ខ្សែសាកទូរសព្ទខូចយកស្កុតមករុំ នារី១៧ឆ្នាំម្នាក់ត្រូវភ្លើងឆក់ស្លាប់នៅនឹងកន្លែង
- 2019-11-14 03:55:00
- ចំនួនមតិ 0 | ចំនួនចែករំលែក 0
ខ្សែសាកទូរសព្ទខូចយកស្កុតមករុំ នារី១៧ឆ្នាំម្នាក់ត្រូវភ្លើងឆក់ស្លាប់នៅនឹងកន្លែង
ការលាចាកលោករបស់នារីវ័យក្មេងម្នាក់បានធ្វើឲ្យគេព្រួយបារម្ភជាខ្លាំងក្នុងការប្រើប្រាស់គ្រឿងអេឡិចត្រូនិច ទាំងមិនទាន់មានចំណេះដឹងច្បាស់លាស់។
មុននេះបន្តិច បណ្ដាញព័ត៌មាន Dailymail បានរាយការណ៍ថា នារីម្នាក់វ័យ១៧ឆ្នាំ ឈ្មោះ Nong Ying មកពីខេត្ត Chaiyaphum ប្រទេសថៃបានស្លាប់ភ្លាមៗនៅកន្លែងដោយសារឆក់ខ្សែភ្លើង។ មុននោះដែរ នារីរូបនេះបានប្រើទូរសព្ទបណ្ដើរ និងសាកថ្មបណ្ដើរ។ យ៉ាងណាក្ដី ខ្សែសាករបស់នារីអភ័ព្វបានរបក ហើយនាងបានយកស្កុតមករុំដើម្បីប្រើបន្ត។
ប៉ុន្មានម៉ោងក្រោយមក ម្ដាយរបស់ Nong អាយុ៤៧ឆ្នាំ បានត្រលប់មកវិញឃើញកូនគេងនៅមួយកន្លែង ហើយស្មានតែកូនកំពុងគេង។ តែនៅពេលប៉ះខ្លួន លោកស្រីត្រូវឆ្លងភ្លើង ទើបដឹងថាកូនខ្លួនត្រូវភ្លើងឆក់ស្លាប់។ យោងតាមប៉ូលិស ក្នុងតំបន់ លោក Khanti Peansoognern បានឲ្យដឹងថា ជនរងគ្រោះរលាកដៃឆ្វេងដែលជាដៃកាន់ទូរសព្ទ។ មូលហេតុនៃការស្លាប់គឺបណ្ដាលមកពីខ្សែសាកត្រូវដាច់ចេញក្រៅ ហើយនាងបានជ្រុលដៃទៅប៉ះខ្សែនេះ បណ្ដាលឲ្យឆក់ដល់ស្លាប់។ ក្រោយរឿងនេះកើតឡើង ប៉ូលិសបានអំពាវនាវមិនឲ្យប្រើគ្រឿងអេឡិចត្រូនិចដែលដាច់ខ្សែ ឬខូចនោះឡើយ ព្រោះអាចឆក់យកអាយុជីវិតយើងគ្រប់ពេលវេលា៕
ចុចអាន៖ វិធីចាត់ការមិត្តភ័ក្ដិដែលបបួលមកញ៉ាំអី តែវក់វីជាមួយទូរសព្ទ