ជីវិតអ្នក Single នឹងមានន័យបំផុតបើបានធ្វើរឿង ១០ យ៉ាងនេះ

2019-04-30 05:30:00
ចំនួនមតិ 0 | ចំនួនចែករំលែក 0

តាមពិតទៅ Single ក៏ជារឿងល្អម៉្យាងដែរ ប៉ុន្តែអ្នកខ្លះបែរជាមានអារម្មណ៍ថាឯកា មែនអត់? នៅពេលដែលអ្នកឃើញអ្នកផ្សេងគេស្រលាញ់គ្នា អ្នកនឹងខកចិត្តចំពោះខ្លួនឯងណាស់។ នោះហើយជាអារម្មណ៍អ្នក Single តើត្រូវដោះស្រាយបែបណាជាមួយអារម្មណ៍បែបហ្នឹង? អត់មានអីពិបាកទេ អ្នកគ្រាន់តែធ្វើរឿងទាំង ១០ នេះអ្នកមានគូឃើញហើយប្រាកដជាច្រណែនមិនខាន៖

១. រស់នៅជាមួយនឹងមនុស្សដែលអ្នកគួរតែស្រលាញ់បំផុត នោះគឺខ្លួនឯង

ដោយសារតែយើងត្រូវរស់នៅជាមួយនឹងជីវិតខ្លួនឯងឲ្យបានល្អបំផុត ហើយពេលវេលាក៏មានមិនច្រើនដែរ អ្នកត្រូវធ្វើអ្វីដែលធ្វើឲ្យជីវិតអ្នកស្រស់បំព្រងដូចជា ដើរទិញអីវ៉ាន់ ធ្វើដំណើរកម្សាន្ត ដើម្បីស្វែងរកសុភមង្គលឲ្យខ្លួនឯង មិនចាំបាច់ឲ្យអ្នកដទៃស្វែងរកឲ្យអ្នកទេ។ ជីវិត Single ត្រូវតែធ្វើអ្វីដែលអ្នកស្រលាញ់បំផុត។

២. ឧស្សាហ៍មានពិធីជំលៀង

ត្រូវចេះប្រើជីវិត ព្រោះថា Single គ្មានអ្នកណានៅចាំប្រច័ណ្ឌមុខក្រោយទេ អ៊ីចឹងហើយគួរតែចូលរួមពិធីជប់លៀងឲ្យបានសប្បាយជាមួយសម្លាញ់ៗរបស់អ្នក។ មិនថាអ្នកទៅរាំ ច្រៀង ឬ ផឹកទេ កុំបារម្ភព្រោះថាគ្មាននរណាដេកចាំទូរសព្ទ និងចាំចាប់កំហុសអ្នកទេ។ សប្បាយម៉ាអស់ដៃទៅ។

៣. និយាយជាមួយអ្នកណាក៏បាន

ត្រូវហើយអ្នកគួរតែនិយាយជាមួយអ្នកគ្រប់គ្នា ព្រោះអ្នកមិនមានម្ចាស់បេះដូងដែលនៅចាំហាមមិនឲ្យនិយាយជាមួយអ្នកនេះ អ្នកនោះដែរ។ អ្នកអាចលេងសើចធម្មតាជាមួយអ្នកក៏បាន ពេលដែលអ្នកស្ថិតក្នុងនាមជាមិត្តភក្តិ ឬ បងប្រុស តែគេនៅតែយកចិត្តទុកដាក់និងបារម្ភពីអ្នក នោះជាឱកាសដែលអ្នកអាចពិសោធន៍ពួកគេ ហើយអាចស្វែងរកបុរសដែលស័ក្ដិសមម្នាក់មកធ្វើជាមិត្តប្រុសបាន។

៤. ញ៉ាំអ្វីដែលអ្នកចង់ញ៉ាំ

ដោយសារតែវាជាជីវិតយើង ហើយលុយក្នុងកាបូបក៏ជារបស់យើងដូចគ្នា។ ជឿថានារីៗគ្រប់គ្នាមានក្ដីសុខបំផុតនៅពេលដែលនាងបានញ៉ាំអាហារដែលឆ្ងាញ់ ហើយអ្វីដែលសំខាន់គឺមិនចាំបាច់ខ្លាចធាត់ ហើយមិនចាំបាច់មានអ្នកអង្គុយចាំពេលញ៉ាំដែរ។

