ឲ្យកូនបៅដោះម្ដាយផង និង បៅទឹកដោះគោផង តើជារឿងត្រឹមត្រូវដែរទេ?

2019-08-12 09:05:00
ចំនួនមតិ 0 | ចំនួនចែករំលែក 0

មានម្ដាយមួយចំនួនយល់ថាការបន្ថែមទឹកដោះគោឲ្យទារកពីលើទឹកដោះម្ដាយគឺជារឿងល្អដើម្បីជំរុញសុខភាពកូន ប៉ុន្តែ តើនេះជារឿងត្រឹមត្រូវដែរទេ?

ឆ្លើយទៅនឹងសំនួរនេះ លោកហ៊ូ ក្រើន ជាវាគ្មិនម្នាក់ក្នុងកម្មវិធីវេទិកាពិភាក្សាស្ដីពី «ការលើកកម្ពស់ការចិញ្ចឹមទារក និងកុមារ» នៅសាកលវិទ្យាល័យពុទ្ធិសាស្រ្ត បានឲ្យដឹងថាបើតាមគោលនយោបាយថ្នាក់ជាតិគឺលើកទឹកចិត្តឲ្យម្ដាយបំបៅកូនដោយទឹកដោះតែមួយមុខប៉ុណ្ណោះសម្រាប់កុមារក្រោមអាយុ៦ខែ មិនចាំបាច់ត្រូវប្រើទឹកដោះគោទេ។

នាយករងអង្គការហេឡែន ខេលល័រអន្តរជាតិ (Helen Keller International) រូបនេះបានបញ្ជាក់ថា គោលនយោបាយថ្នាក់ជាតិដើម្បីជម្រុញការបំបៅដោះកូនមានបីចំណុចសំខាន់សម្រាប់ម្ដាយគ្រប់រូប។ ទី ១ ជំរុញឲ្យម្ដាយបំបៅកូនក្នុងម៉ោងដំបូងក្រោយសម្រាលភ្លាម។ ទី ២ ត្រូវបំបៅដោះតែមួយមុខគត់ដល់រយៈពេល៦ខែ។ ទី ៣ ត្រូវបន្តបំបៅរហូតដល់អាយុ២ឆ្នាំ ឬលើសពីនេះ បូករួមជាមួយការផ្ដល់អាហារដែលមានជីវជាតិបន្ថែមឲ្យបានគ្រប់គ្រាន់។ ម្ដាយមិនចាំបាច់បន្ថែមទឹកដោះគោនោះទេព្រោះវាអាចជាបន្ទុកចំណាយច្រើន ខាតពេលវេលា ហើយអ្វីដែលសំខាន់គឺអាចប៉ះពាល់សុខភាពក្មេងបើទឹកដោះគោមិនមានអនាម័យគ្រប់គ្រាន់។

លោក ហ៊ូ ក្រើន នាយករងអង្គការហេឡែន ខេលល័រអន្តរជាតិ

លោកក៏បានសង្កត់បន្ថែមដែរថា សម្រាប់រយៈពេលបំបៅកូន (ជាពិសេសក្រោម៦ខែ) ទឹកដោះម្ដាយគឺប្រៀបដូចជាឱសថទិព្វអ៊ីចឹង។ ម្ដាយមិនចាំបាច់ត្រូវការអ្វីទៀតទេ ហើយបើទោះបីម្ដាយមានបញ្ហាសុខភាពខ្លះក៏គុណភាពទឹកដោះមិនចុះថយដែរ៕