៦ តិចនិចប្រជុំយ៉ាងណាឲ្យបានសាច់ការហើយឆាប់ចប់ទៀត
- 2019-07-30 02:30:00
- ចំនួនមតិ 0 | ចំនួនចែករំលែក 0
៦ តិចនិចប្រជុំយ៉ាងណាឲ្យបានសាច់ការហើយឆាប់ចប់ទៀត
ពាក្យថា “ប្រជុំ” ជាពាក្យពេញនិយមមួយដែលអាចធ្វើឲ្យអ្នកធ្វើការក្រុមហ៊ុន ស្ថាប័នឬអង្គការនានាញញើតមិនតិចទេ។ មិនមែនតែក្នុងវ័យធ្វើការទេ សិស្សនិស្សិតក៏ជួបបញ្ហានេះដូចគ្នាដែរ ព្រោះតែប្រជុំយូរពេក ពេលខ្លះរកខ្លឹមសារសំខាន់អីគ្មាន ឬពេលខ្លះអត់ទាំងជាការងារយើងផងក៏ត្រូវគេហៅឲ្យចូលប្រជុំដែរ ធ្វើឲ្យការងារផ្ទាល់ខ្លួនមិនទាន់ពេល ខាតពេលសម្រាក ឬធ្វើឲ្យខូចខាតកិច្ចការផ្សេងទៀតជាដើម។
ដើម្បីឲ្យបទពិសោធន៍អាក្រក់ៗទាំងនេះរសាត់ឆ្ងាយពីលោកអ្នក សូមស្ដាប់ការណែនាំរបស់លោក Steven G. Rogelberg អ្នកនិពន្ធសៀវភៅ The Surprising Science of Meetings ៖
១. ការប្រជុំនេះចាំបាច់ទេ?
បើសិនការប្រជុំនោះគ្រាន់តែជាការផ្សព្វផ្សាយដំណឹងនោះទេ ក៏គួរតែប្រើវិធីផ្សេងពីការប្រជុំល្អជាងព្រោះសកម្មភាពខ្លះមិនចាំបាច់មកប្រជុំទេ។ ការប្រជុំប្រើសម្រាប់ការចោទសំណួរ ហើយត្រូវការចម្លើយ ឬការបង្ហាញការយល់ឃើញផ្សេងៗ ជាជាងការនិយាយតែរបស់អ្នកណាម្នាក់។
២. កុំធ្វើខ្លួនជាម្ចាស់ចក្រវាល
បើទោះជាលោកអ្នកចូលចិត្តប្រជុំ តែមិនមែនគ្រប់គ្នាសុទ្ធតែគិតដូចអ្នកនោះទេ។ បើអ្នកជាមនុស្សពូកែជជែក ពូកែនិយាយ អ្នកអាចនឹងចូលចិត្តការប្រជុំ តែអ្នកផ្សេងទៀតអាចមិនចូលចិត្តរបៀបអ្នកក៏ថាបាន ដូចនេះគួរព្យាយាមសួរ ឬសង្កេតអ្នកចូលរួមប្រជុំឲ្យបានល្អ។ ទឹកមុខនិងអាកប្បកិរិយា ការចូលរួមសម្ដែងមតិរបស់ពួកគាត់អាចបញ្ជាក់ថា ការប្រជុំនោះជាការប្រជុំដែលល្អនិងមានប្រសិទ្ធភាពឬអត់។
៣. ធ្វើឲ្យខ្លីបំផុត
លោកអ្នកអាចទម្លាប់នឹងតារាងពេលវេលារបស់ប្រតិទិន ដែលកំណត់ជាម៉ោងៗ តែជឿទៅថា ការប្រជុំណាដែលអាចសរុបចប់មុនពេលវេលា អាចធ្វើឲ្យប្រសិទ្ធភាពរបស់បុគ្គលិកកាន់តែល្អ។ មិនថាតំណែងណា ការងារអីទេ ពេលវេលារបស់គេសុទ្ធតែសំខាន់សម្រាប់ក្រុមហ៊ុនស្ថាប័នទាំងអស់កុំព្យាយាមប្រជុំទាល់តែដល់ម៉ោងអី បើអស់កិច្ចការហើយ បំបែកជួរចូលធ្វើការរៀងៗខ្លួនទៅ។
៤. មនុស្សកាន់តែតិចកាន់តែល្អ
នៅ Google មានច្បាប់មួយថា ប្រជុំមិនលើសពី១០នាក់ ឯ Amazon កំណត់យកច្បាប់ “Two-Pizza rule” មានន័យថាប្រជុំម្ដងៗ ភីហ្សាតែពីរបន្ទះគ្រប់គ្រាន់ហើយ។ ព្រោះការប្រជុំមនុស្សកាន់តែច្រើន កាន់តែត្រូវការជំនាញច្រើនដូចគ្នា ដូចជាជំនាញស្ដាប់ ជំនាញវិភាគ ជំនាញសរុបខ្លឹមសារសំខាន់...តែមិនមែនគ្រប់គ្នាសុទ្ធតែមានជំនាញនោះឯណា ដូចនេះហើយ មិនចាំបាច់កុំចេះតែហៅគេទៅប្រជុំ។
៥. បែងចែកគ្នាគិត
មនុស្សជាច្រើនជឿថា ការប្រជុំ ឬ Brainstorming ជាការចូលរួមដ៏ល្អ ឯភាពស្ងប់ស្ងាត់ជារឿងមិនល្អ និងមិនគួរឲ្យកើតមាន។ តែការពិតទៅ ពេលខ្លះការដែលមនុស្សម្នាក់អាចនៅម្នាក់ឯង អាចអង្គុយស្ងប់ស្ងាត់កត់ត្រាអ្វីដែលខ្លួនបានគិតក៏ជារឿងល្អសម្រាប់គេក៏ថាបាន ព្រោះមនុស្សម្នាក់ៗមានវិធីគិតរៀងៗខ្លួននោះឯង។
៦. សុំចេញ ពេលដែលគួរចេញ
រឿងនេះជាអ្វីដែលមនុស្សជាច្រើនមិនសូវហ៊ានធ្វើទេ។ តែជាទូទៅការប្រជុំមួយៗសុទ្ធតែមាន តារាង Agenda ហើយតារាងនីមួយៗមានខ្លះក៏ពាក់ព័ន្ធនឹងលោកអ្នក ហើយខ្លះក៏អត់ដែរ ជាពិសេសតារាងក្រោយៗគេ។ ដូចនេះ មិនថាជាការសុំចេញមុន ឬការបញ្ចប់ការប្រជុំលើកំណត់ការដែលមិនចាំបាច់ទេ អ្នកដឹកនាំការប្រជុំនិងអ្នកចូលរួមប្រជុំគួរតែគិតនិងចាត់ការឲ្យបានល្អ៕
ចុចអាន៖ ៥ ទម្លាប់របស់បុគ្គលបរាជ័យដែលអ្នកណាយកត្រាប់តាមគឺគ្មានថ្ងៃរីកចម្រើន