ពេលនេះមានអារម្មណ៍ថាខ្លួនឯងហត់នឿយនឹងស្នេហាខ្លាំងណាស់

2017-06-14 07:58:50
ចំនួនមតិ 0 | ចំនួនចែករំលែក 0

មានធ្លាប់មានអារម្មណ៍ថាហត់នឹងស្នេហាទេ? ហើយធ្លាប់គិតថាគ្មានស្នេហាជីវិតយើងនឹងល្អជាងនេះទេ?

ពេលនេះខ្លួនខ្ញុំមានអារម្មណ៍ថាហត់ខ្លាំងណាស់ ហើយឲ្យតែឮពាក្យថា« ស្រឡាញ់» ខ្ញុំចាប់ផ្ដើមស្អប់ ចាប់ផ្ដើមចង់ដើរចេញឲ្យឆ្ងាយពីវា។

ការពិតខ្ញុំគឺជាមនុស្សដែលរីករាយណាស់ ជីវិតខ្ញុំស្រស់ស្រាយ សេរីភាព និងស្រស់ស្អាតបំផុត ប៉ុន្តែចាប់តាំងពីខ្ញុំបានស្គាល់ស្នេហាមក ជីវិតខ្ញុំចាប់ផ្ដើមទទួលរងនូវភាពឈឺចាប់ ទឹកភ្នែក និង ការគ្រាំចិត្តជាច្រើន។ មនុស្សប្រុសដែលបានដើរចូលក្នុងជីវិតរបស់ខ្ញុំសុទ្ធតែមិនមែនការពិត គឺសុទ្ធតែជាសុបិន ព្រោះគេបានដើរចូលហើយក៏ដើរចេញវិញទាំងគ្មានហេតុផល និង ហេតុផលដ៏គួរឲ្យអស់សំណើចបំផុត។ ការខូចចិត្តម្ដងជាពីរដង ភាពឯកាតែងតែមានពេលដែលគេបានជួបអ្វីដែលគេចង់បាន ហើយបោះបង់ម្នាក់ទៀតដែលខំកំដរគេ ដើរផ្លូវជាមួយគេអស់ពេលជាយូរ។

រូបតំណាង

ចិត្តខ្ញុំពេលនេះរបួសខ្លាំងណាស់ របួសរហូតដល់មិនចង់ដើរលើផ្លូវនេះទៀត ខ្ញុំចង់សម្រាក ខ្ញុំចង់ទុកពេលព្យាបាលភាពឈឺចាប់ដែលមនុស្សប្រុសបានប្រគល់ឲ្យខ្ញុំ។

ខ្ញុំមិនចង់ឲ្យទឹកភ្នែកខ្ញុំស្រក់ទៀតទេ ព្រោះកន្លងមកវាហូរស្ទើរតែខ្សោះទៅហើយ។ មានតែអ្នកដែលធ្លាប់ជួបអារម្មណ៍ហ្នឹងទេ ទើបយល់ពីស្ថានភាពខ្ញុំពេលនេះ ខ្ញុំគ្មានម្លាំង ខ្ញុំគ្មានអារម្មណ៍អ្វីទាំងអស់ ខ្ញុំមានអារម្មណ៍ថាខ្លាចស្នេហា ជាពិសេសខ្លាចពាក្យមនុស្សប្រុសដែលថា « ស្រឡាញ់» ខ្ញុំ។

រូបតំណាង

ខ្ញុំចង់ប្រើពេលនេះមើលថែខ្លួនឯង ហើយចង់រស់នៅជាមួយខ្លួនឯង ជាជាងចំណាយពេលឲ្យមនុស្សប្រុសដែលមិនពិតប្រាកដជាមួយជីវិតខ្ញុំ។ ខ្ញុំលែងជឿជាក់លើស្នេហាហើយ ខ្ញុំមិនចង់ឲ្យខ្លួនឯងត្រូវដេកយំរហូតដល់គេងលក់ទៀតនោះទេ។ សង្ឃឹមថាអ្វីៗនឹងឆាប់ធូរស្រាលជាងនេះ ហើយខ្ញុំនឹងអាចត្រឡប់ទៅរកជីវិតពីមុនបាន គឺជីវិតដែលមិនធ្លាប់យំដោយសារស្នេហា។

ពី៖ នារីដែលចាញ់រឿងស្នេហាម្នាក់

អត្ថបទ៖ ផេង ផលធិតា