គាត់គ្មានថ្ងៃក្បត់អ្នកទេ ប្រសិនបើគាត់បង្ហាញទង្វើ៥យ៉ាងនេះ
- 2017-12-14 02:05:26
- ចំនួនមតិ 0 | ចំនួនចែករំលែក 0
គាត់គ្មានថ្ងៃក្បត់អ្នកទេ ប្រសិនបើគាត់បង្ហាញទង្វើ៥យ៉ាងនេះ
ធម្មជាតិរបស់មនុស្សស្រី គឺពូកែគិតច្រើនតែម្នាក់ឯង សង្ស័យមិនឈប់ ចូលចិត្តសរុបសេចក្ដីលើរឿងអ្វីមួយ គ្មានភស្តុតាងច្បាស់លាស់ និងផ្អែកលើអារម្មណ៍តែមួយមុខ។ ហេតុដូច្នេះហើយ ទើបជម្លោះស្នេហាតែងតែកើតឡើងជាញឹកញាប់ ដោយសារតែនាងភ័យខ្លាចបុរសជាទីស្រឡាញ់លួចមានអ្នកថ្មី ក្បត់នាងពីក្រោមខ្នង។ ឈប់បារម្ភច្រើនទៀត រៀនសង្កេតមិត្តប្រុស ឬស្វាមីអ្នកតាមរយៈទង្វើប្រចាំថ្ងៃ។ បើគាត់មាន៥ចំណុចខាងក្រោម អ្នកគួរតែត្រេកអរ ព្រោះគាត់គ្មានថ្ងៃក្បត់អ្នកទេ៖
១. គាត់បង្ហាញភាពស្មោះត្រង់គ្រប់ពេល
មិនថារឿងតូច ឬធំគាត់មិនដែលកុហកអ្នកម្ដងណាឡើយ។ ទោះគាត់នៅជាមួយអ្នកណា ឬទីណាក៏គាត់តែងតែប្រាប់ឲ្យអ្នកដឹង។ គាត់គ្មានបញ្ហានឹងនិយាយ ផ្ដល់មតិ ឬបង្ហាញអារម្មណ៍ពិតប្រាប់អ្នក ព្រោះគាត់ដឹងច្បាស់ថាអ្នកអាចទទួលយកគាត់បានគ្រប់យ៉ាង ទាំងគុណសម្បត្តិ និងគុណវិបត្តិរបស់គាត់។
២. ពង្រឹងទំនាក់ទំនងដោយស្ម័គ្រចិត្ត
អ្នកមិនចាំបាច់ត្រូវផ្ញើសារ ខលសួរគាត់គ្រប់ពេល ហើយរឹតតែមិនចាំបាច់សួរនាំពីរឿងរ៉ាវប្រចាំថ្ងៃដែលគាត់ជួបប្រទះទេ ព្រោះគាត់នឹងផ្ដល់ព័ត៌មានទាំងនោះប្រាប់អ្នកដោយស្ម័គ្រចិត្ត។ មិនថាគាត់មានគម្រោងធ្វើអ្វី គាត់តែងតែពិភាក្សាជាមួយអ្នក និងមិនដែលទុកឲ្យអ្នកនៅក្រៅរង្វង់ជីវិតគាត់ម្ដងណាឡើយ។
៣. គាត់តែងតែធ្វើខ្លួនឲ្យរវល់
កាលវិភាគប្រចាំថ្ងៃរបស់គាត់គឺពេញជាមួយការងារ ការកម្សាន្តផ្ទាល់ខ្លួន និងពេលវេលាសម្រាប់គ្រួសារ។ បើគាត់រវល់ជាប់យ៉ាងនេះ តើគាត់មានពេលឯណាទៅនឹកគិតរកស្រីក្រៅនោះ។ ទោះជាមិត្តភ័ក្ដិហៅចេញក្រៅពេលយប់ ក៏គាត់គ្មានកម្លាំងនឹងចេញដែរ។
៤. ផ្ដាច់ទំនាក់ទំនងជាមួយសង្សារចាស់
ភាគរយនៃការក្បត់ផិតអាចកើតឡើងច្រើន ដោយសារតែការជំពាក់ជំពិនជាមួយគូស្នេហ៍ចាស់។ ដូច្នេះបើគាត់បានផ្ដាច់ទំនាក់ទំនងជាមួយសង្សារចាស់ដាច់ស្រឡះហើយ អ្នកក៏មិនគួរភ័យ ព្រួយបារម្ភទៀតដែរព្រោះ អ្នកជាមនុស្សបច្ចុប្បន្ន ដែលគាត់ស្រឡាញ់តែម្នាក់ប៉ុណ្ណោះ។
៥. តែងតែបំពេញតម្រូវការអ្នកមុនខ្លួនឯង
បើអ្នកចង់បានអ្វី គាត់តែងតែព្យាយាមអស់សមត្ថភាពដើម្បីរកមកឲ្យអ្នក។ គាត់មិនមែនជាមនុស្សអាត្មានិយម ហើយដឹងច្បាស់ថាការក្បត់ផិត និងធ្វើឲ្យអ្នកឈឺចាប់ លំបាកកម្រិតណា ដូច្នេះគាត់ក៏គ្មានថ្ងៃធ្វើរឿងឥតប្រយោជន៍បែបនោះ ដើម្បីការសប្បាយខ្លួនឯងមួយពេលដែរ ៕
ចុចអាន៖