ទម្លាក់កណ្ដុរចូលឆ្នាំស៊ុប ដើម្បីទារលុយពីហាង៧០ដុល្លារ បែរជាត្រូវជាប់គុក៣ឆ្នាំ
- 2019-05-30 03:30:00
- ចំនួនមតិ 0 | ចំនួនចែករំលែក 0
ទម្លាក់កណ្ដុរចូលឆ្នាំស៊ុប ដើម្បីទារលុយពីហាង៧០ដុល្លារ បែរជាត្រូវជាប់គុក៣ឆ្នាំ
ដើមឡើយ បុរសម្នាក់នេះគ្រាន់តែចង់ទម្លាក់កណ្ដុរចូលឆ្នាំស៊ុបដើម្បីញ៉ាំឥតគិតថ្លៃមួយពេលតែប៉ុណ្ណោះ តែដោយសារតែចិត្តលោភលន់បានធ្វើឲ្យលោកទទួលបានលទ្ធផលយ៉ាងជូរចត់។
កាលពីខែវិច្ឆិកាឆ្នាំមុន បុរសម្នាក់ឈ្មោះ Guo បានប្រកាសថាខ្លួនបានរកឃើញកណ្ដុរងាប់មួយក្បាលនៅក្នុងឆ្នាំងស៊ុបរបស់ភោជនីយដ្ឋាន Hadilao នៅទីក្រុងប៉េកាំង ប្រទេសចិន។ ក្រោយមក ហាងធំនេះបានជូនគូប៉ុងញ៉ាំឥតគិតថ្លៃឲ្យលោក។ បន្ទាប់មកទៀតគឺបានសងថ្លៃជំងឺចិត្តដល់លោក ៣៥០០ដុល្លារ។
យ៉ាងណាក៏ដោយ លោកបានបដិសេធលុយនេះ ដោយទារលុយពីហាងនេះដល់ទៅ ៥លានយាន់ (ជាង៧០ម៉ឺនដុល្លារ)។ ដោយសារតែភាគីទាំងសងខាងចរចារមិនត្រូវគ្នា បុរសខាងលើបានទាក់ទងដល់មន្ទីរគ្រប់គ្រងចំណីអាហារ រីឯខាងហាងអាហារវិញបានទាក់ទងដល់ប៉ូលិស។ ក្រោយស៊ើបអង្កេតមួយរយៈ លោក Guo ត្រូវប៉ូលិសចាប់ពីបទជំរិតលុយ។
នៅលើតុលាការកាលពីខែមីនាមុននេះ Guo បានឲ្យដឹងថា ពេលទៅលេងស្រុក លោកបានឃើញកណ្ដុរងាប់មួយ បន្ទាប់មកក៏ខ្ចប់ចូលក្រុង។ លោកបន្ថែមថា ដើមឡើយ ខ្លួនគ្រាន់តែចង់ញ៉ាំហ្វ្រីមួយពេលប៉ុណ្ណោះ តែស្រាប់តែចិត្តលោភលន់កើតឡើង។
ជាលទ្ធផល ចៅក្រមបានដាក់ទោសលោកថា បង្ខូចកេរ្តិ៍ឈ្មោះអ្នកដទៃ និងទោសជំរិតលុយ។ ដោយតម្រូវឲ្យលោកសងជំងឺចិត្ត ៥ពាន់ដុល្លារ និងជាប់គុកចំនួន៣ឆ្នាំ៕
ចុចអានបន្ត៖ ស្រលាញ់ខ្លាំងពេក នារីជប៉ុនចាក់សម្លាប់មិត្តប្រុសចោល