ស្រីៗ! បើសួររកលក្ខណៈពិសេសរបស់ស្ត្រីខ្មែរ ឆ្លើយចេញអត់?

2017-01-19 02:12:40
ចំនួនមតិ 0 | ចំនួនចែករំលែក 0

មើល៍ស្រីៗ! បើសួរថា «អ្វីជាលក្ខណៈពិសេសរបស់ស្ត្រីខ្មែរ?» ឆ្លើយចេញទេ? ពិតណាស់ថាពួកយើងមានចំណុចពិសេសជាច្រើនដែលគួរឲ្យចាប់អារម្មណ៍។ សាកមកមើលមតិយុវវ័យខាងក្រោមនេះបន្តិចមើល៍៖

កំពុងអង្គុយអានមេរៀនក្នុងបរិវេណសាកលវិទ្យាល័យ ស្រីស្អាត ឪ ស៊ីលីន បានបញ្ជាក់ មកកាន់ 'កញ្ញា' ថាភាពរាក់ទាក់ និងការគោរពជាចំណុចពិសេសរបស់ស្ត្រីខ្មែរ។ «ខ្ញុំគិតថា បើមើលជាទូទៅស្ត្រីខ្មែរចេះរាក់ទាក់ ដូចជាញញឹម ហើយចេះគួរសមអីជាដើមហ្នឹងបង! ហើយម្យ៉ាងទៀតស្រីៗខ្មែរយើងក៏ចេះក្រែងចិត្ត និងចេះគោរពគ្នាទៅវិញដែរ» ស៊ីលីនបន្ថែម។

ចំណែក កញ្ញា ហ៊ាង ឆេងណាន មានមុខរបរជាគ្រូបង្រៀនអង់គ្លេសនៅសាលាឯកជនមួយក៏បានបញ្ជាក់ដែរថា៖ «ចំពោះគំនិតខ្ញុំ ស្ត្រីខ្មែរជាស្ត្រីមេផ្ទះដ៏ល្អ, ពូកែធ្វើម្ហូប, ចេះស្រឡាញ់ប្ដី និងចេះមើលថែកូនៗបានល្អ។ ខ្ញុំពិតជាចូលចិត្តចំណុចនេះណាស់។»

«បងគិតថា បើនិយាយពីចំណុចពិសេស យើងចៀសមិនរួចពីនិយាយពីភាពស្មោះត្រង់ ចេះគួរសមរបស់ស្ត្រីខ្មែរនោះទេ» នេះជាការលើកឡើងរបស់បងស្រី ស្រេង ដាលីន ដែលទើបនឹងរៀបការថ្មីៗ។ ស្ត្រីមេផ្ទះមកពីខេត្តកំពុងចាមរូបនេះក៏បានបន្ថែមដែរថា «ពួកស្ត្រីយើងច្រើនចេះគោរពឪពុកម្ដាយ ចាស់ទុំ និងចេះស្មោះត្រង់ជានិច្ចជាមួយប្ដី។ នេះជាចំណុចពិសេសដែលសាសន៍ផ្សេងពិបាកធ្វើដូច។»