សញ្ញា១០យ៉ាង អាចមើលដឹងថាមិត្តប្រុសចង់រៀបការជាមួយអ្នកមែនទែនហើយ

2017-07-14 08:00:00
ចំនួនមតិ 0 | ចំនួនចែករំលែក 0

ការស្រលាញ់អ្នកណាម្នាក់ធ្វើជាគូអនាគតស្វាមីភរិយាភាគីសងខាងត្រូវចំណាយពេលវេលាយ៉ាងយូរក្នុងការស្វែងយល់ចិត្ត និងភាពចុះសម្រុងទៅវិញទៅមក ថាតើអាចរស់នៅជាមួយគ្នាបានទេ ប្រសិនបើអ្នកទាំងពីរចាប់ដៃគ្នាសាងគ្រួសារមួយពិតប្រាកដ។

រូបតំណាង

ខណៈពេលស្រលាញ់គ្នា ភាគីខាងប្រុសភាគច្រើនត្រូវគេមើលឃើញថា រង់ចាំសល់លុយកាក់បន្តិច ឯខ្លះទៀតមានចិត្តចង់រៀបការភ្លាមៗ តែក្នុងចិត្តមិនទាន់ហ៊ានហាស្ដីព្រោះខ្លាចពាក្យបដិសេធ ខ្មាសអៀន និងត្រូវការពេលរកប្រាក់ឲ្យបានច្រើនបន្ថែមទៀត។

តែទោះជាគាត់មិនហ៊ាននិយាយចេញក្ដី តែអ្នកអាចមើលសកម្មភាពប្រចាំថ្ងៃរបស់គាត់ពេលជួបអ្នក និងនៅពីក្រោយខ្នង។ ចំណុចខាងក្រោមនេះ យើងអាចដឹងថាគាត់ពិតជាមានចិត្តចង់រៀបការជាមួយអ្នកប្រាកដមែន៖

១. គាត់ចូលចិត្តនិយាយពីគម្រោងអនាគត

រឿងដែលគាត់ចូលចិត្តនិយាយពេលនេះ គឺមិនសូវជារឿងលេងសើច ឥតប្រយោជន៍ទៀតទេ តែជារឿងរៀបចំផែនការគ្រួសារ ដូចជាបើករបរកស៊ីក្រោយអាពាហ៍ពិពាហ៍រួច កន្លែងរស់នៅ សង់ផ្ទះ ឬចំនួនកូនត្រូវយកជាដើម។

២. អ្នកត្រូវគាត់អញ្ជើញចូលរួមស្ទើរគ្រប់កម្មវិធី

មិត្តប្រុសរបស់អ្នកតែងតែគិតថាអ្នកជាមនុស្សត្រូវចូលរួមដំណើរកម្សាន្តជិតឆ្ងាយ ឬគ្រប់កម្មវិធី ដូចជាពិធីរៀបការបងប្អូន មិត្តភ័ក្ដិ ខួបកំណើត ឬពិធីបុណ្យនានា ដែលក្រុមគ្រួសារគាត់បានរៀបចំឡើង។ បើមានឱកាសគាត់នឹងណែនាំអ្នកឲ្យក្រុមគ្រួសារគាត់បានស្គាល់។

៣. គាត់ក្លាយជាមនុស្សទៀងម៉ោង

ដល់ដំណាក់កាលបែបនេះ ប្រសិនអ្នកបបួលទៅណាក៏ដោយក៏គាត់ព្រមទៅជាមួយដែរមិនថានៅទីជិត ឬទីឆ្ងាយទេ ឲ្យតែបាននៅក្បែរអ្នក។ ការណាត់នេះទៀតសោត គាត់មិនហ៊ានមកយឺតឡើយ ព្រោះខ្លាចអ្នកខឹង មិនសប្បាយចិត្ត។

