គន្លឹះសំខាន់ៗ សម្រាប់អ្នកម៉ាក់ថ្មីថ្មោង ដើម្បីមើលថែកូនតូចឲ្យបានល្អ
- 2019-07-17 07:00:00
- ចំនួនមតិ 0 | ចំនួនចែករំលែក 0
គន្លឹះសំខាន់ៗ សម្រាប់អ្នកម៉ាក់ថ្មីថ្មោង ដើម្បីមើលថែកូនតូចឲ្យបានល្អ
ជីវិតរបស់អ្នកបានឈានចូលក្នុងពិភពថ្មីមួយទៀត នៅពេលដែលទទួលបានគ្រាប់ពេជ្រតូចនៅក្នុងនៅក្នុងដៃ។ ក្រៅពីអារម្មណ៍រំភើបស្រលាញ់កូនពេញបេះដូងហើយ អ្នកម្តាយថ្មីថ្មោង គួរចេះពីគន្លឹះសំខាន់ៗ ដើម្បីមើលថែកូនឲ្យបានល្អត្រឹមត្រូវ មិនឲ្យធ្លោយ។
១. កុំមើលរំលងភាសាកាយវិការរបស់កូន
នៅពេលក្មេងយំ មានន័យថាពួកគេ ចង់បានអ្វីមួយពីអ្នក លើសពីនេះទៅទៀត អ្នកក៏អាចសង្កេតតាមរយៈកាយវិការរបស់ពួកគេដែរ។ ពេលកូនក្តាប់ម្រាមដៃចូលគ្នា បញ្ជាក់ពីអារម្មណ៍មិនល្អឬឃ្លាន។ បើលាដៃមានន័យថាឆ្អែត ហើយបើជើងទាំងពីរធាក់ចុះឡើង គឺចង់ប្រលែងលេង។ ពេលខ្លះគេអាចយកដៃទាញត្រចៀក ដែលបង្ហាញថា ធ្មេញព្រៃជិតដុះចេញមកហើយ។
២. ពេលបំបៅដោះ ត្រូវយកដៃទ្រខ្លួននិងឲ្យជិតក្បាលរបស់កូន
ភាគច្រើនអ្នកធ្លាប់តែឃើញដូចក្នុងរូបភាពទី២ នៅពេលបំបៅដោះកូន។ បែបនេះវាស័ក្តិសមសម្រាប់ក្មេងដែលធំល្មម ប៉ុន្តែចំពោះទារកទើបនឹងកើតវិញ គួរធ្វើដូចក្នុងរូបភាពទី១។ នៅពេលដាក់ដៃទ្រក្បាលកូន អ្នកងាយស្រួលក្នុងការជួយបង្វិលគេឲ្យត្រូវចំទីតាំង ឬមិនពិបាកនៅពេលផ្លាស់ប្តូរកូនទៅផ្នែកម្ខាងទៀត។
៣. ផ្តល់អាហារឲ្យបានត្រឹមត្រូវ នៅពេលកូនឃ្លាន
ជាទូទៅ ក្មេងត្រូវផ្តល់របបអាហារ ចាប់ពី ៨-១២ដង ក្នុងមួយថ្ងៃ មានន័យថា អ្នកអាចផ្តល់ឲ្យ ២-៣ម៉ោងម្តងដើម្បីគ្រប់ចំនួន។ សង្កេតមើលប្រសិនបើកូនឃ្លាន គេអាចនឹងបៀមមេដៃជាដើម។
៤. ធ្វើឲ្យគេរសើប នៅពេលចង់ដាស់ឲ្យភ្ញាក់
នៅពេលចង់ដាស់ឲ្យកូនភ្ញាក់ ហាមដាច់ខាតអង្រួន រលាក់ចុះឡើងឬលេងខ្លាំងៗ ព្រោះវាអាចនាំឲ្យមានឈាមហូរក្នុងខួរក្បាល គ្រោះថ្នាក់ដល់ជីវិតក៏ថាបាន។ វិធីល្អបំផុត គឺត្រូវធ្វើឲ្យគេរសើប ឬផ្លុំលើខ្លួន ដើម្បីដាស់ឲ្យភ្ញាក់។
៥. កុំឲ្យកូនបៀមក្បាលដោះជ័រ មុនបំបៅដោះម្តាយ
កូនអាចនឹងនៅស្ងៀមស្រួល ពេលដែលអ្នកឲ្យគេបៀមជញ្ជក់ក្បាលដោះជ័រ។ យ៉ាងណាមិញ បើអ្នកត្រៀមបំបៅដោះកូនដោយទឹកដោះខ្លួនឯង មិនគួរប្រើរបស់នេះទេ។ គួរចាំឲ្យកូនដល់អាយុ ២-៤ សប្តាហ៍សិនទើបល្អ។
