កែវ វាសនា ថា ភរិយាលោកពូកែលើការរកស៊ីអនឡាញ ទើបមានបានលឿនយ៉ាងនេះ

2020-01-18 04:56:19
ចំនួនមតិ 0 | ចំនួនចែករំលែក 0

ទោះបីជា ការងារសិល្បៈមានជាបន្តបន្ទាបស្ទើរតែគ្មានថ្ងៃសម្រាកបែបណាក្ដី តារាចម្រៀង លោក កែវ វាសនា បានសារភាពថា ចំណូលពីការងារសិល្បៈរបស់ខ្លួន បើប្រៀបធៀបជាមួយប្រពន្ធវិញ គឺខ្លួន សូមសារភាពថា ប្រពន្ធលោកខ្លាំងខាងរកស៊ីតាមអនឡាញនេះ និងអាចរកចំណូលបានច្រើនជាងលោកដាច់។

នេះជាការលើកឡើង របស់តារាចម្រៀង លោក កែវ វាសនា ចំពោះមុខអ្នកសារព័ត៌មាន ក្នុងថ្ងៃបើកសម្ពោធហាងជូនប្រពន្ធកាលពីពេលថ្មីៗនេះ។

ពួកគេទាំងពីរ មិនបានបញ្ចេញទូរលេខលំអិតណាមួយឡើយជុំវិញចំណូលនេះ ដោយគ្រាន់តែ ភាគីខាងប្ដីសារភាពភាពថា ប្រពន្ធលោករកបានច្រើនជាង ត្បិតអីនាងចេះបង្កើតកម្លាំងលក់(អ្នកទទួលសិទ្ធិចែកចាយបន្ត) ដែលមកដល់ពេលនេះ ប្រពន្ធលោកមានអ្នកទទួលលក់បន្តរហូតដល់រាប់ពាន់អ្នក ក្នុងរយៈពេលខ្លីប៉ុណ្ណោះ ដែលនេះគឺប្រភពចំណូលធំបំផុត សម្រាប់គ្រួសារ។

ដំបូងឡើយ ប្រពន្ធ លោក កែវ វាសនា គ្រាន់តែជាអ្នក Live វីដេអូ លក់ផលិតផលធម្មតាៗនៅផ្ទះ បន្ទាប់ពីទំនេរពីការងារប៉ុណ្ណោះ ប៉ុន្តែដោយភាពជឿជាក់របស់ អតិថិជន ធ្វើឲ្យមុខជំនួញមួយនេះ កាន់តែជោគជ័យជាបន្តបន្ទាប់ រហូតកាលពីពេលថ្មីៗនេះ ពួកគេទាំងពីបានសម្រេចបើកក្រុមហ៊ុនផ្ទាល់ខ្លួនឈ្មោះ chy chy lim co.ltd នាំចូលផលិតផលពីក្រៅប្រទេស ក្រោមទុនវិនិយោគ ជិត៣០ម៉ឺនដុល្លារឯណោះ។ មិនត្រឹមតែប៉ុណ្ណោះ មុនថ្ងៃសម្ពោធ ពួកគេទាំងពីរបានទិញ រថយន្តLexus 570 ស៊េរី2020ថ្មីស្រឡាងថែមទៀតផង និងបានទិញផ្ទះជាច្រើនកន្លែងទៀត។

ជាមួយនឹងភាពវ័យឆ្លាតក្នុងការរកស៊ីនេះ ឯកឧត្ដម នាយឧត្ដមសេនីយ៍ មៀច សុផាន់ណា រដ្ឋលេខាធិការក្រសួងមហាផ្ទៃ នឹងជាប្រធានគណៈធម្មាធិការប្រយុទ្ធ ប្រឆាំងផលិតផលក្លែងក្លាយ ដែលជាភ្ញៀវកិត្តិយសក្នុងថ្ងៃកាត់ខ្សែបូសម្ពោធហាងរបស់អ្នកទាំងពីរ ក៏បានសរសេរសើចំៗ ទៅភរិយា តារាចម្រៀងរូបនេះដែរ។ ឯកឧត្តមសរសើរចំៗថា តារាចម្រៀងលោក កែវ វាសនា ពិតជាសំណាងណាស់ ចេះរកបាន ប្រពន្ធស្អាត ហើយពូកែរកស៊ីថែមទៀត។

តារាចម្រៀងល្បីឈ្មោះរូបនេះបានបន្តលើកឡើងទៀតថា ដោយសារតែមុខជំនួញរបស់ប្រពន្ធកាន់តែទទួលការគាំទ្រខ្លាំងឡើងៗ លោកមិនអាចឈរមើលបានឡើយ ជាមេគ្រួសារត្រូវតែចេញមុខជួយ ដូចជា ការចេញទៅកម្មង់អីវ៉ាន់ពីរោងចក្រ និងការសម្របសម្រួល លើកិច្ចការជាច្រើនទៀត។

ត្រង់ចំណុចនេះ កែវ វាសនា បានសារភាពថា ជាហេតុធ្វើឲ្យការងារសិល្បៈរបស់ខ្លួនរាងទម្លាក់ដៃបន្តិច ប៉ុន្តែបែបនេះក្ដី លោកមិនទម្លាក់ចោលទាំងស្រុងឡើយ គឺលោកនៅតែបន្តការច្រៀងតាមខនស៊ីត ជាហូរហែ ហើយបទចម្រៀងថ្មីក៏កំពុងតែសម្រុកផលិតជាបន្តបន្ទាប់ដែរ៕

អត្ថបទ៖ ទារិកា