ព្យាយាមសម្រកទម្ងន់ស្រល់ត្រឹម ៣៤គីឡូ ព្រោះមិត្តប្រុសចូលចិត្តរាងស្គម ចុងបញ្ចប់គេមានស្រីថ្មី
- 2020-04-02 03:25:00
- ចំនួនមតិ 0 | ចំនួនចែករំលែក 0
ព្យាយាមសម្រកទម្ងន់ស្រល់ត្រឹម ៣៤គីឡូ ព្រោះមិត្តប្រុសចូលចិត្តរាងស្គម ចុងបញ្ចប់គេមានស្រីថ្មី
នារីឈ្មោះ Liu Ye ខ្លួនប្រាណនៅពេលនេះសល់ត្រឹមស្បែកដណ្ដប់ឆ្អឹង ដោយសារតែចង់បានរូបរាងដែលសង្សារពេញចិត្ត។
នារីមកពីប្រទេសចិនឈ្មោះ Liu Ye បានប្រឹងសម្រកគីឡូពី ៧០ សល់ត្រឹម៣៤ប៉ុណ្ណោះ។ បង្ហាញខ្លួនក្នុងកម្មវិធី Confess Now នារីរូបនេះបានឲ្យដឹងថា នៅពេលនេះ នាងចង់បានត្រឹមមង្គលការសាមញ្ញមួយប៉ុណ្ណោះ។
តាមនោះដែរ នារីវ័យ៣០ឆ្នាំ បានឲ្យដឹងថា កាលពីមុននាងធ្លាប់មានទម្ងន់ដល់ទៅ ៧០គីឡូ ហើយដោយសារតែ មិត្តប្រុសចូលចិត្តនារីរាងស្គម នាងបានប្រឹងសម្រកសល់ត្រឹមតែ៣៤គីឡូប៉ុណ្ណោះ។ មើលឃើញរូបរាងនាងពេលបច្ចុប្បន្ន អ្នកណាក៏អាណិតអាសូរដែរ តែសាមីខ្លួនផ្ទាល់ប្រាប់ថា នាងគ្មានបញ្ហាទេ ដោយនាងលើកឡើងថា នាងមិនរងផលប៉ះទង្គិចដោយសម្ដីអ្នកជុំវិញឡើយ។ នាងប្រាប់ថា កាន់តែស្គម មិត្តរបស់នាងនឹងកាន់តែស្រលាញ់នាងជាងមុន។
គួរឲ្យសោកស្ដាយ ខុសពីការរំពឹងរបស់ខ្លួន មិត្តប្រុសក្នុងកម្មវិធី Confess Now មិនបានសារភាពស្នេហ៍ប្រាប់នាងឡើយ។ ដោយលោក Xiao Yan បានប្រាប់ថា៖ រវាងលោក និងនាងតាមការពិតគ្រាន់តែជាមិត្តអនឡាញប៉ុណ្ណោះ ហើយនៅស្រុកកំណើត ការពិតលោកមានសង្សាររួចហើយ ហើយពួកគេក៏ជិតរៀបការនឹងគ្នាដែរ។ សូមនាងកុំដោយសារតែគេ ហើយសម្រកទម្ងន់ទៀតអី មានតែធ្វើបាបខ្លួនឯងប៉ុណ្ណោះ។ កាលពីមុន នៅពេលជួបគ្នា នាងថា នាងមានទម្ងន់៤០គីឡូ នាងបានធ្វើឲ្យខ្ញុំភ័យម្ដងរួចហើយ ព្រោះមើលនាងមិនខុសពីគ្រោងឆ្អឹងឡើយ។ តែពេលនេះ ឮថានាងនៅសល់ត្រឹមតែ៣៤គីឡូប៉ុណ្ណោះ ខ្ញុំរឹតតែមិនហ៊ានជួបនាង។ មានប៉ុណ្ណា ខ្ញុំនិយាយចេញអស់ហើយ សង្ឃឹមថានាងនឹងភ្លេចខ្ញុំបាន។ ពីមុនខ្ញុំថា ខ្ញុំមិនអាចទៅជួបនាងបានដោយសារខ្ញុំរវល់មែនទេ តាមការពិតមិនមែនខ្ញុំរវល់ទេ គ្រាន់តែមកពីមិត្តស្រីខ្ញុំតាមខ្ញុំជាប់ពេក មិនអាចឆ្លៀតបាន។ ពេលនេះលែងជាអីនឹងគ្នាហើយ ខ្ញុំប្រាប់នាងត្រង់តែម្ដងទៅ តាមការពិតខ្ញុំយកចិត្តទុកដាក់នឹងនាងក៏ដោយសារនាងមានលុយដែរ។ សូមទោសផង”។
ក្រោយពេលកម្មវិធីនេះត្រូវបានចាក់បញ្ចាំង មនុស្សជាច្រើនបានសម្ដែងក្ដីអាណិតចំពោះ Liu Ye ជាខ្លាំងដែលបានដាក់ចិត្តលើមនុស្សប្រុសខុស ហើយសង្ឃឹមថានាងនឹងបំប៉នខ្លួនឯងឲ្យមានសាច់មានឈាមវិញ៕