ប្រសិនបើអ្នកចង់បានទំនាក់ទំនងពិតប្រាកដ១ គួរបញ្ឈប់ទង្វើបែបនេះភ្លាម
- 2017-12-20 03:24:05
- ចំនួនមតិ 0 | ចំនួនចែករំលែក 0
ប្រសិនបើអ្នកចង់បានទំនាក់ទំនងពិតប្រាកដ១ គួរបញ្ឈប់ទង្វើបែបនេះភ្លាម
នរណាក៏ចង់បានស្នេហ៍ស្មោះនឹងមួយជារៀងរហូតដែរ តែអ្នកខ្លះបានធ្វើរឿងមិនគួរធ្វើ ទើបបណ្ដាលឲ្យទំនាក់ទំនងគ្មានភាពយូរអង្វែងដូចគេ។ ដូចនេះបើអ្នកពិតជាចង់បានស្នេហ៍ស្មោះពិតមែន គួរបញ្ឈប់ទង្វើអាក្រក់ទាំងនេះភ្លាមៗទៅ៖
១.ឈប់គិតអវិជ្ជមាន
មនុស្សមួយចំនួនឲ្យតែដៃគូធ្វើអ្វីមិនត្រូវចិត្តគេនឹងចាប់ផ្ដើមគិតអាក្រក់ភ្លាម ដែលនោះជាមូលហេតុនាំឲ្យមិនទុកចិត្តគ្នា។ អ្នកខ្លះគ្រាន់តែតេទៅសង្សារ ហើយគេមិនបានលើក នឹងគិតថាគេប្រហែលជាកំពុងនៅជិតដៃគូថ្មី ទើបមិនលើកទូរស័ព្ទ។ នេះជាគំនិតអាក្រក់ដែលមិនគួរឲ្យមាន។
២.កុំយកស្នេហាជាល្បែង
អ្នកចង់បានការស្រលាញ់ពិតប្រាកដពីដៃគូ តែបែរជាលួចលាក់ទាក់ទងដៃគូផ្សេងៗជាច្រើនក្នុងពេលតែមួយ។ បែបនេះអ្នកមិនអាចរកឃើញស្នេហ៍ស្មោះពិតប្រាកដឡើយ ព្រោះអ្នកជាអ្នកបង្កើតរឿងស្នេហារញ៉េរញ៉ៃដោយខ្លួនឯង។
៣.ស្រលាញ់មួយមុខមិនគ្រប់គ្រាន់
ការផ្ដល់ក្ដីស្រលាញ់តែមួយមុខពិតជាមិនគ្រប់គ្រាន់សម្រាប់ដៃគូឡើយ តែអ្នកផ្ដល់ផ្ដល់កម្លាំងចិត្ត ផ្ដល់ពេលវេលា ភាពយកចិត្តទុកដាក់ ការខ្វាយខ្វល់ ក្ដីអាណិតអាសូរ និងការជឿជាក់លើគ្នាទៅវិញទៅមកទៀត ទើបគ្រប់គ្រាន់។
៤.កុំប្រចែប្រចណ្ឌច្រើនពេក
«ស្រលាញ់ទើបប្រចណ្ឌ» នេះជាសុភាសិតអ្នកពូកែ ប្រចណ្ឌប៉ុណ្ណោះ។ បើខាងណាតែងព្យាយាមតាមស្អិតភាគីម្ខាងទៀតមិនលែង ព្រោះខ្លាចគេមានពេលជួបអ្នកថ្មី នោះបង្ហាញយ៉ាងច្បាស់ថាអ្នកកំពុងលិចលង់ក្នុងភ្លើងប្រចណ្ឌ ហើយទំនាក់ទំនងនឹងគ្មានភាពយូរអង្វែង ព្រោះថ្ងៃណាមួយម្ខាងទៀតពិតជាធុញទ្រាន់នឹងរឿងបែបនេះ ហើយដើរចេញ។
៥.មិនគួរចាប់កំហុសដៃគូ
បើអ្នកអង្គុយតែចាប់កំហុស សូម្បីតែរឿងតូចតាច អាចរុញច្រានឲ្យស្នេហាដើរទៅដល់ផ្លូវបំបែកឆាប់។ ការធ្វើមិនដឹងមិនឮរឿងខ្លះ បែរជាជួយឲ្យគ្រឹះនៃសម្ពន័ភាពរបស់អ្នកទាំងពីរកាន់តែរឹងមាំទៅទៀត ព្រោះពេលខ្លះអ្វីដែលមើលឃើញ និងស្ដាប់ឮគេនិយាយមិនប្រាកដថាជាការពិតឡើយ។ តែអ្នកគួរនិយាយគ្នាឲ្យដឹងហេតុផលច្បាស់លាស់ និងដឹងពីដំណើរដើមទង។
៦.អ្នកមិនចាំបាច់មានសេចក្ដីស្រលាញ់តែម្ខាង
មធ្យោបាយដ៏ធំបំផុត ដើម្បីមិនធ្វើឲ្យខូចទំនាក់ទំនងនោះ គឺមិនត្រូវស្ថិតនៅក្នុងស្ថានភាពដែលស្រលាញ់គេតែម្នាក់ឯងឡើយ។ ព្រោះពេលអ្នកស្រលាញ់គេតែម្ខាង នោះអ្នកនឹងព្យាយាមធ្វើគ្រប់បែបគ្រប់យ៉ាងតម្រូវចិត្តគេ រហូតធ្វើឲ្យខ្លួនឯង ឈឺចាប់។ ត្រូវចាំថា ការធ្វើឲ្យខ្លួនឯងមានសេចក្ដីសុខជាមុន ទើបអាចបំពេញភាពខ្វះខាតដល់ដៃគូបាន៕
ចុចអាន៖៥ ទម្លាប់នៃគូស្នេហ៍ជោគជ័យដែលចង់ចែករំលែកប្រាប់គូស្នេហ៍ផ្សេងទៀត