កើតមកជាមនុស្ស កុំប្រឹងធ្វើល្អព្រោះតែចង់បានចំណាប់អារម្មណ៍ពីអ្នកដទៃ
- 2019-01-10 01:00:00
- ចំនួនមតិ 0 | ចំនួនចែករំលែក 0
កើតមកជាមនុស្ស កុំប្រឹងធ្វើល្អព្រោះតែចង់បានចំណាប់អារម្មណ៍ពីអ្នកដទៃ
ខំធ្វើល្អក្នុងគោលបំណងដើម្បីតែចង់បានពាក្យសរសើរពីអ្នកដទៃ មិនមែនជារឿងចាំបាច់ឡើយ។ បើយើងពិតជាមនុស្សល្អមែន អ្នកដែលដឹងច្បាស់ពីយើងជាងគេ គឺមានតែមនុស្សនៅជិតខ្លួននេះឯង។ អ្នកនៅឆ្ងាយធ្វើម្ដេចអាចយល់ទាំងស្រុង បើគេគិតថាយើងមិនល្អហើយ ទោះប្រឹងធ្វើល្អយ៉ាងណាក៏គេមិនជឿដែរ។ ចង់ជឿឬមិនជឿក៏ហីទៅ សំខាន់ទង្វើល្អរបស់យើង គឺស្តែងឡើងចេញពីបេះដូងពិត មិនមែនទុកសម្រាប់បង្អួតនរណាម្នាក់ ឬទុកបង្ហោះបង្អួតមិត្តភ័ក្តិក្នុងបណ្តាញសង្គមនោះទេ។
ពេលធ្វើល្អទោះគ្មានអ្នកដឹង ប៉ុន្តែយើងបានសប្បាយចិត្ត បានបុណ្យ មិនមែនដូចមនុស្សមួយចំនួនចូលចិត្តធ្វើពុតជាល្អនៅនឹងមុខ ខាងក្នុងផ្លែល្វាបង្កប់ដោយពិស អាចព្រួសដាក់អ្នកដទៃបង្កគ្រោះថ្នាក់បានគ្រប់ពេលវេលា។
មនុស្សមានទឹកចិត្តល្អពិតប្រាកដ គេមិនទាមទារកាប្រកាសដើម្បីយកភាពល្បីល្បាញ យកមុខយកមាត់ ចង់បានផលប្រយោជន៍អ្វីមួយតបមកវិញនោះទេ។
យើងមិនដឹងថាជាតិក្រោយមានមែនឬអត់ឡើយ បើមានសំណាងបានកើតក្នុងជាតិហើយ សូមធ្វើល្អដោយចិត្តស្មោះ កុំធ្វើល្អព្រោះតែចង់បានចំណាប់អារម្មណ៍ពីអ្នកដទៃឲ្យសោះ។
ចុចអានបន្ត៖ មេរៀនជីវិតដែលខ្ញុំទទួលបានពីឆ្នាំ២០១៨ និងឆ្នាំកន្លងទៅ