អ្នកស្រីឌី ម៉ាឡែន៖ «ខ្ញុំជោគជ័យលើការច្នៃម៉ូដ ដោយសារខ្ញុំមិនរំលងមូលដ្ឋានគោល នៃហូលផាមួងខ្មែរ»
- 2016-12-20 01:54:42
- ចំនួនមតិ 0 | ចំនួនចែករំលែក 0
អ្នកស្រីឌី ម៉ាឡែន៖ «ខ្ញុំជោគជ័យលើការច្នៃម៉ូដ ដោយសារខ្ញុំមិនរំលងមូលដ្ឋានគោល នៃហូលផាមួងខ្មែរ»
អ្នករចនាម៉ូដដ៏មានកេរ្តិ៍ឈ្មោះ អ្នកស្រី ឌី ម៉ាឡែន បានពុះពារលើវិស័យនេះអស់ជាច្រើនឆ្នាំ ដោយជ្រើសរើសសូត្រខ្មែរជាចំណុចគោលក្នុងការច្នៃម៉ូដ ហើយថែមទាំងបាននាំចេញសូត្រខ្មែរដែលច្នៃរួចទៅបង្ហាញក្នុងឆាកអន្តរជាតិថែមទៀតផង។
ភាពច្នៃប្រឌិតខ្ពស់ មានមូលដ្ឋានគ្រឹះនៃការច្នៃម៉ូដ ចេះសិក្សានិងឆ្លើយតបចំពោះតម្រូវការអតិថិជន កត្តារួមផ្សំទាំងនេះហើយ ដែលធ្វើឲ្យលោកស្រីទទួលបានជោគជ័យលើអាជីពច្នៃម៉ូដ។ ក្រោយហាងកាត់ដេរប៉ារ៉ាឌី មានឈ្មោះល្បីល្បាញក្នុងទីក្រុងភ្នំពេញ អ្នកស្រី ឌី ម៉ាឡែន អ្នករចនាម៉ូដ និងជាអ្នកគ្រប់គ្រងហាងកាត់ដេរប៉ារ៉ាឌីបានបើកហាងសម្អាងការប៉ារ៉ាឌី មួយផ្សេងទៀត ដោយទទួលបានប្រជាប្រិយភាពបំផុតក្នុងតារាងអ្នកច្នៃម៉ូដក្នុងប្រទេស។
ប្រឡូកក្នុងអាជីពនេះអ្នកស្រីបានខិតខំប្រឹងប្រែងតស៊ូ និងរកអ្វីថ្មីៗ រហូតសម្អាងការមួយនេះល្បីល្បាញខ្លាំង ខណៈទើបតែដំណើរការ ៣ ឆ្នាំប៉ុណ្ណោះមកទល់ពេលនេះ។ ត្រង់ចំណុចនេះអ្នកស្រី បានឱ្យដឹងថា នេះក៏ដោយសារតែ អ្នកស្រីមានហាងកាត់ដេរប៉ារ៉ាឌី ដែលអាយុកាលជាង ១០ ឆ្នាំ ជាគ្រឹះដ៏រឹងមាំនៃសេចក្ដីទុកចិត្តរបស់អតិថិជន។
យ៉ាងណាក៏ដោយ អ្នកស្រីបានសង្កត់ធ្ងន់ថា បើទោះមានដើមទុនច្រើន មានកេរ្តិ៍ឈ្មោះល្បីហើយ មិនប្រាកដថា ទៅបើកអាជីវកម្មមួយទៀត បានផ្លែផ្កាល្អឡើយ ព្រោះការធ្វើអាជីវកម្ម ត្រូវការជាចាំ បាច់នូវការស្រលាញ់ តស៊ូ អំណត់ព្យាយាម គ្រឹះ គោលជំហរច្បាស់លាស់ និងមិនត្រូវបាក់ទឹកចិត្តឡើយ។
មិនលាក់បាំងទេអ្នកស្រី ឌី ម៉ាឡែន ធ្លាប់បាក់ទឹកចិត្តក្នុងអាជីវកម្ម តែមិនបោះបង់ អ្នកស្រីថា មិនប្រាកដថា បើកជំនួញមួយទទួលជោគជ័យ បើកមួយទៀតបានជោគជ័យទេ ប៉ុន្តែភាពបរាជ័យគឺជាមេរៀនឈានទៅរកភាពជោគជ័យ។
ខណៈយុវវ័យបច្ចុប្បន្នមាននិន្នាការនិយមរបស់ Brand Brand នាំចូលពីបរទេស ហើយអ្នកខ្លះទៀតនិយាយថា ហូលផាមួងខ្មែរមានការពិបាកក្នុងការស្លៀកពាក់ ទាំងនេះគឺជាកង្វល់របស់អ្នកច្នៃម៉ូដគ្រប់រូប។ ឆ្លើយតបទៅនឹងការបាត់បង់នៃការ និយមសម្លៀកបំពាក់ខ្មែរធ្វើពីសូត្រ ឬក៏ហូលផាមួង អ្នកស្រីម៉ាឡែន នឹងបន្តយកហូលផាមួងខ្មែរមកច្នៃជាម៉ូដសម័យ ឲ្យបានកាន់តែច្រើន អ្នកស្រីថា «ក្នុងនាមជាអ្នកច្នៃម៉ូដម្នាក់យើងត្រូវចេះស្រលាញ់នូវអ្វីដែលវប្បធម៌ប្រពៃណីរបស់ជាតិ យើងឈឺចាប់ណាស់ពេលឃើញគេបោះបង់ចោលនូវអ្វីដែលជារបស់ខ្មែរ»។
អ្វីជាក្ដីព្រួយបារម្ភចំពោះអាជីវកម្ម ក្នុងពេលអនាគត? «បារម្ភរាល់ថ្ងៃ តែមិនមែនបារម្ភថា ធ្វើអីចាញ់គេទេ គឺខ្លាចភាពដដែលៗ ហើយត្រូវគិតថា អតិថិជនចង់បានអ្វី?"។ អ្នកស្រីបន្ថែម។
ព័ត៌មានលម្អិត សូមទស្សនាការបកស្រាយរបស់អ្នកស្រី ម៉ាឡែម វគ្គ Coffee Time នៃកម្មវិធី ៣០ដេលី កាលពីថ្មីៗនេះ៖