៥ ទម្លាប់របស់បុគ្គលបរាជ័យដែលអ្នកណាយកត្រាប់តាមគឺគ្មានថ្ងៃរីកចម្រើន

2019-07-25 03:00:00
ចំនួនមតិ 0 | ចំនួនចែករំលែក 0

មានមនុស្សមួយចំនួន ទោះបីជាព្យាយាមយ៉ាងណា ទាល់តែចំណាយពេលយ៉ាងយូរ ទើបជោគជ័យ តែក៏មានមួយចំនួនទៀត គ្មានថ្ងៃជោគជ័យទាល់តែសោះដោយសារតែទម្លាប់មួយចំនួនរបស់ពួកគេដូចខាងក្រោម៖

១. មិនអាចផ្ចង់អារម្មណ៍

កវីនិពន្ធសៀវភៅដ៏ល្បីឈ្មោះអាមេរិក Greg McKeown បានឲ្យដឹងថា គន្លឹះដែលធ្វើឲ្យលោកជោគជ័យគឺការផ្ចង់អារម្មណ៍។ លោកបន្ថែមថា បុគ្គលណាដែលក្រលេកមើលទូរសព្ទរបស់ខ្លួន រៀងរាល់៥នាទី ហើយមិនអាចផ្ដោតអារម្មណ៍បាននោះ គឺពិបាកនឹងមានថ្ងៃជោគជ័យណាស់។

២. បានតែនិយាយ

អ្នកមានដឹងទេថា តើអ្វីដែលប្រសើរជាងការនិយាយនោះ? នោះគឺសកម្មភាព។ អ្នកអាចចំណាយពេលរាប់ឆ្នាំដើម្បីរៀបគម្រោងឲ្យការងារមួយ តែជាក់ស្ដែង ការងារនោះត្រូវការពេលខ្លីប៉ុណ្ណោះដើម្បីបំពេញ។ ដូចនេះ បើអ្នកបានតែនិយាយ តែមិនចាប់ផ្ដើមធ្វើ នោះអ្នកនឹងនៅកន្លែងនោះ មួយជីវិត មិនអាចទៅមុខឡើយ។

៣. ចំណាយពេលជាមួយមនុស្សអត់ប្រយោជន៍

អ្នកប្រាជ្ញនិយាយថា អ្នកនៅជិតអ្នកណា នោះអ្នកនឹងដុះគំនិតដូចអ្នកនោះដែរ។ ដូចនេះ ប្រសិនបើអ្នកចំណាយពេលជាមួយបុគ្គលដែលឥតប្រយោជន៍ ដើរប៉ោឡែឥតល្ហែ នោះអ្នកនឹងទៅជាដូចពួកគេដែរ។

៤. ខ្ជិល

ជំងឺមួយនេះ គឺពិបាកព្យាបាលជាទីបំផុត ហើយប្រសិនបើព្យាបាលមិនដាច់ទេ អ្នកកុំសង្ឃឹមថា មានថ្ងៃជោគជ័យឲ្យសោះ។ បុគ្គលខ្លះ ព្យាយាមព្រឹកល្ងាច នៅមិនទាន់ឃើញសមិទ្ធិផលផង ចុះទម្រាំអ្នកដែលដេកតែនៅផ្ទះ សួរថាថ្ងៃណាទើបឃើញលទ្ធផល?

៥. មិនស្ដាប់គំនិតអ្នកដទៃ

គេតែងនិយាយថា ពីរគឺប្រសើរជាងមួយ។ ទោះបីជាយើងឆ្លាត ឬពូកែដល់កំរិតណា ក៏មានពេលខ្លះ ត្រូវស្ដាប់គំនិតអ្នកដទៃដែរ ដើម្បីបើកខួរក្បាលឲ្យបានទូលាយជាងមុន។ តែបើអ្នកនៅតែគិតថា ខ្លួនល្អឥតខ្ចោះ ហើយបដិសេធស្ដាប់គំនិតអ្នកដទៃ អ្នកនឹងនៅមួយកន្លែងក្នុងរយៈយូរជាមិនខាន៕

ចុចអាន៖ មេរៀនសំខាន់ៗពីភរិយាអតីតប្រធានាធិបតីអាមេរិក ស្រីៗគួរតែរៀនតាម

ប្រភព៖ medium ប្រែសម្រួល៖ Caramel