សារភាពស្នេហ៍ថ្ងៃ countdown លើកំពូលភ្នំ គូស្នេហ៍មួយធ្លាក់ចុះ ត្រូវសង្គ្រោះបន្ទាន់
- 2021-01-05 12:30:00
- ចំនួនមតិ 0 | ចំនួនចែករំលែក 0
សារភាពស្នេហ៍ថ្ងៃ countdown លើកំពូលភ្នំ គូស្នេហ៍មួយធ្លាក់ចុះ ត្រូវសង្គ្រោះបន្ទាន់
ការសារភាពស្នេហ៍ដ៏រ៉ូមេនទិកមួយ បានប្រែទៅជាព្រឹត្តិការណ៍ដ៏សោកសៅ នៅពេលគូស្នេហ៍មួយគូបានរមៀលពីលើកំពូលភ្នំមក។ ហេតុការណ៍ដ៏គួរឲ្យចាប់អារម្មណ៍ខាងលើត្រូវបានកើតឡើងនៅថ្ងៃទី ៣១ ខែធ្នូកន្លងទៅនេះ នៅទីក្រុង Falkert ប្រទេស Austria។ តាមនោះដែរ ដើម្បីធ្វើឲ្យមិត្តស្រីមានភាពភ្ញាក់ផ្អើល ខាងប្រុសអាយុ ២៧ឆ្នាំ បានហៅមិត្តស្រីរបស់ខ្លួនអាយុ ៣២ឆ្នាំ ដើរឡើងកំពូលភ្នំដើម្បីសុំរៀបការ។
ប្រហែលជាមកពីទប់អារម្មណ៍មិនបាន នៅពេលខាងស្រីឆ្លើយថា “អូនយល់ព្រម” ក៏លោតកន្ទ្រប់ហើយធ្វើឲ្យនាងរអិលជើងរមៀលចុះជាង២០០ម៉ែត្រ។ ពេលឃើញដូចនេះ ខាងប្រុសក៏ហក់ទៅចាប់មិត្តស្រី តែដោយសារតែព្រិលរអិលពេក បានធ្វើឲ្យលោករមៀលចុះទៅដែរ។
ពេលធ្លាក់ដល់ជើងភ្នំ ខាងស្រីបានសន្លប់បាត់ស្មារតី ឯខាងប្រុសមិនអីដោយសារទើនៅលើផ្ទាំងថ្មមួយ។ នៅពេលមកដល់បន្ទប់សង្គ្រោះបន្ទាន់ ខាងប្រុសត្រូវស្រាំឆ្អឹងជំនី ឯខាងស្រិទោះបីជាសន្លប់ក៏ពិតមែន គ្រាន់តែត្រូវរបួសសើស្បែកប៉ុណ្ណោះ។ ប៉ូលិសក្នុងតំបន់បានឲ្យដឹងថា សំណាងល្អគូស្នេហ៍ខាងលើរមៀលចុះមកចំពេលមានព្រិលច្រើន បើពុំដូចនោះទេ របួសអាចធ្ងន់ជាងនេះឆ្ងាយណាស់៕