មិនចង់ខុសម្តងហើយម្តងទៀតក្នុងរឿងស្នេហា គួរអានអត្ថបទនេះ

2019-06-03 07:00:00
ចំនួនមតិ 0 | ចំនួនចែករំលែក 0

ចាំពីស្នេហាមុនៗរបស់អ្នកទេ? តើអ្នកធ្លាប់ស្ដាយក្រោយ ហើយចង់ឲ្យពេលវេលាវិលថយក្រោយដើម្បីទៅកែប្រែកំហុសនោះវិញទេ? ប្រាកដណាស់គ្រប់គ្នានឹងធ្លាប់មានអារម្មណ៍មួយនេះយ៉ាងហោចណាស់ម្ដងក្នុងមួយជីវិត។ យើងភាគច្រើនដឹងថាវាហួសពេល ហើយម្នាក់ៗតែងតែនឹកដល់ទំនាក់ទំនងដែលល្អមួយ។

មុននឹងចង់បង្កើតស្នេហា ត្រូវប្រាកដថាអ្នកទាំងពីរជ្រើសរើសយកគ្នាដោយសារហេតុផលដែលល្អមួយ

មិនមែនគ្រប់ទំនាក់ទំនងទាំងអស់សុទ្ធតែល្អទេ។ បើសិនជាអ្នកមានការសង្ស័យតិចតួចក្នុងការស្រលាញ់របស់អ្នក ត្រូវគិតពីហេតុផលល្អៗដែលធ្វើឲ្យអ្នកស្រលាញ់គេ។ បើអ្នកជ្រើសរើសពួកគេដោយសារតែហេតុផលដែលបានសរសេរប្រាប់ដូចខាងក្រោមនេះ វាដល់ពេលហើយដែលអ្នកគួរតែគិតឡើងវិញម្ដងទៀត៖

១. ដោយសារអ្នកមានសម្ពាធពីគ្រួសារ សង្គម មិត្តភក្តិ …

២. ដោយសារអ្នកមិនចង់បន្តការស់នៅម្នាក់ឯងទៀត

៣. ដោយសារអ្នកមានអារម្មណ៍ថាបើសិនជាអ្នកមានអ្នកស្រលាញ់ម្នាក់ប្រហែលជាល្អ វាប្រហែលជាធ្វើឲ្យស្ថានភាពក្នុងពេលថ្មីៗនេះល្អ ឬក៏ធ្វើឲ្យអ្នកទទួលបានការចាប់អារម្មណ៍ជាងមុន

៤. ដោយសារអ្នកចង់ឲ្យនរណាម្នាក់មកជួយជួសជុលនិងផ្លាស់ប្តូរបញ្ហារបស់អ្នក

៥. ដោយសារតែអ្នកនៅក្មេង ហើយត្រូវការសេចក្ដីស្រលាញ់។

ហេតុផលខាងលើនេះមិនប្រាកដថាជាហេតុផលដែលបង្ខំឲ្យអ្នកបែកគ្នាទេ គ្រាន់តែអ្នកត្រូវការចំណាយពេលគិតពីវា អ្នកនឹងដឹងពីបញ្ហារបស់អ្នក ហើយនឹងមានអារម្មណ៍ល្អជាងមុន។

បើសិនជាទំនាក់ទំនងមិនល្អទេ បោះបង់ចោលទៅ

វាពិបាកណាស់ក្នុងការវាយតម្លៃលើទំនាក់ទំនងរបស់អ្នក។ តែវាមានតម្លៃបើសិនចំណាយពេលធ្វើវា។ បើសិនជាមានសញ្ញាដូចខាងក្រោមនេះបង្ហាញខ្លួនឡើងក្នុងស្នេហារបស់អ្នក ច្បាស់ណាស់នឹងមានអ្វីមិនប្រក្រតីកើតឡើងក្នុងទំនាក់ទំនងនោះហើយ៖

