ជំងឺធំៗ៥យ៉ាងអាចទប់ស្កាត់បាន បើញ៉ាំត្របែកឱ្យបានជាប្រចាំ

2020-03-12 11:10:00
ចំនួនមតិ 0 | ចំនួនចែករំលែក 0

នៅក្នុងផ្លែត្របែកមានសារធាតុសំខាន់ៗជាច្រើនដែលផ្ដល់ផលប្រយោជន៍ដល់ស្បែក និងសុខភាពមនុស្ស។ វាមានខ្លាញ់ឆ្អែតខ្លួន ខូលេស្តេរ៉ូល និងជាតិសូដ្យូមទាប តែសម្បូរទៅដោយជាតិកាកសរសៃ វីតាមីន C និង A ស័ង្កសី ប៉ូតាស្យូម និងម៉ង់កាណែសដែលអាចជួយសម្រួលប្រព័ន្ធរំលាយអាហារ ការថែរក្សាសម្រស់ និងប្រសិទ្ធភាពក្នុងការព្យាបាលជំងឺបានច្រើនយ៉ាង។

យើងនឹងមកមើលគុណប្រយោជន៍ដ៏លើសលប់របស់ផ្លែត្របែកសម្រាប់ជីវភាពប្រចាំថ្ងៃដែលប្រហែលមានមនុស្សតិចណាស់អាចដឹង។

១. ទប់ស្កាត់បញ្ហាសម្ពាធឈាមឡើងខ្ពស់

យោងតាមការសិក្សាផ្នែកវេជ្ជសាស្ត្រជាច្រើនបានរកឃើញថា កាលណារាងកាយទទួលបានអាហារដែលមិនសូវមានជាតិកាកសរសៃទេនោះ វាអាចប្រឈមនឹងការធ្វើឱ្យសម្ពាធឈាមឡើងខ្ពស់ ហើយអាហារដែលញ៉ាំចូលទៅនោះនឹងប្រែខ្លួនទៅជាជាតិស្ករ។

ដោយសារតែក្នុងផ្លែត្របែកសម្បូរជាតិកាកសរសៃ ទើបវាមានកម្រិតជាតិស្ករតិច ហើយក៏អាចជួយកាត់បន្ថយសម្ពាធឈាមបានផង។ ក្រៅពីនេះ ត្របែកនឹងជួយកាត់បន្ថយកម្រិតខូលេស្តេរ៉ូលក្នុងឈាម ការពារដំណើរការដែលនាំឱ្យឈាមទៅជាខាប់ ទប់ស្កាត់បញ្ហាស្ទះសរសៃឈាម និងជួយឱ្យឈាមរត់បានស្រួល។

២. ទប់ស្កាត់មហារីក

ការសិក្សាផ្សេងទៀតក៏បានរកឃើញថា សារធាតុលីកូពីនដែលមាននៅក្នុងស្លឹកត្របែកអាចជួយការពារជំងឺមហារីកបាន។ មិនតែប៉ុណ្ណោះ អាស៊ីតហ្វូលិចដែលមានក្នុងផ្លែត្របែកទាំងមូលក៏អាចកាត់បន្ថយមហារីកក្រពះបានទៀតផង។

៣. ទប់ស្កាត់ជំងឺទាំងឡាយដែលពាក់ព័ន្ធនឹងក្រពះនិងពោះវៀនតូច

កុំគិតថា ការញ៉ាំត្របែកច្រើនធ្វើឱ្យប៉ះពាល់ដល់ការរំលាយអាហារដូចដែលមនុស្សភាគច្រើនយល់ឃើញនោះអី។ ការពិតត្របែកល្អបំផុតសម្រាប់ដំណើរការរំលាយអាហារ ព្រោះវាមានជាតិប៉ូតាស្យូម សារធាតុ Carotenoid ដែលជាជាតិពណ៌លឿង ឬក្រហម ផ្កាឈូកនៅក្នុងផ្លែឈើ និងវីតាមីន C ដែលជួយព្យាបាលការរលាកក្រពះ សម្រួលដំណើរការរំលាយអាហារឱ្យដើរស្រួល ទប់ស្កាត់និងព្យាបាលរាករូសបានយ៉ាងមានប្រសិទ្ធភាព។