៥. ធ្វើខ្លួនឯងឲ្យល្អបំផុត

ការធ្វើជាខ្លួនឯងគឺជាសុភមង្គលដ៏ពិតប្រាកដមួយ ដោយសារអ្នកមិនចាំបាច់ត្រូវផ្លាស់ប្ដូរខ្លួនឯងដើម្បីនរណាឡើយ។ ពេលអ្នកកាន់តែនៅ single អ្នកកាន់តែអាចធ្វើជាខ្លួនឯង ។ អាចមានពេលធ្វើរឿងឆ្កួតៗ មានពេលសប្បាយ អាចបើកចម្រៀងឮៗហើយរាំតាមចិត្ត។

៦. ស្វែងរក និងសាកល្បងម្ហូបឆ្ងាញ់ៗ

បើសិនជាអ្នកដែលចូលចិត្តស្វែងរក និងចង់សាកល្បងម្ហូបឆ្ងាញ់ អ្នកប្រាកដជាមានពេលច្រើន និងឱកាសច្រើនចេញទៅរកអាហារឆ្ងាញ់ៗ ហើយអ្នកអាចទៅញ៉ាំជាមួយអ្នកណាក៏បាន ព្រោះថាជាលុយរបស់អ្នកនោះអី។

៧. មានពេលសម្រាប់ធ្វើអ្វីថ្មីៗ

ជីវិត Single បានផ្ដល់ឲ្យយើងនូវរឿងជាច្រើន។ មានពេលទំនេរច្រើនសម្រាប់នឹកឃើញធ្វើអ្វីដែលថ្មី ឬក៏ធ្វើអ្វីដែលយើងចង់។ ដូចជាទៅហាត់ប្រាណយករាងឲ្យស្អាត ធ្វើខ្លួនស្អាតៗ ច្រៀង ឬធ្វើអ្វីបានច្រើនទៀត ព្រោះយើងមិនចាំបាច់ត្រូវឲ្យពេលទៅអ្នកណា អ៊ីចឹងហើយត្រូវប្រើពេលឲ្យមានតម្លៃ។

៨. ជាពេលល្អសម្រាប់រកលុយ

ដោយសារតែមិនចាំបាច់ត្រូវទិញអំណោយឲ្យអ្នកណា ហើយយើងមានពេលសន្សំលុយ ឬអាចយកទៅវិនិយោគ។ ពេលនោះហើយដែលយើងអាចអង្គុយរកលុយនិងយកប្រាក់ចំណេញបានយ៉ាងសប្បាយចិត្ត។

៩. ចំណាយពេលជាមួយគ្រួសារ

ចំណាយពេលជាមួយគ្រួសារជារឿងពិសេសបំផុតសម្រាប់អ្នក Single។ ពិតណាស់អ្នកនឹងមានពេលវេលាគ្រប់គ្រាន់សម្រាប់គ្រួសារ។ អ៊ីចឹងហើយពេលថ្ងៃឈប់សម្រាកអ្នកគួរតែឆ្លៀតពេលនាំគ្រួសារធ្វើដំណើរកម្សាន្ត ទៅស្រូបយកខ្យល់អាកាស ធ្វើបុណ្យខ្លះ ធានាថាវានឹងក្លាយជាដំណើរកម្សាន្តដែលអស្ចារ្យ។ Single មិនមែនឯកាទេ។

១០. ចំណាយពេលជាមួយមិត្តភក្តិ

ក្រៅពីគ្រួសារ នៅមានមិត្តភក្តិដែលចាំផ្ដល់សុភមង្គលឲ្យអ្នក។ បើអ្នកនៅម្នាក់ឯងមិត្តទាំងនេះនឹងមិនទុកអ្នកឲ្យនៅឯកាទេ។ ទៅជប់លៀងក៏បាន ទៅដើរលេងជាមួយក៏បាន ធ្វើរឿងឆ្កួតៗជាមួយគ្នាក៏បានបើសិនជាអ្នកមានមិត្តល្អច្រើននៅក្បែរ។ បើនៅ single អ្នកនឹងមានពេលជាមួយមិត្តច្រើន មិនចាំបាច់ពេលមិត្តបបួលត្រូវបដិសេធដោយសារមានអ្នកហាមមិនឲ្យទៅទេ៕

ចុចអាន៖ ពេលហត់ខ្លាំងពេក សូមដើរយឺតជាងមុនបន្តិច តែកុំឈប់ដើរឲ្យសោះ

ប្រភព៖ Spiceee ប្រែសម្រួល៖ ឃួន សុលីកា