មនុស្សបែកគ្នាហើយ ហេតុអីមិនអាចរាប់អានគ្នាវិញបាន?

2017-06-21 07:32:09
ចំនួនមតិ 0 | ចំនួនចែករំលែក 0

មានហេតុផលជាច្រើនដែលខ្ញុំនៅតែមិនទាន់យល់ពីស្នេហា និង ការស្រឡាញ់? ហេតុអីពេលដែលវាត្រូវបញ្ចប់វាបញ្ចប់គ្រប់យ៉ាងបែបនេះ?

ពីមនុស្សម្នាក់ដែលមិនស្គាល់គ្នាសោះ ក៏ក្លាយជាអ្នកស្គាល់គ្នា រាប់អានគ្នា បន្ទាប់មកក៏ស្រឡាញ់គ្នា ហើយចុងក្រោយក៏ត្រូវក្លាយជាមនុស្សទីទៃវិញ។ ហេតុអីចាំបាច់តម្រូវបែបនេះ? យ៉ាងហោចណាស់ក៏ពួកយើងធ្លាប់ប្រើពេលវេលាជាមួយគ្នាជាច្រើនឆ្នាំហើយដែរ ចិត្តគំនិតពួកយើងសុទ្ធតែយល់ពីគ្នា តែចាំបាច់អីគ្រាន់តែពាក្យថាបែកគ្នា យើងត្រឡប់ទៅរកពីមុនធ្វើអី។

រូបតំំណាង

មិនអាចក្លាយជាស្នេហា មិនអាចក្លាយជាប្ដីប្រពន្ធ តែពួកយើងអាចក្លាយជាមិត្តភ័ក្ដិ បានតើ។ ប្រហែលនេះមកពីនិស្ស័យពួកយើង ដែលមិនអាចបន្តបាន តែមិនមែនបានន័យថាពួកយើងមិនអាចរាប់អានគ្នានោះទេ ខ្ញុំនៅតែទុកអ្នកដូចគ្រួសារខ្ញុំអីចឹង តែអ្នកវិញនៅតែមិនយល់ពីទឹកចិត្តខ្ញុំ ហើយព្យាយាមបង្ខំខ្ញុំឲ្យផ្ដាច់ទំនាក់ទំនងជាមួយអ្នក។

អ្នកអាចសប្បាយចិត្តពេលដែលពួកយើងក្លាយទៅជាបែបនេះមែនទេ? កំហុសដែលអ្នកធ្លាប់បានធ្វើមកលើខ្ញុំខ្ញុំមិនដែល គិតនោះទេ ខ្ញុំគ្រាន់តែចង់បញ្ចប់ស្នេហារវាងពួកយើងទាំងពីរ ហើយត្រឡប់ជាមិត្តនឹងគ្នាតែប៉ុណ្ណោះ។

រូបតំំណាង

ហេតុអីចាំបាច់ចង់ធ្វើជាសត្រូវនឹងគ្នា? មនុស្សពីរនាក់មិនអាចស្រឡាញ់គ្នាបានគឺសុទ្ធតែមានហេតុផល តែហេតុអីយើងមិនព្រមទទួលយកហេតុផលនោះហើយ រក្សានិស្ស័យដែលឲ្យយើងស្គាល់គ្នានោះទៅ ព្រោះវាមិនងាយនោះទេដែលនៅក្នុងលោកមានមនុស្សជាច្រើនលាននាក់ ហើយពួកយើងបានជួបគ្នា បានស្គាល់គ្នា។

ដូច្នេះខ្ញុំសង្ឃឹមថាគូស្នេហ៍ទាំងអស់ដែលបានបែកបាក់គ្នា អាចទទួលនូវកំហុសដែលខ្លួនបានធ្វើពីមុន ហើយ អភ័យទោសឲ្យគ្នា និង នៅតែអាចរាប់អានគ្នាជាថ្មីឡើងវិញព្រោះយ៉ាងណាក៏យើងជាមនុស្សដែលមាននិស្ស័យនឹងគ្នាក្នុងជាតិនេះដែរ។

From: Ex

អត្ថបទ៖ ផេង ផលធិតា