តើស្ត្រីទើបសម្រាលកូនហើយធ្វើចលនាភ្លាមនឹងឈឺច្រើន ដូចចាស់ៗប្រាប់ត្រឹមត្រូវឬទេ?
- 2019-12-27 03:00:00
- ចំនួនមតិ 0 | ចំនួនចែករំលែក 0
តើស្ត្រីទើបសម្រាលកូនហើយធ្វើចលនាភ្លាមនឹងឈឺច្រើន ដូចចាស់ៗប្រាប់ត្រឹមត្រូវឬទេ?
ប្រជាជនខ្មែរជាពិសេសចាស់ៗ តែងផ្ដាំស្រ្តីទើបសម្រាលកូនរួចមិនឲ្យធ្វើចលនា ដើរ អង្គុយ ឬឈរឡើយ។ ស្ត្រីត្រូវបានបង្គាប់ឲ្យសម្រាកមួយកន្លែង មិនឲ្យងូតទឹកកក់សក់ ខ្លះទៀតពាក់មួក ស្រោមជើង ព្រោះយល់ថាសរសៃខ្ចី ការពារបែបនេះទើបមិនមានជំងឺផ្សេងៗធ្វើឲ្យចុករោយនៅថ្ងៃខាងមុខ ហើយនៅមាំទាំពេលចាស់ទៅ។
ប៉ុន្តែយោងតាមការសម្ភាសន៍របស់ **កញ្ញា** ជាមួយគ្រូពេទ្យជំនាញផ្នែកសម្ភព អ្នកគ្រូ **លី ឈីវអៀង** បានពន្យល់ថា៖ "បើយើងប្រៀបធៀបស្ត្រីខ្មែរនិងស្ត្រីបរទេស យើងសួរទៅមើលថាស្ត្រីបរទេសគាត់មានបញ្ហានេះដែរឬទេ? បើយើងប្រៀបធៀបស្ត្រីបរទេសពេលកើតហើយ គាត់ងើបដើរគាត់ងូតទឹកកក់សក់ សម្អាតខ្លួនគាត់មួយស្អាត។ តែស្ត្រីខ្មែរយើងពេលកើតហើយពាក់មួកផង យកសំឡីញ៉ុកត្រចៀកផង ដេកលើគ្រែរហូតគ្មានចលនាអីសោះ។ អញ្ចឹងទម្លាប់ពីរនេះគឺខុសគ្នាដាច់ ចំណែកការស្រួលខ្លួនក៏អត់ដូចគ្នាដែរ។ បើស្ត្រីដែលគាត់សម្រាលកូនដោយធម្មជាតិ ក្រោយពី ៦ ទៅ ៨ ម៉ោងអីយើងឲ្យគាត់ដើរហើយ ហើយអ្នកវះកាត់គឺ ២៤ ម៉ោងបន្ទាប់ពីដកទុយយោទឹកនោមគាត់ត្រូវព្យាយាមងើបដើរហើយ។ អញ្ចឹងកាលណាគាត់ឆាប់ងើបដើរគាត់ឆាប់ស្រួលខ្លួនហើយ។ កាលណាគាត់គេងច្រើន សម្រាកច្រើននៅមួយកន្លែង ឈាមក៏ធ្លាក់ក្រអស់ គាត់អត់បានធ្វើចលនាសរសៃអីក៏មិនងាយវិលមកធម្មតាវិញដែរ។ និយាយរួមក្នុងខ្លួនយើងចាំបាច់ត្រូវធ្វើចលនាហើយ ដើម្បីឲ្យមានចរន្តក្នុងខ្លួនបានល្អ បើគាត់អត់មានចលនាអ្វីសោះធ្វើមេចស្រួលខ្លួន"?
អ្នកគ្រូ លី ឈីវអៀង បានបញ្ជាក់ទៀតថា ការធ្វើចលនា ក្រោយសម្រាលរួចជួយឲ្យស្ត្រីឆាប់ធ្លាក់ឈាមមកអស់ ហើយត្រលប់មកសភាពប្រក្រតីវិញ។ វេជ្ជបណ្ឌិតខាងលើបានពន្យល់បន្ថែមទៀតថា៖ "ជាទូទៅស្ត្រីធ្លាក់ឈាមក្រោយសម្រាលនឹងកើតមានសំខាន់ជាងគេ គឺថ្ងៃដំបូង និងថ្ងៃទី ២ ហើយរយៈពេលដែលគាត់គេងពេទ្យ ជាមធ្យមចន្លោះពី ៣ ថ្ងៃទៅ ៥ ថ្ងៃ អញ្ចឹងចន្លោះពេលហ្នឹង គឺជាចន្លោះពេលដែលគ្រូពេទ្យតាមដានសុខភាពគាត់ហើយ។ ការធ្លាក់ឈាមខុសពីធម្មតាយើងអាចដឹងពេលហ្នឹង ហើយវាកើតឡើងក្នុងអំឡុងពេលហ្នឹងច្រើនជាងគេ។ អំឡុងពេលដែលគាត់ទៅផ្ទះវិញធ្លាក់ឈាម គឺតិចតួចណាស់ ភាគរយតិចមែនទែន ហើយភាគច្រើនកើតលើស្ត្រីដែលអត់មានចលនា។ ឧទាហរណ៍គាត់គេងច្រើន ហើយគាត់អត់ប្រឹងដើរធ្វើចលនា គាត់ថាសរសៃខ្ចីអញ្ចឹង ឈាមវាអត់ធ្លាក់ចេញមកតាមសម្រួលទេ និយាយទៅវាកកនៅក្នុងស្បូនម្ដងបន្តិច ម្ដងបន្តិច ទាល់តែគាត់ងើបដើរទៅវានឹងធ្លាក់ចេញមកអស់"៕
ចុចអាន៖គ្រូពេទ្រជំនាញបកស្រាយរឿងស្អំថ្ម ឬទឹកក្ដៅ ក្រោយសម្រាលធ្វើឲ្យប៉ះពាល់សុខភាពស្ត្រី