លើកទឹកចិត្តនិងស្រលាញ់ខ្លួនឯងឲ្យច្រើន អ្វីគ្រប់យ៉ាងនឹងមកតាមក្រោយ

2019-07-19 06:30:00
ចំនួនមតិ 0 | ចំនួនចែករំលែក 0

ពេលខ្លះយើងសម្រេចចិត្តដើរចេញនិងមិនតបតអ្វីទាំងអស់ នេះមិនមែនដោយសារតែភាពអាត្មានិយមខ្លួនឯងនោះទេ។ ប៉ុន្ដែគ្រាន់តែយើងដឹងខ្លួនឯងថា អ្វីគ្រប់យ៉ាងគ្មានភាពល្អប្រសើរឡើយ បើនៅតែមួយកន្លែងមានតែភាពតានតឹង ស្អុះស្អាប់ផ្លូវអារម្មណ៍ និងទើសទាល់ផ្លូវចិត្ត។

ដល់ពេលដែលត្រូវស្រលាញ់ខ្លួនឯង និង យកចិត្តទុកដាក់លើខ្លួនឯងម្ដងហើយ។ ពីមុនខ្លូនឯងបានឱបក្រសោបបន្លាយូរដែរហើយ ។ កាន់តែអោបកាន់តែឈឺ អោបរឹតវាខ្លាំងប៉ុណ្ណា ទំហំនៃការឈឺចាប់ក៏ចេះតែកើនឡើងតាមហ្នឹង។ ចុះហេតុអ្វីមិនយកបន្លានោះចេញ?

ឥឡូវបន្លាទាំងនោះត្រូវបានដកចេញអស់ហើយ ប៉ុន្តែនៅឡើយតែស្លាកស្នាមដែលបានកប់យ៉ាងជ្រៅក្នុងក្រអៅបេះដូងមួយនេះដែលត្រូវការពេលដើម្បីព្យាបាលនិងមើលថែឲ្យជាសះស្បើយឡើងវិញ។ ចាប់ផ្ដើមអ្វីៗជាថ្មីជាមួយនឹងក្ដីសង្ឃឹម រៀនរស់ដោយខ្លួនឯង ផ្ដល់ទំនុកចិត្តឲ្យខ្លួនឯង ឲ្យតម្លៃជីវិតដែលនៅសល់ទាំងប៉ុន្មាន និងស្រលាញ់អ្វីដែលខ្លូនកំពុងមានសព្វថ្ងៃ។

ប្រាប់ខ្លួនឯងថាគ្រប់យ៉ាងមិនអីនោះទេ សួរអារម្មណ៍ខ្លួនឯងថាយ៉ាងម៉េចហើយ វាបានធូរស្បើយខ្លះហើយឬនៅ? អាចមកសាកធ្វើអ្វីមួយដើម្បីខ្លួនឯងបានហើយឬនៅ? មើលរាងកាយខ្លូនឯងមើលថាវាស្ថិតក្នុងកម្រិតណាហើយ? ដល់ពេលឬនៅដែលឈប់ធ្វើបានខ្លូនឯង? បើឆ្លើយតបនឹងសំណួរទាំងនេះបានហើយ បានន័យថាអ្នកបានលើកទឹកចិត្តខ្លួនឯងហើយ ប្រសិនបើអ្នកមិនស្រលាញ់ខ្លួនឯងផង អ្នកណាអាចស្រលាញ់អ្នកស្មោះបាននោះ។

នៅពេលអ្នកចេះផ្ដល់កម្លាំងចិត្តដល់ខ្លួនឯងហើយ គ្រប់យ៉ាងនឹងល្អប្រសើរឡើងជាក់ជាពុំខាន អ្នកអាចសង្កេតខ្លួនឯងបាន ថាមានអ្វីប្រែប្រួលខ្លះនៅពេលអ្នកឲ្យតម្លៃខ្លួនឯងច្រើនជាងគេ និងឲ្យពេលដល់ខ្លួនឯងមុនអ្វីគ្រប់យ៉ាង។ ពិតណាស់ ផ្លូវចិត្តរបស់អ្នកលែងងាយប៉ះទង្គិចដូចមុន អ្នកអាចគ្រប់រាល់បញ្ហាដែលកំពុងប្រឈមមុខបាន មិនងាយទុកចិត្តអ្នកដទៃដូចមុន ហើយក្លាយជាមនុស្សមានគោលដៅច្បាស់លាស់។

ចុចអានបន្ដ៖ បើអ្នកជាដើមស្មៅ ទោះបីគ្មានអ្នកស្រលាញ់ ក៏អ្នកត្រូវរីកលូតលាស់

អត្ថបទ៖ ង៉ាន់ សុគុន