នៅ Single យូរចង់រៀបការឆាប់ៗ តែបើភ្លេចគិត ៦ចំណុចនេះ អាចទឹកភ្នែកជូតក្បាលជង្គង់
- 2019-12-30 09:15:00
- ចំនួនមតិ 0 | ចំនួនចែករំលែក 0
នៅ Single យូរចង់រៀបការឆាប់ៗ តែបើភ្លេចគិត ៦ចំណុចនេះ អាចទឹកភ្នែកជូតក្បាលជង្គង់
ពេលនៅ Single យូរ ម្នាក់ៗចង់រៀបការឆាប់ៗ ព្រោះគិតថាលែងនៅម្នាក់ឯង មិនឯកោទៀត។ តែជីវិតអាពាហ៍ពិពាហ៍មិនសប្បាយដូចរឿងព្រេងនិទានដែលគេនិពន្ធឡើយ ព្រោះនៅពេលអ្នករៀបការ គឺដូចបើកទំព័រជីវិតថ្មីដែរ។ ក្រៅពីនោះ បញ្ហាក៏អាចកើតឡើងបានគ្រប់ពេល ដែលអ្នកត្រូវតែយកចិត្តទុកដាក់គិតគូឲ្យបានមុនពេលអាពាហ៍ពិពាហ៍ឈានចូលមកដល់។
**១. ត្រូវចាំថា មិនមែនរៀបការជាមួយស្វាមីម្នាក់ប៉ុណ្ណោះទេ តែអ្នកត្រូវរៀបការជាមួយសាច់ញាតិគាត់ដែរ**
អាពាហ៍ពិពាហ៍ក្នុងជីវិតពិតគឺខុសគ្នាខ្លាំងពីក្នុងរឿងភាគបែបរ៉ូមែនទិក ព្រោះជីវិតនៅពេលនោះមិនមែនត្រឹមសម្រាប់មនុស្ស ២នាក់ឡើយ។ អ្នកត្រូវតែជិតស្និទ្ធនឹងក្រុមគ្រួសារខាងប្តី ព្រោះសាច់ញាតិរបស់គាត់ក៏ត្រូវចាត់ទុកជាសាច់ញាតិអ្នកដូចគ្នា។ ម្យ៉ាងទៀត ទោះកូនប្រុសរៀបការចេញទៅរស់នៅជាមួយខាងស្រីក៏ដោយ តែទំនាក់ទំនងរវាងសាច់ញាតិពួកគេនៅតែមាន។
បើអ្នកជាមនុស្សឆ្លាត អាចគ្មានទំនាស់នឹងសាច់ញាតិរបស់គេបាននោះគឺសំណាងធំហើយ។ តែបើមានបញ្ហាជាមួយសូម្បីមនុស្សម្នាក់ ច្បាស់ជាមិនងាយរកសុភមង្គលបានឡើយ។ ថ្វីដ្បិតអ្នកមិនមែនឈាមជ័រជាមួយពួកគេក៏ដោយ សូមព្យាយាមកុំបង្កើតជម្លោះជាមួយពួកគេឲ្យសោះ ព្រោះបានត្រឹមឈឺក្បាលវិលមុខរកទុក្ខដាក់ខ្លួនប៉ុណ្ណោះ។ ម្ល៉ោះហើយ មុនពេលរៀបការ អ្នកត្រូវឆ្លាតវៃព្យាយាមធ្វើជាមនុស្សល្អក្នុងក្រសែភ្នែករបស់សាច់ញាតិទាំងសងខាង។
២. ត្រៀមខ្លួនឲ្យរួចរាល់ ចុះសម្រុងនឹងទស្សនៈវិស័យរបស់ដៃគូ
ពេលជាសង្សារ បើខឹងគ្នាមិនយល់ចិត្តគ្នា អ្នកអាចអត់ជួបមុខ១ថ្ងៃ ២ថ្ងៃ នោះគឺអាចកៃខៃស្ថានការណ៍បានហើយ។ តែពេលជាប្តីប្រពន្ធ វិធីនេះដាច់ខាតមិនអាចធ្វើបានទៀតឡើយ។ អ្នកច្បាស់ជាឆ្កួតស្លាប់មិនខាន នៅពេលឃើញម្នាក់ទៀត ងង៉ក់មិនឈប់ឈរ ពួនតែក្នុងបន្ទប់មិនព្រមចេញមកនិយាយគ្នា។ ដូច្នេះ ត្រៀមចិត្តឲ្យហើយ យល់ពីគ្នាឲ្យច្បាស់ ថាទស្សនៈរបស់ដៃគូម្នាក់ៗជាមនុស្សបែបណា។
៣. ទាំងការងារផ្ទះនិងក្រៅ ត្រូវពិភាក្សាគ្នាឲ្យច្បាស់
