សញ្ញាបង្ហាញថា តាមពិតមិត្តប្រុសចង់បែកគ្នាយូរណាស់ហើយ គ្រាន់តែអ្នកមិនចាប់អារម្មណ៍
- 2020-01-13 04:20:00
- ចំនួនមតិ 0 | ចំនួនចែករំលែក 0
សញ្ញាបង្ហាញថា តាមពិតមិត្តប្រុសចង់បែកគ្នាយូរណាស់ហើយ គ្រាន់តែអ្នកមិនចាប់អារម្មណ៍
គ្រប់ទំនាក់ទំនងទាំងអស់ គ្មានគូណាដែលថាគ្មានបញ្ហានឹងគ្នាទេ។ តែវាអាស្រ័យថាតើមនុស្ស២នាក់ តាំងចិត្តចង់ផ្សះផ្សា ដើម្បីកាន់ដៃបន្តទៀតឬអត់? រូបភាពមួយសន្លឹកលើបណ្ដាញសង្គមរបស់អ្នកនិងគាត់ នៅតែសើចស្រស់ដាក់កាមេរ៉ាដដែរ តែអ្នកធ្លាប់សង្ស័យឃើញការលាក់បាំងមួយរបស់ស្នេហានេះឬនៅ? ពេលបញ្ហាដើរចូលមក គាត់នៅរឹងមាំកាន់ដៃអ្នកតតាំងនឹងវាដូចមុនឬអត់?
សញ្ញាមួយចំនួនបានលេចចេញខ្លះៗហើយ តែអ្នកគ្រាន់តែមិនចាប់អារម្មណ៍និងបន្លប់ចិត្តខ្លួនឯងថា ចានក្នុងរាវតែងទង្គិចគ្នា ជារឿងធម្មតា រហូតលែងហ៊ានទទួលស្គាល់ថា គេប្រែចិត្តមិនដូចមុនទៀត។ ខាងក្រោមនេះ ជាសញ្ញាមួយចំនួនបង្ហាញថា មិត្តប្រុសអ្នកចង់បែកគ្នាយូរមកហើយ តែអ្នកគ្រាន់មិនដឹងប៉ុណ្ណោះ។
១. មិនអានសារ
អ្នកធ្លាប់ចាប់អារម្មណ៍ថា ពេលខ្លះសារដែលអ្នកផ្ញើរទៅ គាត់មិនខ្ចីនឹងបើកមើល ឬមើលហើយតែមិនតបដែរទេ? នោះមកពីគាត់គិតថា គ្មានសារៈសំខាន់ចំពោះគាត់។ គាត់លែងយកចិត្តទុកដាក់នឹងអ្វីដែលអ្នកផ្ញើរ។ ជួនកាល ថែមទាំងគាត់មានរឿងជាច្រើនលាក់បាំង សូម្បីពេលនិយាយក៏មិនស្ដាប់ ។ គាត់ចាប់អារម្មណ៍លើរឿងផ្សេង ដែលគ្មានវត្តមានរបស់អ្នកជាង។
២. មិនចង់ធ្វើអ្វីរួមគ្នាជាមួយអ្នក
ពេលស្រលាញ់នរណាម្នាក់ យើងតែងចង់ចែករំលែកគ្រប់យ៉ាងទៅគេ ចែករំលែកមិនថារឿងពិបាកចិត្ត ឬសប្បាយចិត្តនោះទេ។ ប៉ុន្តែសម្រាប់គាត់វិញ គាត់បែរជាធ្វើខ្លួនដូចនៅម្នាក់ឯង។ សូម្បីដើរលេងជាមួយមិត្តភក្កិក៏មិនបបួលយើងទៅ ហើយថែមទាំងមិនចង់ឲ្យយើងចូលមកក្នុងផ្នែកមួយនៃជីវិតប្រចាំថ្ងៃរបស់គេ។ ការរស់នៅបែបនេះ ពិតជាគួរឲ្យខ្លាចខ្លាំងណាស់ ព្រោះគាត់លែងចង់ធ្វើអ្វីជាមួយអ្នកដូចកាលពីមុនទៀតហើយ។