៤. គាត់មិនរត់ចោល ពេលអ្នកជួបបញ្ហាលំបាក

ក្រោយដាក់ចិត្តស្រលាញ់ស្មោះ គាត់បានទុកបញ្ហារបស់អ្នកដូចជាបញ្ហាខ្លួន និងសុំចូលរួមជួយរកវិធីដោះស្រាយតាមលទ្ធភាពគាត់មាន ពេលអ្នកជួបបញ្ហាប្រឈម។ ការធ្វើបែបនេះ ដើម្បីជាសញ្ញាបញ្ជាក់ថា គាត់បានយកចិត្តទុកដាក់លើអ្នកដូចគ្រួសារមួយអីចឹងដែរ។

៥. គាត់តែងតែនឹក

រៀងរាល់ថ្ងៃ គ្រប់ពេល គ្រប់នាទី ពេលនៅឆ្ងាយ គាត់តែងតែនិយាយថានឹកអ្នកណាស់ ចង់ជជែកលេង ចេញទៅញ៉ាំអីខាងក្រៅជាមួយគ្នា ឬប្រាប់សុបិនឃើញរូបអ្នកពីយប់ជាដើម។

រូបតំណាង

៦. ហ៊ានប៉ះអ្នក និងនិយាយត្រង់ៗ

ដោយសារក្ដីស្រលាញ់មានកាន់តែធំ ការចង់ឃើញអ្នកក៏កាន់តែច្រើនដែរ ដូចនេះពេលបានជួបមុខអ្នក គាត់បានតែប៉ះដៃ អង្គុយកៀក ឬឱបអ្នក ក៏អស់ចិត្តដែរ។ បើការនិយាយស្ដីវិញ គឺមិនមានភាពលាក់លៀមដូចមុនឡើយ។

៧. ចេះសន្សំប្រាក់ជាងមុន

ក្រោយថ្ងៃសារភាព និងទទួលភ្លើងខៀវពីអ្នក គាត់ចាប់ផ្ដើមគិតវែងឆ្ងាយជាងមុន ហើយចាត់ទុកខ្លួនជាមនុស្សចាស់ទុំមួយរូប ពិសេសប្រាក់ធ្លាប់ចាយខ្ជះខ្ជាយ ឬទិញរបស់ថ្លៃៗ ត្រូវបានកាត់បន្ថយ ដោយងាកមករកសន្សំទុកវិញ។

៨. មានឫកពា ឬសកម្មភាពដូចជាប្ដី

អាពាហ៍ពិពាហ៍ គ្រាន់តែជាការដឹងឮផ្លូវការប៉ុណ្ណោះ ប៉ុន្តែអ្វីដែលសំខាន់អ្នកមានបុរសម្នាក់បានថ្នាក់ថ្នមដូចជាស្វាមីទៅហើយដូចជាគាត់ចូលចិត្តសុំយោបល់អ្នកមុនធ្វើអ្វីមួយ គាំទ្រ ផ្ដល់កម្លាំងចិត្តពេលអ្នកជួបការលំបាក បង្ហាញក្ដីស្រលាញ់ចំពោះអ្នកយ៉ាងផ្អែមល្ហែម។

៩. ចាប់ផ្ដើមស្រលាញ់ក្មេងតូចៗ

ការស្រលាញ់ក្មេងតូចៗ រហូតបី ឬពរ គឺជាសារបង្កប់មួយផ្ញើឲ្យអ្នកថា គាត់ចង់មានក្មេងតូចទុកប្រលែងលេង និងសញ្ញាបញ្ជាក់គាត់អាចមើលថែបានពេលក្លាយជាឪពុករបស់គេ។

១០.គាត់និយាយថា គាត់ចង់រៀបការជាមួយអ្នកឆាប់ៗ

ដោយសារតែភាពអៀនខ្មាស មួយឃ្លាដ៏សំខាន់នេះ គាត់តែងនិយាយបែបលេងសើចតែអត្ថន័យមានពិតប្រាកដ ណាមួយគាត់ចង់ឮចម្លើយតបរបស់វិញភ្លាមៗវិញដែរ៕