៦ វិធីធ្វើឲ្យសក់ទន់រលោង ក្រអូបជាប់ក្លិនបានយូរ ដែលស្រីៗមិនគួររំលងសោះ!

2017-08-15 05:30:56
ចំនួនមតិ 0 | ចំនួនចែករំលែក 0

សក់ក្រអូប ក៏ជាមន្តស្នេហ៍មួយដ៏អស្ចារ្យសម្រាប់មនុស្សស្រីដែរ តែបញ្ហាត្រង់ថា មិនដឹងធ្វើយ៉ាងណាឲ្យវាមានក្លិនប្រហើរបែបធម្មជាតិនោះ។ កុំបារម្ភ ៦ វិធីនេះអាចធ្វើឲ្យសក់មានក្រអូបជាប់ក្លិនបានយូរណាស់៖

១.ផ្លាស់ប្ដូរខ្នើយកើយឲ្យបានញឹកញាប់

ជារឿយៗមូលហេតុដែលនាំឲ្យមានក្លិនស្អុយនៅក្នុងសក់គឺដោយសារតែមិនបានប្ដូរខ្នើយញឹកញាប់។ ជាពិសេសនៅក្នុងករណីដែលយើងកក់សក់ពេលយប់ ហើយផ្លុំមិនបានស្អាតល្អ នោះពេលគេងទៅនឹងបណ្ដាលឲ្យបាត់បង់ក្លិនក្រអូបបន្ទាប់ពីងូតទឹក។ ដូច្នេះត្រូវបោកគក់សម្អាតស្រោមពូក ភួយ និងស្រោមខ្នើយជាញឹកញាប់ កុំឲ្យអស់ក្លិនក្រអូបពីរបស់ទាំងនោះ ទើបសក់នៅរក្សាក្លិនក្រអូបបានយូរ។

២.សម្អាតក្រាស់សិតសក់

បើក្រាស់សិតសក់មានធូលីក៏អាចជះក្លិនមិនល្អដល់សក់ដូចគ្នា ដូចនេះគួរលាងសម្អាត មួយសប្ដាហ៍ម្ដង ទើបល្អចំពោះសក់។ មិនតែប៉ុណ្ណោះម៉ាស៊ីនគាប ផ្លុំ មូលរួញ មិនស្អាតក៏ជាមូលហេតុនាំឲ្យសក់មានក្លិនស្អុយដែរ។

៣.កុំប្រើប្រេងលាបសក់

និយាយអំពីប្រេងលាបសក់ឲ្យទន់រលោង គឺស្រីៗកម្រមិនប្រើណាស់ ព្រោះវាអាចជួយមិនឲ្យសក់ជំពាក់ និងមើលទៅរស់រវើក។ តែការប្រើប្រាស់ប្រេងបែរជានាំឲ្យសក់ក្បាលធុំក្លិនស្អុយ និងងាយជាប់ជាតិកខ្វក់ផ្សេងៗដែលហើរតាមខ្យល់។

៤.ប្រើប្រាស់សាប៊ូ ឬក្រែមបន្ទន់សក់ត្រូវនឹងស្បែកក្បាល និងសក់

នេះជាចំណុចសំខាន់ណាស់ កាលណាតែកក់សាប៊ូ និងក្រែមបន្ទន់មិនត្រូវជាមួយសុខភាពស្បែកក្បាល នោះជាមូលហេតុនាំឲ្យកើតអង្គែ។ អង្គែនោះហើយដែលនាំឲ្យសក់មានក្លិនមិនល្អ និងងាយសាយក្លិនអាក្រក់បំផុត។

៥.កុំបាញ់ទឹកអប់លើសក់

មនុស្សមួយចំនួនតែងបាញ់ទឹកអប់នៅលើសក់ក្បាល មុនពេលចេញក្រៅ។ ខណៈការធ្វើបែបនេះមិនមានប្រសិទ្ធភាពក្នុងការរក្សាសក់ឲ្យមានក្លិនក្រអូបឡើយ តែវាជាបញ្ហានាំឲ្យសក់ខូចទៅវិញ។

៦.កុំកក់សក់រាល់ថ្ងៃ

ស្ត្រីមួយចំនួនតែងធ្វើបែបនេះ ព្រោះគិតថាជាវិធីដ៏មានអនាម័យ និងជួយឲ្យសក់ទន់រហូត។ តែនោះជាការយល់ច្រឡំទេ ពេលកក់សក់រាល់ថ្ងៃស្បែកក្បាលនឹងមានភាពស្ងួត ហើយអាចធ្វើឲ្យសក់ផុយស្រួយទៅវិញ៕

ចុចអាន៖មើលទៅដូចមិនអីតែទម្លាប់ទាំងនេះអាចបំផ្លាញសក់អ្នកបាន

ប្រភព៖ Allwomenstalk ប្រែសម្រួល៖ ទ្រី រ៉ាវី