ថ្ងៃដែលពួកយើងចាប់ផ្ដើមធុញនឹងគ្នា

2019-06-05 04:00:00
ចំនួនមតិ 0 | ចំនួនចែករំលែក 0

សញ្ញានៃគូស្នេហ៍ដែលធុញគ្នានោះគឺ នៅពេលដែលបើកភ្នែកឡើងរាល់ព្រឹក មនុស្សទី១ដែលយើងគិតដល់ លែងជាគេទៀតហើយ។ គឺជាពេលដែលនៅជិតគ្នាកាន់តែយូរ កាន់តែរកឃើញកំហុសរបស់គ្នារឹតតែច្រើន។

ប្រសិនបើក្លាយជាប្ដីប្រពន្ធនឹងគ្នាទៅហើយ នឹងមានពេលខ្លះ ដែលគ្រាន់តែឃើញមុខគ្នាក៏លែងឃើញថ្មីថ្មោងដែរ ធ្វើអ្វីក៏លែងស្អិតគ្នាតតាត់ដូចមុន។ ឬក៏ដល់ថ្នាក់ ចង់វែកគេចេញពីជីវិតក៏មាន។ សុភមង្គលដ៏សាមញ្ញកាលពីមុន ប្រែទៅជារឿងទើសទាល់នាពេលបច្ចុប្បន្នទៅហើយ។ មុនចេញពីផ្ទះក៏មិនខ្ចីញញឺមដាក់គ្នាទៀតដែរ។ គឺជាពេលដែលនៅក្បែរគ្នា គឺគ្មានដើម្បីអ្វី ក្រៅពីដើម្បីតែកូន។ មានពេលខ្លះក៏គិតថា រកអ្វីដែលថ្មីថ្មោងដូចជា អ្នកថ្មីជាដើម។

ពេលធុញមែនទែនហើយ គឺអាចធ្វើឲ្យគូភាគីឈឺទាំងសងខាង ដោយលែងខ្លាចថាគេនឹងចាកចេញពីជីវិតយើង។ គឺរបៀបថា អ្វីដែលនៅចងជើងគ្នាបាននោះគឺ កូន ទំនួលខុសត្រូវគ្រួសារ។ តែបើម្ខាងទៀតចង់ចេញទៅ ក៏មិនហាមឃាត់ដែរ។

តាមការពិតទៅ ប្ដីប្រពន្ធមួយគូណាក៏ដូចគ្នាដែរ សុទ្ធតែមានពេលធុញទ្រាន់នឹងគ្នាទាំងអស់ ដល់ថ្នាក់ពេលខ្លះ គ្រាន់តែឃើញមុខក៏មិនចង់មើលផង។ ហើយចំណុចដែលអ្នកនៅជាមួយគ្នាបានយូរ ហើយអ្នកខ្លះឆាប់បែកគ្នានោះគឺ ត្រង់ថា អ្នកចង់រក្សាសុភមង្គលដែលធ្លាប់សាងរួមគ្នាឬអត់ ឬក៏ធុញហើយ ក៏ចង់ព្រលែងចោលទាំងអស់។ ដូចនេះហើយ ទាន់ពេលដែលមិនទាន់ធុញគ្នា សូមស្រលាញ់គ្នាឲ្យបានច្រើនៗ មុនពេលបែកចិត្តគំនិតរៀងៗខ្លួន៕