៦. ដាក់កន្ត្រកតូចល្មមឲ្យកូនអង្គុយពេលងូតទឹក
បើអ្នកបារម្ភខ្លាចកូនរអិល នៅពេលងូតក្នុងអាង អាចដាក់កន្ត្រកតូចល្មមឲ្យគេអង្គុយ ដើម្បីការពារមិនឲ្យរអិលដួលត្រូវរបួស។ កុំភ្លេចដាក់របស់លេងខ្លះ ឲ្យកូនសប្បាយចិត្តកម្សាន្តអារម្មណ៍ផង។
៧. កម្តៅអាចជួយឲ្យទឹកដោះចេញជាងមុន
នៅពេលបំបៅកូន បើទឹកដោះមិនសូវចេញល្អ អ្នកអាចប្រើកម្តៅជាជំនួយបាន។ ដោយគ្រាន់តែប្រើ កន្សែងក្តៅឧណ្ណៗ ខ្នើយសំឡីគ ឬក្រណាត់ស្អាតដែលអាចផ្តល់កម្តៅ យកមកដាក់លើសុដន់ ដើម្បីជួយឲ្យទឹកដោះចេញល្អ។ មួយវិញទៀត ជែលបិទឲ្យត្រជាក់ ក៏អាចជួយបានដែរ បើអ្នកឈឺលើចុងសុដន់ បន្ទាប់ពីសម្រាលកូនរួច។
៨. តន្រ្តីអាចជួយឲ្យក្មេងរពឹសនៅស្ងៀមជាងមុន
មានពាក្យខ្លះ គេនិយាយថា ពេលស្តាប់ភ្លេងជួយឲ្យកូនមានភាពវ័យឆ្លាតជាងមុន ព្រោះវាមានចង្វាក់ម្យ៉ាង ដែលអាចផ្តល់គុណប្រយោជន៍ និងធ្វើឲ្យគេនៅស្ងៀមជាងមុន។
៩. សង្កេតមើលស្បែកកូន ក្រែងលោមានប្រតិកម្ម
ត្រូវប្រុងប្រយ័ត្នមុនពេលប្រើឡេលាបនៅលើស្បែកកូន ព្រោះក្រោយកើតចេញពីពោះម្តាយមក ស្បែកក្មេងតែងមានសភាពស្ងួត និងឆាប់ប្រតិកម្ម។ បើអ្នកលាបឡេឬប្រេង ដោយមិនប្រយ័ត្ន ស្បែកកូននឹងរោលរមាស់ប្រតិកម្មយ៉ាងងាយ។ ហេតុនេះ មុនប្រើផលិតផលអ្វីមួយ គួរសាកល្បងលាបត្រង់ចំណុចតូចណាមួយសិន ដើម្បីសុវត្ថិភាព។
១០. ត្រូវយល់ថាក្មេងទាំងអស់សុទ្ធតែស្រស់ស្អាតគួរឲ្យស្រលាញ់
នៅពេលកូនចូលមកក្នុងជីវិតអ្នក ពួកគេមិនមែនសុទ្ធតែមានរូបរាងដូចអ្វីដែលអ្នកបានរំពឹងទុកទាំងស្រុងនោះទេ។ ក្មេងខ្លះមានរោមពេញខ្លួន មានស្បែករបកៗ មានមុខហើមៗ ឬក្រនឹងបើកភ្នែកជាដើម។ ឯខ្លះទៀត កើតមកគ្មានរោមចិញ្ចើមឬរោមភ្នែក ប៉ុន្តែកុំបារម្ភអី វាមិនមែននៅបែបនេះរៀងរហូតទេ។ បើទោះជា គ្រប់យ៉ាងមិនវិវត្តទៅរកភាពល្អប្រសើរក៏ដោយ ត្រូវយល់ថាក្មេងទាំងអស់លើលោកសុទ្ធតែស្រស់ស្អាត មានចំណុចទាក់ទាញរៀងៗខ្លួន ហើយពួកគេពិតជាត្រូវការភាពកក់ក្តៅនិងក្តីស្រលាញ់ខ្លាំងបំផុតពីឪពុកម្តាយ៕
ចុចអានបន្ត៖ ដើម្បីដឹងពីសុខទុក្ខកូនអ្នកម្ដាយគួរស្វែងយល់ ភាសាកាយវិការសំខាន់ៗ ៧ ពីទារក