៤. ទប់ស្កាត់ជំងឺធាត់

ផ្លែត្របែកអាចចូលទៅបណ្ដេញជាតិខ្លាញ់ក្នុងរាងកាយ និងធ្វើឱ្យរាងកាយស្លីមស្អាតបាន។ ជាពិសេសសម្រាប់ប្រភេទត្របែកដែលមានសាច់ផ្កាឈូកមានសារធាតុលីកូពីនច្រើនជាងផ្លែប៉េងប៉ោះទៅទៀតដែលមិនត្រឹមតែអាចជួយកាត់បន្ថយជំងឺទាក់ទងនឹងភាពធាត់ តែថែមទាំងអាចទប់ស្កាត់ជំងឺផ្សេងៗដូចជាទឹកនោមផ្អែម និងហានិភ័យនៃជំងឺពាក់ព័ន្ធនឹងសរសៃឈាមបេះដូងបានទៀតផង។

៥. ទប់ស្កាត់ការកើតជំងឺខ្វះឈាមក្រហមបានយ៉ាងមានប្រសិទ្ធភាព

មានមនុស្សតិចណាស់ដែលដឹងពីគុណប្រយោជន៍ដ៏សំខាន់មួយនេះ។ សម្រាប់អ្នកជំងឺខ្វះឈាមក្រហម ក្រៅពីញ៉ាំអាហារឱ្យបានគ្រប់គ្រាន់ ផឹកថ្នាំជាតិដែកជាប្រចាំហើយ ការញ៉ាំផ្លែត្របែក ឬផឹកទឹកត្របែករាល់ថ្ងៃក៏អាចជួយព្យាបាលជំងឺនេះបានដែរ ព្រោះតែនៅក្នុងផ្លែត្របែកនេះសម្បូរទៅដោយសារធាតុបំប៉នសំខាន់ៗដូចរៀបរាប់ខាងលើ ដែលមានតម្លៃក្នុងការទៅបង្កើនកម្រិតគោលិកាក្រហមបានយ៉ាងល្អ។

ក្រៅពីជំងឺធំៗខាងលើនេះ ត្របែកក៏អាចជួយដោះស្រាយបញ្ហាសុខភាពនិងសម្រស់ផ្សេងទៀតដូចជា៖

-បំបាត់អាការៈឈឺធ្មេញ៖ ផឹកទឹកដែលពូតពីស្លឹកត្របែកអាចកាត់បន្ថយការឈឺធ្មេញបាត់ដូចគេបេះ។ ក្រៅពីនេះ ស្លឹកត្របែកក៏អាចព្យាបាលការហើមអញ្ចាញ និងដំបៅក្នុងមាត់បានទៀត។

-សម្រាប់អ្នកផ្ទៃពោះ៖ អាស៊ីតហ្វូលិក និងវីតាមីន B9 ក្នុងផ្លែត្របែកល្អបំផុតសម្រាប់ការលូតលាស់ប្រព័ន្ធប្រសាទរបស់គភ៌ និងទប់ស្កាត់ភាពមិនប្រក្រតីនៃប្រព័ន្ធប្រសាទរបស់ទារក។

-ជំនួយភ្នែក៖ វីតាមីន A ក្នុងផ្លែត្របែកមិនត្រឹមតែអាចទប់ស្កាត់ការចុះអន់ខ្សោយនៃការមើលប៉ុណ្ណោះទេ ថែមទាំងអាចជំរុញការមើលឱ្យបានច្បាស់ជាងមុនទៀតផង៕

ប្រភព៖ NDTV | kenhphunu ប្រែសម្រួល៖ សរ សុគន្ធី