នារីទាន់សម័យពិតប្រាកដ គឺហ៊ានចាកចេញពីស្រមោលអតីតដែលជាស្នេហាក្លែងក្លាយ

2020-01-02 09:35:00
ចំនួនមតិ 0 | ចំនួនចែករំលែក 0

ខ្ញុំបានស្រលាញ់គ្នាជាមួយគាត់អស់ពេល៥ឆ្នាំហើយ។ អាចថានេះជាពេលវេលាយូរគួរសមដែរ សម្រាប់នារីវ័យក្មេងដូចជាខ្ញុំ។ ពួកយើងបានស្រលាញ់គ្នាដំបូង តាំងពីនៅរៀនវិទ្យាល័យម្ល៉េះ។ ស្នេហារបស់ពួកយើង ពេលខ្លះរីកស្គុះស្គាយដូចផ្កាត្រូវសន្សើមនាពេលព្រលឹម តែពេលខ្លះវិញដូចព្រះអាទិត្យកំពុងរះនៅម៉ោង១២ថ្ងៃត្រង់ដូច្នោះដែរ។

រូបតំណាង

យ៉ាងណា វានៅតែជាស្នេហា ដែលពួកយើងមិនអាចចោលគ្នាបាន។ គ្រប់យ៉ាងវាមិនល្អទាំងអស់ទេ ប៉ុន្តែខ្ញុំមានអារម្មណ៍សប្បាយចិត្តដែលបានឆ្លងកាត់ជីវិតស្នេហា ក្នុងភាពជាយុវវ័យបែបនេះ។

ស្គាល់គាត់ ខ្ញុំបានទទួលរសជាតិការយកចិត្តទុកដាក់ ទៅមើលកុន ដើរលេងបោះតង់តាមខេត្ត ហើយរាល់ល្ងាចថ្ងៃសៅរិ៍ គាត់តែងនាំខ្ញុំទៅញ៉ាំអីខាងក្រៅ។ ទាំងនេះ មើលទៅសាមញ្ញទេ ប៉ុន្តែពួកយើងទាំងពីរចង់បានគ្រប់យ៉ាងសាមញ្ញបែបនេះតាមដែលអាចទៅរួច។

រូបតំណាង

ខ្ញុំនៅចាំបានថា គាត់បានផ្តិតរូបថតរបស់យើងពីរនាក់ដាក់ក្នុងស៊ុមមួយអមជាមួយឃ្លាផ្អែមល្ហែមជាច្រើន។ លើសពីនេះ គាត់បានឲ្យស្មាខ្ញុំផ្អែកបង្ហូរទឹកភ្នែក នៅពេលខ្ញុំរកការងារមិនទាន់បាន។ ខ្ញុំធុញ ខ្ញុំសប្បាយចិត្ត ឬកើតទុក្ខ គ្រប់អារម្មណ៍ទាំងអស់គឺខ្ញុំចែករំលែកជាមួយគាត់គ្រប់ពេល។ ខ្ញុំយល់ថា គាត់ជាមនុស្សប្រុសមានស្មាដ៏រឹងមាំម្នាក់ដែលអាចឲ្យខ្ញុំផ្អែកបានយ៉ាងកក់ក្តៅ មិនថាពេលពិបាកចិត្ត ឬហត់នឿយឡើយ។

រូបតំណាង

រឿងរ៉ាវស្នេហាអាយុកាល៥ឆ្នាំរបស់ពួកយើង មើលទៅពិតជាស្រស់ស្អាតនិងអាចកាន់ដៃគ្នាចូលរោងការបានដោយសុវត្ថិភាព។ នរណាក៏គិតបែបនេះ រួមទាំងខ្ញុំខ្លួនឯងក៏អ៊ីចឹងដែរ។ ខ្ញុំបានរៀបចំរឿងរ៉ាវជាច្រើន ខ្ញុំបានព្យាយាមដាំដុះនិងថែរក្សាស្នេហានេះប្រៀបដូចអាយុជីវិតខ្លួនឯងអ៊ីចឹង។ ប៉ុន្តែដូចពាក្យគេថា មនុស្សគិតមិនដូចទេវតាគិត។ គ្រប់យ៉ាងវាចេញមកមិនដូចការរំពឹងទុកឡើយ។

គាត់បានជួបនារីម្នាក់ផ្សេងទៀត ហើយពូកគេស្រលាញ់គ្នាណាស់។ គាត់ប្រែជាមនុស្សឈាមត្រជាក់ ហើយសុំបែកគ្នាជាមួយខ្ញុំនៅយប់មួយក្នុងរដូវរងា។ ប្រហែលគ្មាននរណាខុសទេ ក្នុងរឿងនេះ ព្រោះព្រហ្មលិខិតជាអ្នកកំណត់វាសនាឲ្យពួកគេបានជួបគ្នាហើយចាប់ចិត្តលើគ្នាបែបនេះ។

រូបតំណាង

ស្នេហាអាយុ៥ឆ្នាំ តើឲ្យខ្ញុំបំភ្លេចដូចម្តេចទៅ? មានទាំងភាពយុវវ័យ ការរីករាយ ទុក្ខសោក គឺគ្រប់រសជាតិ។ ខ្ញុំទទួលស្គាល់ថា គាត់ជាបុរសល្អបំផុតដែលខ្ញុំមិនធ្លាប់ជួបកន្លងមក ហើយគាត់ក៏ជាបុរសម្នាក់ដែលបំផ្លាញខ្ញុំយ៉ាងសាហាវបំផុតដូចគ្នា។ គ្រប់យ៉ាងហាក់ដូចជាមានតិចណាស់សម្រាប់ខ្ញុំនៅពេលនេះ។ ខ្ញុំគ្មានកម្លាំងចិត្តសូម្បីតទល់នឹងមនុស្សគ្រប់គ្នា រួមទាំងខ្លួនឯងផងដែរ។

រូបតំណាង

ខ្ញុំស្អប់ពេលយប់ខ្លាំងបំផុត។ ខ្ញុំតែងតែបើកមើលសារចាស់ៗ រូបថតពួកយើងពីមុន ខ្ញុំគ្មានសេចក្តីក្លាហានបំភ្លេចអនុស្សាវរីយ៍ផូរផង់ទាំងនោះចោលទេ។ នេះពិតជាការលំបាកមួយ ដើម្បីទទួលស្គាល់ថាស្នេហានេះបានបញ្ចប់ហើយ។ ស្នេហាដែលបានបំពេញគ្រប់យ៉ាងក្នុងភាពជាយុវវ័យរបស់ខ្ញុំ ប៉ុន្តែអតីតកាលគ្រាន់ជាអតីតកាល ខ្ញុំត្រូវបញ្ចប់ស្នេហានេះ ហើយបើកចិត្តទទួលយកអ្នកថ្មី៕