អាពាហ៍ពិពាហ៍ អាចធ្វើឲ្យជីវិតមនុស្សឆ្លាស់ប្ដូរបានខុសពីមុនដាច់ស្រឡះ។ មានអ្នកខ្លះ សុខចិត្តឈប់ធ្វើការដើម្បីធ្វើជាស្រ្តីមេផ្ទះម្នាក់ដ៏ល្អ ហើយខ្លះទៀតនៅតែបន្តការងារផងធ្វើការងារផ្ទះផងយ៉ាងហត់នឿយ។ ម្ល៉ោះហើយ នេះជារឿងសំខាន់ដែលអ្នកត្រូវជជែកគ្នាឲ្យច្បាស់ដើម្បីជួយចែករំលែកការងារក្នុងផ្ទះជាមួយប្ដី។ មួយវិញទៀត បើសេដ្ឋកិច្ចគ្រួសារធូរធារ អ្នកអាចរកមនុស្សម្នាក់មកជំនួសដៃជើងធ្វើការងារផ្ទះ នោះអ្នកនឹងមិនហត់នឿយ ហើយមានពេលវេលាច្រើនដើម្បីធ្វើកិច្ចការផ្សេងៗបានល្អ។
៤. ភាពជាឯកជនត្រូវតែមានខ្លះ
ពិតណាស់ ប្ដីប្រពន្ធត្រូវរស់នៅជាមួយគ្នាក្នុងផ្ទះតែមួយ ប៉ុន្តែក៏ត្រូវផ្ដល់សិទ្ធនិងគោរពភាពជាឯកជនរបស់គ្នាទៅវិញទៅមកដែរ។ ឧទាហរណ៍ដូចជា អ្នកចង់ដើរលេងជាមួយមិត្តភក្កិធ្លាប់រៀនជាមួយគ្នាកាលនៅវិទ្យាល័យ ដូច្នេះប្ដីគួរអនុញ្ញាតឲ្យប្រពន្ធបានចូលរួមដំណើរកម្សាន្តនេះ។ ប៉ុន្តែសា្វមីខ្លះបែរជាបិទសិទ្ធ មិនឲ្យធ្វើអ្វីក្រៅពីការងារផ្ទះ ដែលនេះជាការរំលោភបំពានសិទ្ធយ៉ាងធ្ងន់ធ្ងរ។ ទាំងនេះ ធ្វើឲ្យខ្វះសុភមង្គលក្នុងជីវិតរហូតក្លាយទៅជាមានបញ្ហា។ ដូច្នេះ ត្រូវព្យាយាមជជែកដាក់គ្នា ដាក់សំនួរ បើកចិត្តឆ្លើយទៅវិញទៅមក។
៥. ដោះស្រាយបញ្ហាលុយកាក់
ត្រូវពិភាក្សាគ្នាឲ្យហើយថា នរណាគួរទុកដាក់លុយកាក់ ហើយនៅពេលចាយវាយអស់ច្រើនម្តងៗម្នាក់ទៀតគួរប្រាប់គ្នាឲ្យដឹង។ កុំធ្វើឲ្យប្តីប្រពន្ធល្អក់កករនឹងគ្នាដោយសារតែបញ្ហាលុយ។ ថ្វីដ្បិតកាបូបលុយផ្សេងគ្នា តែត្រូវរៀបចំការចំណាយរួមគ្នា ទើបល្អ។
៦. រៀបការរួច ចង់មានកូននៅពេលណា?
នេះជារឿងសំខាន់ខ្លាំង ព្រោះក្រោយរៀបការ ក្ដីសង្ឃឹមរបស់ស្វាមីភរិយាជាច្រើន គឺចង់បានបុត្រធីតា។ ប៉ុន្តែ ជួនកាលប្រពន្ធចង់បាន បែរជាប្ដីមិនទាន់ចង់បាន បង្កជាបញ្ហាក្នុងគ្រួសារទៅវិញ។ នៅពេលមានកូន គ្រប់យ៉ាងត្រូវផ្លាស់ប្ដូរជារៀងរហូត មិនថាហិរញ្ញវត្ថុ ពេលវេលា ស្ទីលស្លៀកពាក់ជាដើម។ គូខ្លះ គេបានត្រៀមខ្លួនរួចរាល់ដើម្បីមានកូន តែខ្លះវិញបែរជាគិតថានេះជារឿងគួរធុញទ្រាន់បំផុត។ អ៊ីចឹងហើយ ទើបបញ្ហានេះគឺជារឿងសំខាន់ ។ ត្រូវសួរថា តើប្ដី ឬប្រពន្ធរបស់អ្នកចង់មានកូនជាមួយគ្នាឬអត់? ឬក៏មានគម្រោងនឹងយកកូននៅពេលណា?
ក្នុងជីវិតអាពាហ៍ពិពាហ៍ ពេលខ្លះវាមិនគួរឲ្យខ្លាចដូចអ្នកគិតឡើយ បើអ្នកបានចំណាយពេលសិក្សាពីគ្នា យល់ពីគ្នា ហើយជាពិសេសមានការជជែកគ្នាបានទៀងទាត់នៅបញ្ហាខាងលើ។ នោះជីវិតប្ដីប្រពន្ធច្បាស់ជារលូន មិនស្មុគស្មាញនោះទេ។ យ៉ាងណាក៏ដោយ ត្រូវគិតអំពីរឿងរ៉ាវទាំងនេះ មុនពេលបញ្ហាមកដល់ ដូច្នេះវាមិនធ្វើឲ្យខកចិត្ត ឬត្រូវលែងលះគ្នាទាំងកណ្ដាលទីឡើយ៕
អានបន្ត៖ រកឃើញ ៥ ចំណុចនេះលើខ្លួនបុរសណា អ្នកអាចរៀបការជាមួយគេបានហើយ