រូបយកជីវជាតិគ្រប់គ្រាន់ខណៈនៅក្នុងផ្ទៃ ធ្វើឲ្យគេកើតមកទម្ងន់មិនគ្រប់ លូតលាស់យឺតខាងផ្នែករាងកាយ និងមិនសូវរហ័សរហួន។

រូបតំណាង

៤. ទារកតែងយំនិងពិបាកលួងនៅពេលយប់

នៅពេលដែលគេកើតមក ផ្លូវចិត្តមានភាពឆេវឆាវ និងឧស្សាហ៍យំបំផុត ជាពិសេសតែងរករឿងនៅពេលយប់។ ដូច្នេះ បើអ្នកម្ដាយទាំងឡាយចង់ឲ្យទារកមានសុខភាពផ្លូវចិត្តល្អ និងមិនលំបាកខ្លួនដោយសារតែកូនពិបាកលួង សូមបញ្ឈប់ទម្លាប់ចូលគេងនៅពេលយប់ជ្រៅទៅ។

៥. អ្នកម្ដាយងាយនឹងឆ្លងជំងឺផ្ដាសាយ

អ្នកជំនាញនិយាយថា អំឡុងមានផ្ទៃពោះ ពេលស្ត្រីចូលគេងក្រោយម៉ោង១១យប់ ងាយធ្វើឲ្យប្រព័ន្ធការពារចុះខ្សោយយ៉ាងខ្លាំង។ វាធ្វើឲ្យអរម៉ូនប្រែប្រួល បូករួមនឹងប្រព័ន្ធភាពស៊ាំចុះខ្សោយទៀត ធ្វើឲ្យស្រ្តីឆាប់ឆ្លងជំងឺផ្ដាសាយជាទីបំផុត។

៦. អារម្មណ៍មិនល្អ

អ័រម៉ូនបានប្រែប្រួល ជាហេតុប៉ះទង្គិចដល់ស្ថានភាពផ្លូវចិត្តឲ្យមានអារម្មណ៍មិនស្ងប់ ឆាប់ខឹង ងាយភ្លេច និងគិតច្រើនរវើរវាយ។ ដោយសារតែផ្លូវចិត្តរបស់ម្ដាយផ្សារភ្ជាប់ជាមួយទារកក្នុងផ្ទៃ ដូច្នេះធ្វើឲ្យជះផលអាក្រក់ដល់ការលូតលាស់របស់ទារកដែរ។

រូបតំណាង

៧. អ្នកម្ដាយតែងហត់អស់កម្លាំង និងជួនកាលអាចប៉ះពាល់អាយុជីវិត

ដោយសារតែចូលគេងយប់ជ្រៅពេក ម្ល៉ោះហើយនៅពេលព្រឹកស្ត្រីមានផ្ទៃពោះនឹងហត់ អស់កម្លាំងពេញមួយថ្ងៃតែម្ដង។ បន្ថែមពីនេះ អ្នកម្ដាយក៏ប្រឈមនឹងបញ្ហាស្បែកខ្មៅស្រអាប់ ជ្រីវជ្រួញថែមទៀត។ មិនទាន់អស់ទេ ព្រលឹងនិងកាផ្ចង់លើអ្វីមួយក៏មិនបានល្អ ព្រមទាំងមានអារម្មណ៍មិនសូវសប្បាយចិត្ត និងថប់អារម្មណ៍។ រាងកាយវិញក៏ចុះខ្សោយ ហើយគ្មានផលល្អទាល់តែសោះដល់ទារកក្នុងផ្ទៃ។

រូបតំណាង

ទម្លាប់ជីវសាស្ត្ររបស់ទារកចាប់ផ្ដើមមានតាំងពីគេនៅក្នុងស្បូន ដូច្នេះចូលគេងយប់ពេក ក្រោកពីព្រឹកជ្រុលពេកសុទ្ធតែជះឥទ្ធិពលដល់ទារក។ ការសិក្សាបង្ហាញថា បើម្ដាយមានទម្លាប់ចូលគេងពេលយប់បានទៀងទាត់ ព្រមទាំងគេងលក់ស្កប់ស្កល់ក៏ជួយទារកពេលកើតមក មានទម្លាប់គេងនិងទម្លាប់បៅបានល្អ ផងដែរ។ ដូច្នេះ ស្ត្រីមានផ្ទៃពោះទាំងអស់ត្រូវប្រាកដថាបានចូលគេងគ្រប់៨ម៉ោងក្នុងមួយយប់៕

ប្រភព៖ kenhphunu ប្រែសម្រួល៖ លឹម សុនា