លើសពីនេះ មិនថារឿងល្អឬអាក្រក់ ក៏គាត់មិនចង់ចែករំលែកអ្វីជាមួយអ្នកទៀតដែរ បើទោះកាលពីមុនអ្នកជាមនុស្សដំបូងដែលតែងដឹងរឿងគ្រប់យ៉ាងអំពីគាត់ក៏ដោយ។ គាត់ធ្លាប់ជាមនុស្សម្នាក់ដែលតែងលួងអ្នកនៅពេលស្រេ្តស ប៉ុន្តែថ្ងៃនេះគាត់ជ្រើសរើសប្រាប់គ្រប់យ៉ាងទៅអ្នកផ្សេងដោយមានទំនុកចិត្តជាង។ នេះមិនមែនមកពីគាត់ខ្លាចអ្នកដឹងរឿងរបស់គាត់ទេ តែមកពីគាត់លែងខ្វល់ពីអ្នកទៀតហើយ។
៣. បង្ករឿង
គាត់រករឿងឈ្លោះប្រកែក ធ្វើយ៉ាងណាដើម្បីកុំឲ្យមានទំនាក់ទំនងជាមួយអ្នកបន្តទៀត។ នេះពិតជាលេសដ៏សាហាវដែលគាត់ធ្វើដើម្បីខ្លួនឯង។ ពេលមានរឿងម្ដងៗគាត់នៅស្ងៀមធ្វើដូចគ្មានអ្វីកើតឡើង ទុកឲ្យអ្នកគ្រាំគ្រាម្នាក់ឯងប្រៀបដូចមនុស្សឆ្កួត។ ពេលវេលាដែលកន្លងផុតគិតពីគេមួយនាទី មិនខុសពីដូចមួយឆ្នាំ។
៤. ឈាមត្រជាក់
បើពេលទៅណាតែ២នាក់ ហើយមិត្តភក្កិគាត់ជួបចៃដន្យនិងសួរថា តើអ្នកត្រូវជាអ្វីនឹងគ្នា? គាត់នៅស្ងៀមនិងអេះអុញឆ្លើយ នោះជាសញ្ញាយ៉ាងច្បាស់ថា ចិត្តរបស់គាត់មិនមែននៅស្រលាញ់អ្នក១០០% ឡើយ ។ ទោះមិនទាន់និយាយថាបែកគ្នាក៏ដោយ តែចិត្តរបស់គាត់បានផ្លាស់ប្ដូរហើយ។
”បងចង់ឃើញអូន ជួបមនុស្សដែលល្អជាងនេះ" បើគាត់និយាយឃ្លានេះចេញមក គាត់អត់ស្រលាញ់អ្នកខ្លាំងទេ គឺគាត់ស្រលាញ់ខ្លួនឯងខ្លាំងជាង។ គាត់គ្រាន់តែមិនចង់ធ្វើជាមនុស្សអាក្រក់ពេញទី ដូច្នេះទើបគាត់ជូនពរអ្នកដោយមួយឃ្លានេះ ៕
ពេលខ្លះ យើងបានព្យាយាមកាន់ដៃមនុស្សម្នាក់នោះហើយ ប៉ុន្តែចិត្តរបស់គេតែងតែប្រាប់យើងថាឲ្យលែងគេទៅ។ ដោយសារតែក្ដីស្រលាញ់មិនអាចបង្ខំបាន ទោះអនុស្សាវរីយ៍ច្រើនពាន់យ៉ាងណា ក៏មិនអាចចងជើងគេបានឡើយ។ នេះហើយជាទំនាក់ទំនងដែលមិនអាចដើរទៅមុខជាមួយគ្នាបន្តទៀតបាន គឺការបាក់បែកដែលត្រូវនិយាយពាក្យថា លាហើយ៕
អានបន្ត៖ យ៉ាងម៉េចក៏ដោយ សូមកុំស្រលាញ់មនុស្សម្នាក់ ដើម្បីបំភ្លេចមនុស្សម្នាក់ឲ្យសោះ