មនុស្សពិបាកបំភ្លេចជាងគេលើលោកមិនមែនស្នេហាដំបូង តែជាអ្នកដែលធ្វើឲ្យយើងឈឺជាងគេ

2019-08-14 05:00:00
ចំនួនមតិ 0 | ចំនួនចែករំលែក 0

ស្នេហាដំបូងធ្វើឲ្យយើងនៅចងចាំគេដោយអនុស្សាវរីយ៍បែបក្មេងវ័យ មិនទាន់ចេះដឹងអ្វីជ្រៅជ្រះ តែស្នេហាដែលធ្វើឲ្យយើងឈឺនឹងដិតដាមនៅជាមួយយើងជារៀងរហូត អាចមិនមែនជាស្នេហ៍ដំបូងទេ។

មនុស្សលោកតែងនិយាយតៗគ្នាថា ស្នេហាដំបូងគឺជាអ្វីម្យ៉ាងដែលនឹងគ្មានលទ្ធផល តែជាអ្វីដែលនឹងធ្វើឲ្យអ្នកចងចាំមួយជីវិត។ និយាយបែបនេះក៏មិនខុសដែរ ព្រោះសួរមើលថា តើមានប៉ុន្មាននាក់ដែលអាចភ្លេចស្នេហ៍គ្រាដំបូងបាននោះ?

តែនៅមានប្រភេទមនោសញ្ចេតនាមួយទៀតដែលធ្វើឲ្យយើងរឹតតែពិបាកភ្លេចជាងនេះទៀត។ នោះគឺមនោសញ្ចេតនាដែលធ្វើឲ្យឈឺដូចគេយកកាំបិតមកឆ្កៀល។ ជឿជាក់ថា ដល់ថ្ងៃដែលអ្នកដកដង្ហើមចុងក្រោយ បែបក៏នៅតែចងចាំវាច្បាស់ដូចថ្ងៃដែរ។

សាកគិតមើលចុះ មនុស្សដែលយកក្តីស្រលាញ់ប្រៀបស្មើជីវិត ឲ្យតម្លៃជាងអ្វីៗទាំងអស់ ហើយបែរជាធ្វើឲ្យយើងឈឺវិញ តើចុកដែរឬទេ? យើងភ្លេចគេមិនបាន មួយផ្នែកគឺដោយសារខឹងខ្លាំងពេក មិនអាចឈប់គិតពីគេបាន ឯមួយផ្នែកទៀត គឺសោកស្ដាយ។ សោកស្ដាយដែលបានទុកដាក់ការទុកចិត្តនៅកន្លែងខុស។

ទំនុកចិត្តដែលគួរតែទុកដាក់នៅនឹងមនុស្សដែលស័ក្ដិសមនោះ បែរជាប្រគល់ច្រឡំឲ្យជនមិនច្បាស់លាស់ ដែលលទ្ធផលទទួលបានក្រៅពីមេរៀន ក៏គួបផ្សំនឹងទឹកភ្នែកដែលឥតគិតថ្លៃ ព្រមទាំងការធ្វើបាបខ្លួនឯងមិនតិចថ្ងៃ។

តាមការពិតទៅ យើងឈឺដោយសារតែមកពីយើងស្រលាញ់គេខ្លាំងពេក។ ព្រោះឧទាហរណ៍ថា បើសិនមនុស្សមិនដែលស្គាល់គ្នាសោះ មកកុហកយើង ក៏យើងមិនខ្វល់ដូចគ្នា។ តែមនុស្សដែលស្មានថានឹងកៀកស្មាដើរដល់ចុងវិថីជីវិត ស្រាប់តែដកកាំបិតចាក់ពីក្រោយ នឹងធ្វើឲ្យយើងបំភ្លេចកាលៈទេសៈនោះមិនបានជារឿងរហូត។