ចង់ឲ្យការផាត់មុខចែងចាំងលេចធ្លោ កុំភ្លេចហាយឡាយ ៥ ចំណុចនេះ

2019-10-10 10:35:00
ចំនួនមតិ 0 | ចំនួនចែករំលែក 0

តិចនិកសំខាន់ដែលអាចជួយឲ្យការផាត់មុខ មានភាពស្រស់ស្អាតទាក់ទាញ គឺការបន្ថែមពណ៌ហាយឡាយចែងចាំងភ្លឺភ្លេកទៅលើចំណុចសំខាន់ៗនៃផ្ទៃមុខ។ ចំណុចទាំងនោះដែរ អាចជួយរំលេច លើកសម្រស់ឲ្យលេចធ្លោមួយកម្រិតទៀត។

១. ហាយឡាយត្រង់ផ្នែក ថ្ងាស

នេះជាគន្លឹះល្អសម្រាប់អ្នកដែលមានថ្ងាសចង្អៀត ព្រោះវានឹងជួយបង្ហាញឲ្យទម្រង់ថ្ងាសមើលទៅស្រឡះស្អាត ដោយគ្រាន់តែយកហាយឡាយមកផាត់ត្រង់បរិវេណកណ្តាលថ្ងាសជាការស្រេច។

២. ហាយឡាយត្រង់ផ្នែក ខ្ទង់ច្រមុះ

មិនចាំបាច់ទៅវះកាត់ក៏បានដែរ គ្រាន់តែប្រើជក់ដើម្បីវាយស្រមោលទាំងសងខាង និងបន្ថែមហាយឡាយនៅលើខ្ទង់ច្រមុះ ដោយផាត់ពីខ្ទង់ខាងលើអូសចុះមកដល់ចុងច្រមុះ នោះអ្នកនឹងទទួលបានខ្ទង់ច្រមុះដែលទាក់ទាញភ្លាមៗ។

៣. ហាយឡាយត្រង់ផ្នែក ឆ្អឹងថ្ពាល់

ត្រង់នេះជាចំណុចសំខាន់ខ្លាំងណាស់ ព្រោះការផាត់នៅលើងថ្ពាល់ ទាំងសងខាង នឹងជួយឲ្យថ្ពាល់មើលទៅរលោងចែងចាំង បែបធម្មជាតិ តាមស្ទីលកូរ៉េ ជាពិសេសវាអាចធ្វើឲ្យលេចចេញទម្រង់មុខក្មេងជាងវ័យ។

៤. ហាយឡាយត្រង់ផ្នែកខាងក្រោម ចុងចិញ្ចើម

ចំណុចមួយនេះដែរ ជាអ្វីដែលអ្នកមិនគួរមើលរំលងដូចគ្នា ព្រោះវាអាចជួយកែត្រូវ នូវចំណុចខ្វះខាតពេលដែលអ្នកគូររោមភ្នែក ថែមទាំងធ្វើឲ្យបរិវេណភ្នែក កាន់តែស្រស់ថ្លា ភ្លឺស្រឡះ មានមន្តស្នេហ៍ គួរឲ្យចង់គយគន់។

៥. ហាយឡាយត្រង់ផ្នែកខាងលើ គន្លាក់បបូរមាត់

ក្រៅពីភ្នែក ផ្នែកមាត់ក៏ជាកន្លែងដែលអ្នកគួរយកចិត្តទុកដាក់។ គ្រាន់តែផាត់បន្ថែមនៅលើគន្លាក់មាត់បន្តិចបន្តួច វានឹងជួយឲ្យពណ៌ក្រែមកាន់តែលេចធ្លោ និងមានបបូរមាត់ស្រស់ស្អាតគួរឲ្យស្រលាញ់៕

ចុចអានបន្ត៖ ចេញទៅក្រៅយ៉ាងហំ ជាមួយនឹងស្ទីលស្រស់ស្អាតស្រួលខ្លួន

ប្រភព៖ jelly ប្រែសម្រួល៖ ដេត ឈុនអ៉ី