១. អ្នកមានអារម្មណ៍ថាអ្នក និងគេមិនដែលសម្រេចចិត្តដូចគ្នា

២. អ្នកមិនអាចសម្របសម្រួលការខ្វែងគំនិតបាន

៣. អ្នករងការគំរាមកំហែង

៤. មានម្នាក់ ឬអ្នកទាំងពីរកុហកគ្នា

៥. គេដូចជាត្រូវបានគ្រប់គ្រង ឬរៀបចំដោយនរណាម្នាក់

៦. អ្នកមើលមិនឃើញពីពន្លឺអនាគតជាមួយគ្នា។

បញ្ហាខ្លះអាចដោះស្រាយបាន ប៉ុន្តែបញ្ហាខ្លះទៀតការបញ្ចប់គឺជាផ្លូវចេញដ៏ល្អបំផុត។

ពេលអ្នកដឹងថាវាមានតម្លៃ អ្នកត្រូវតែចេះលៃលករក្សាសុភមង្គលមួយនោះ

មិនថាអ្នកស្រលាញ់គ្នាបាន ២ ខែ ឬបានរស់នៅជាមួយគ្នាលើស ២០ ឆ្នាំហើយក៏ដោយអ្នកត្រូវតែចងចាំថាស្នេហារបស់អ្នកជាស្នេហាថ្មីជានិច្ច។ ទំនាក់ទំនងមួយដែលមើលចេះមើលថែគ្នាដោយភាពរ៉ូមែនទិក ហើយនិងពោរពេញដោយភាពរីករាយគឺពិតជាសំខាន់ណាស់។ កុំភ្លេចចំណាយពេលណាត់ជួបគ្នា ទោះបីជាអ្នកទាំងពីររស់នៅជាមួយគ្នាក៏ដោយ។ អ្នកអាចលៃលកពេលល្ងាចជារៀងរាល់អាទិត្យ ឬប្រចាំខែធ្វើអ្វីដែលរ៉ូមែនទិកជាមួយគ្នា។ វានឹងកាន់តែអស្ចារ្យប្រសិនបើអ្នកឧស្សាហ៍ធ្វើដំណើរកម្សាន្តទៅឆ្ងាយៗជាមួយគ្នារៀងរាល់ឆ្នាំ។

ឈប់ប្រៀបធៀបស្នេហាខ្លួនឯងជាមួយស្នេហារបស់អ្នកដទៃ

គ្មាននរណាម្នាក់មានមនុស្សដែលខ្លួនស្រលាញ់ដូចអ្នកដទៃទេ។ ក្តីស្រលាញ់របស់មនុស្សប្រុសពីរនាក់មិនដូចគ្នានោះទេ។ លើសពីនេះវាមានរឿងជាច្រើននៅពីក្រោយខ្នងដែលអ្នកមិនបានដឹង ប្រហែលជាអ្វីៗគ្រប់យ៉ាងមិនស្រស់ស្អាតដូចដែលអ្នកបានឃើញនោះទេ។ ជំនួសឲ្យការប្រៀបធៀបស្នេហាខ្លួនឯងជាមួយស្នេហាអ្នកដទៃ អ្នកគួរតែផ្ដោតលើរឿងសំខាន់ក្នុងទំនាក់ទំនងរបស់អ្នក។

យកក្ដីស្រលាញ់ផ្សំជាមួយនឹងការប្ដេជ្ញាចិត្ត

គ្រាន់តែការស្រលាញ់តែម៉្យាងគឺមិនគ្រប់គ្រាន់ទេ សួរអ្នកដែលចាស់ទុំជាងអ្នកទៅគេនឹងប្រាប់ចម្លើយបែបនេះដូចគ្នា។ វានឹងមានពេលខ្លះដែលធ្វើឲ្យអ្នកស្អប់ និងមិនពេញចិត្តជាមួយដៃគូរបស់អ្នក ប៉ុន្តែមិនអាចចាកចេញពីគេបាន។ នោះហើយជាអត្ថន័យរបស់ពាក្យថា ប្ដេជ្ញា ជាការសន្យា មិនបោះបង់ចោលគ្នាក្នុងពេលលំបាកណាមួយ។ ការប្ដេជ្ញាចិត្តក៏ជាគន្លឹះរក្សាទំនាក់ទំនងឲ្យនៅបានយូរអង្វែងដែរ៕

ចុចអាន៖

ប្រភព៖ bestie ប្រែសម្រួល៖ ឃួន សុលីកា