៧ ចំណុចបង្ហាញថាអ្នកកំពុងប្រើប្រាស់បណ្តាញសង្គមច្រើនជ្រុល និង អាចវិវត្តទៅជាជំងឺបាក់ទឹកចិត្ត

2020-02-06 07:00:00
ចំនួនមតិ 0 | ចំនួនចែករំលែក 0

សព្វថ្ងៃ យើងសង្កេតឃើញថាផ្នែកបច្ចេកវិទ្យាបានក្លាយទៅជាចំណែកមួយដែលសំខាន់នៅក្នុងជីវិតរស់នៅប្រចាំថ្ងៃរបស់មនុស្សជុំវិញសកលលោក។ ស្របពេលដែលបច្ចេកវិទ្យាកាន់តែទំនើប និង មានភាពងាយស្រួល ម្នាក់ៗកាន់តែមមាញឹកជាមួយនឹងការប្រើប្រាស់វា។ យ៉ាងណាមិញ ពួកគេសុទ្ធតែប្រើប្រាស់វាក្នុងគោលបំណងផ្សេងគ្នា អ្នកខ្លះប្រកបអាជីវកម្មអនឡាញ អ្នកខ្លះប្រើសម្រាប់ទាក់ទងមិត្ត និង គ្រួសារ ឯអ្នកខ្លះគឺចាត់ទុកវាជាកន្លែងបញ្ចេញអារម្មណ៍ជាដើម។ ទោះជាប្រើប្រាស់ក្នុងគោលបំណងណាក្តី អ្នកមិនគួរផ្អែកទៅលើវាទាំងស្រុងក្នុងការរស់នៅប្រចាំថ្ងៃនោះឡើយ។

រូបតំណាង

អ្នកជំនាញផ្នែកចិត្តវិទ្យាមួយរូបបាននិយាយថា មនុស្សលោកគ្រប់រូបសុទ្ធតែត្រូវការការពេញចិត្តពីអ្នកដទៃជុំវិញខ្លួន។ លើសពីនេះទៀត ជាមួយនឹងភាពរីកចម្រើននៃប្រព័ន្ធផ្សព្វផ្សាយសង្គមទាំងនេះ មនុស្សកាន់តែចំណាយពេលច្រើនជាមួយនឹងរបស់ទាំងនេះ ដែលអាចបង្កជាបញ្ហាផ្នែកផ្លូវចិត្តជាច្រើន ដោយមិនដឹងខ្លួន។ គេសង្កេតឃើញថាអ្នកដែលជានិច្ចកាលតែងចំណាយពេលវេលារបស់ខ្លួននៅលើប្រព័ន្ធផ្សព្វផ្សាយសង្គម រួមមាន **Facebook Instagram Twitter** ជាដើម សុទ្ធសឹងតែមនុស្សដែលមិនសូវមានពេលវេលារស់នៅក្នុងពិភពខាងក្រៅឡើយ ពោលគឺពួកគេយកចិត្តទុកដាក់លើអ្វីៗដែលកើតមានឡើងក្នុងប្រព័ន្ធទាំងនោះច្រើនជ្រុលរហូតពេលខ្លះផ្តាច់ខ្លួនពីមនុស្សដែលស្ថិតនៅជុំវិញខ្លួនគេពិតប្រាកដក៏មាន ដែលសុទ្ធសឹងជាអាការៈនៃបញ្ហាផ្លូវចិត្ត។

រូបតំណាង

៧ ចំណុចខាងក្រោមជាសញ្ញាដែលបង្ហាញថាអ្នកជាមនុស្សដែលញៀននឹងការប្រើប្រព័ន្ធទំនាក់ទំនងច្រើនជ្រុល ហើយ គួរតែកាត់បន្ថយខ្លះ បើមិនចង់ឱ្យវាបង្កទៅជាបញ្ហាផ្លូវចិត្តនៅថ្ងៃក្រោយ៖

១. ចំណាយពេលនៅលើប្រព័ន្ធផ្សព្វផ្សាយសង្គមច្រើនជាងការគិត

២. ពេលមិនបានលេង មានអារម្មណ៍មិនសុខក្នុងខ្លួន

៣. មានការរំពឹងទុក និង ព្យាយាមទាមទារអ្វីដែលខ្លួនចង់បានពីប្រព័ន្ធទាំងនោះ

៤. តែងតែគិតពីវា មិនថាអ្នកកំពុងធ្វើអ្វី

៥. យកវាជាមធ្យោបាយបំបាត់ទុក្ខកង្វល់

៦. សុខចិត្តកុហក ឬ លាក់បាំង ដើម្បីបានលេង

៧. បណ្តាញសង្គមជាមូលហេតុធ្វើឱ្យអ្នកមានបញ្ហាក្នុងការងារ ឬ ជាមួយមនុស្សជាទីស្រឡាញ់

រូបតំណាង

ចំណុចទាំងអស់នេះសុទ្ធសឹងតែជាសញ្ញាបង្ហើបថា ប្រព័ន្ធទំនាក់ទំនងសង្គមកំពុងមានឥទ្ធិពលខ្លាំងមកលើជីវិតរស់នៅរបស់អ្នក ហើយ អាចធ្វើឱ្យប្រឈមទៅនឹងការកើតបញ្ហាផ្នែកផ្លូវចិត្ត បើមិនធ្វើការកាត់បន្ថយចំណាយពេលលេងវានៅគ្រប់កាលៈទេសៈ ឬ ញឹកញាប់ជ្រុល៕