បើមានសញ្ញាទាំងនេះ គាត់ស្រលាញ់អ្នកចាត់ទុកជាប្អូនស្រីប៉ុណ្ណោះ

2019-07-24 05:00:00
ចំនួនមតិ 0 | ចំនួនចែករំលែក 0

អ្នកធ្លាប់សប្បាយចិត្តពេលនៅជិតអ្នកណាម្នាក់ទេ? ថែមទាំងឃើញថា គេក៏មានអារម្មណ៍ល្អចំពោះអ្នកវិញ ប៉ុន្តែអ្នកមិនច្បាស់ថាគេ Crush អ្នកវិញឬអត់។ ស្នេហាគឺជារឿងពិបាកទស្សន៍ទាយ ហើយក៏ពិបាកយល់ដែរ។ ពេលខ្លះអ្នកគិតគេថាជាស្នេហា តែគេវិញគិតអ្នកត្រឹមប្អូនស្រីប៉ុណ្ណោះ។ កុំឲ្យមិនច្បាស់លាស់ទៀត ៥ចំណុចខាងក្រោមនេះបង្ហាញច្បាស់ដូចថ្ងៃថា គេចាត់ទុកអ្នកត្រឹមប្អូនស្រីប៉ុណ្ណោះ។

១. គ្មានអំណោយសម្រាប់ថ្ងៃពិសេស

កាដូជារឿងសំខាន់សម្រាប់មនុស្សស្រី តែបើគាត់គ្មានសូម្បីតែមួយសម្រាប់អ្នកនូវថ្ងៃពិសេសៗដូចជាបុណ្យខួបកំណើត ទិវាសិទ្ធនារី ជាដើម ប្រហែលអ្នកអាចដឹងខ្លួនខ្លះហើយថាគេមិនបានទុកអ្នកជាមនុស្សសំខាន់។ បើគាត់ពិតជាស្រលាញ់អ្នកមែន គាត់នឹងទិញកាដូឲ្យអ្នកដើម្បីសន្សំពិន្ទុ សម្រាប់ស្នេហាមួយនេះ។

២. គាត់និយាយពីស្នេហាចាស់ប្រាប់អ្នក ដោយគ្មានក្រែងចិត្ត

រឿងស្នេហាចាស់ គូស្នេហ៍ណាក៏គេប្រយ័ត្នដែរ គឺមិនងាយបង្ហើបផ្តេសផ្តាសទេ ។ តែបើគាត់និយាយរឿងសង្សារចាស់ឲ្យអ្នកស្ដាប់ មានន័យថាគាត់គ្មានយល់អារម្មណ៍ឈឺចាប់ពេលអ្នកលឺនោះទេ។ នោះមកពីគាត់មិនបានស្រលាញ់អ្នកដូចអ្នកមានចំពោះគាត់ ទើបគាត់និយាយពីអនុស្សាវរីយ៍ផ្អែមល្ហែមចាស់ៗ ដោយគ្មានក្រែងចិត្តអ្នកសូម្បីបន្តិច។

៣. មានឱកាសឆាតជាមួយគ្នាពេលយប់ តែលាគ្នាដោយគ្មានពាក្យផ្អែម

ពាក្យផ្អែមល្ហែមមុនចូលគេង ដូចជា សុបិនល្អណា រាត្រីសួស្តី អាកាសធាតុត្រជាក់កុំភ្លេចដណ្ដប់ភួយណា សុទ្ធតែមនុស្សប្រុសចង់និយាយទៅកាន់គូស្នេហ៍។ តែបើអ្នកសង្កេតឃើញថា មានពេលខ្លះអ្នកមានឱកាសបានឆាតលេងជាមួយ Crush ពេលយប់ជ្រៅហើយពេលឆាតចប់ គាត់គ្មានពាក្យផ្អែមលាអ្នកទេ នោះក៏ជាសញ្ញាបញ្ជាក់ច្បាស់ដែលថា គេអត់គិតអ្នកអីពិសេសបន្តិចសោះ។

៤. គាត់គ្មានអារម្មណ៍រំភើបពេលនៅក្បែរអ្នក

ប្រហែលជាមនុស្សស្រីនឹងរំភើបនៅពេលចាប់បានមនុស្សប្រុសលួចសម្លឹងខ្លួន ព្រោះអាចសន្មតថា គាត់កំពុងស្រលាញ់អ្នកហើយ។ តែបើសូម្បីពេលនៅជិតគាត់ ហើយគាត់គ្មានបង្កើតការសន្ទនា ឬចង់ស្និទ្ធស្នាលនឹងអ្នកទេ ក៏ជាពេលដែលអ្នកគួរត្រៀមកាត់ចិត្តឲ្យហើយទៅ។

៥. គ្មានរូបថតអ្នកសូម្បីមួយប៉ុស្ត៍ ទោះមានឱកាសបានថតជាមួយគ្នាក៏ដោយ

នៅក្នុងពិធីជប់លៀង ឬការជួបជុំមិត្តភ័ក្ដិ មនុស្សប្រុសនឹងឆ្លៀតឱកាសនេះដើម្បីបានប្រមាញ់រូបថតអ្នក ឬសុំអ្នកថត Selfies ជាមួយ ព្រោះជាវេលាល្អឲ្យគាត់អាចជិតដិតនឹងអ្នកបាន។ ប៉ុន្តែអកុសលអី គាត់គ្មានរូបអ្នកសូម្បីមួយសន្លឹកពេលផុសរូបជុំគ្នានៅលើ Account របស់គាត់។

វាជារឿងឈឺចាប់បំផុតនៅពេលយើងដឹងថា គេគ្មានសូម្បីកូនចិត្តស្រលាញ់យើងវិញ។ តែយ៉ាងហោចណាស់ បើយើងដកខ្លួនមុនកុំឲ្យឈឺខ្លាំងជាងនេះ ជារឿងល្អ។ ស្នេហាជាអារម្មណ៍របស់មនុស្សពីរនាក់ បើគ្រាន់កើតឡើងតែម្ខាង គឺមិនអាចបន្តបានទេ។ ប៉ុន្តែកុំអស់សង្ឃឹមអី ថ្ងៃណាមួយអ្នកនឹងជួបបុរសដែលស្រលាញ់អ្នកពិត ហើយក្ដីសុខនឹងកើតឡើងមិនខាន៕

ចុចអាន៖ មនុស្សស្រីពូកែជាងប្ដី ត្រូវគេស្អប់ បើអន់ជាងប្ដី ត្រូវគេមើលងាយ

ប្រភព៖ Spiceee ប្រែសម្រួល៖ លឹម សុនា