អារម្មណ៍ខ្ញុំពេលគេសួរនាំរឿងរៀបការ

2017-12-14 03:04:31
ចំនួនមតិ 0 | ចំនួនចែករំលែក 0

អ្នកណាប្រាប់ថា រៀបការហើយ នារីមិនអាចបន្តការងារដែលគេចូលចិត្តធ្វើតទៅទៀតនោះ? គ្មានអ្នកណាអាចហាមឃាត់អ្នកមិនឲ្យធ្វើអ្វីបានទាំងអស់។

ឲ្យតែដល់ខែកត្តិកធ្លាក់ខ្យល់ម្ដងៗ មនុស្សស្រីមិនទាន់មានគូចាប់ផ្ដើមបានស្ដាប់ពាក្យទេសនារបស់អ្នកមានគុណសួរថាពេលណាបានយកប្ដី។ ម្ដាយ ឪពុកទាំងអស់ឲ្យជួបមុនកូនៗដឹងតែសួររឿងគូស្រករនេះតែម្ដង។ ចាប់ពីពេលនោះមក មង្គលការមិនមែនជារឿងមង្គលទៀតទេ បែរជាក្លាយទៅជាសម្ពាធមួយទៅវិញ។ សម្ពាធនេះធ្វើឲ្យមនុស្សស្រីដែលមិនចង់រៀបការស្រាប់ហើយនោះ កាន់តែធុញនឹងវាច្រើនជាងមុនទៅទៀត។

មិនមែនពួកគេអេគ្មានអ្នកតាមស្រលាញ់ទេ តែពួកគេខ្លាចច្រើនជាង។ ពួកគេខ្លាចថាប្ដីខ្លួននឹងសាវាដូចមនុស្សប្រុសផ្សេងទៀត។ ខ្លាចថាអាពាហ៍ពិពាហ៍គឺជាគុកដែលគ្មានច្រកចេញ។ ខ្លាចប៉ះពាល់ការងារដែលកំពុងរីកចម្រើនរបស់ខ្លួនជាដើម។

ដូចគេតែងនិយាយថា មានរៀបការទើបមានលែងលះ បើមិនរៀបការបានអ្វីលែងលះ? ប៉ុន្តែប្រសិនអ្នកគិតវិជ្ជមានយ៉ាងនេះរហូត អ្នកប្រុងនៅព្រៅឬយ៉ាងម៉េច? សូមឆ្លើយថា មិនមែននៅព្រៅនោះទេ តែកំពុងតែរង់ចាំឱកាសដែលសមគួរ។ រឿងអ្វីដែលត្រូវមកដល់ គង់តែមកដល់។ ប្រសិនបើអ្នកមានគុណនៅតែតឿនដូចនេះទៀតនោះ កូនខ្លាចក្រែងតែនាំកូនប្រសាខុសចូលផ្ទះទេ។ ដូចនេះ សូមទុកពេលឲ្យកូនមួយរយៈទៀត ហើយកំឡុងពេលនោះ កុំសួរនាំទៀតអី៕