ក្ដីសុខនិងទុក្ខលំបាកពេលមានកូន ដែលអ្នកនៅលីវមិនអាចមានដូច
- 2019-05-09 04:21:04
- ចំនួនមតិ 0 | ចំនួនចែករំលែក 0
ក្ដីសុខនិងទុក្ខលំបាកពេលមានកូន ដែលអ្នកនៅលីវមិនអាចមានដូច
បានរៀបការជាមួយមនុស្សដែលយើងស្រលាញ់គឺជាក្ដីសុខមួយ តែអាចបង្កើតកូនជាមួយមនុស្សដែលយើងស្រលាញ់កាន់តែជាក្ដីសុខកាន់តែធំដែលមិនអាចបរិយាយបាន។ អារម្មណ៍ពេលមិនទាន់មានកូន និងក្រោយមានកូនគឺខុសគ្នាខ្លាំងណាស់ ព្រោះត្រូវជួបទាំងភាពសប្បាយ និងលំបាកស្របពេលគ្នា។
សម្រាប់អ្នកនៅលីវ ឬអ្នកទើបស្រលាញ់គ្នាមិនទាន់រៀបការ ឬអ្នករៀបការហើយមិនទាន់ចង់បានកូនប្រហែលមិនទាន់អាចទទួលអារម្មណ៍ពិសេសនេះនៅឡើយទេ។ តោះមកមើលជាមួយគ្នាថាអារម្មណ៍ពិសេសនៃការមានកូននោះយ៉ាងម៉េចខ្លះ៖
ក្ដីសុខ
-សម្រាប់មនុស្សស្រី ពេលដឹងថាអូនៗមកនៅក្នុងផ្ទៃដំបូងគឺជាអំណោយទិព្វមួយទៅហើយ។ ទោះត្រូវបាត់បង់សម្រស់ ត្រូវស្ពាយពោះដែលធំបន្តិចម្ដងៗទៅតាមគ្រប់ពេល ត្រូវពិបាកធ្វើកិច្ចការដែលធ្លាប់តែធ្វើបានភ្លាមៗពីមុន ត្រូវតស៊ូនឹងការឈឺចាប់ក្នុងពេលសម្រាល ក៏នៅតែជាក្ដីសុខក្នុងនាមជាម្ដាយគេម្នាក់ដដែល។
-ការដែលអាចស្ដាប់ឮសំឡេងកូនតូចដ៏គួរស្រលាញ់ម្នាក់ហៅថា "ម៉ាក់ៗ" ឬ "ប៉ាៗ" គឺជាអារម្មណ៍រំភើបនិងអស្ចារ្យរកថាមិនត្រូវ ហើយចង់ឱ្យគេហៅបែបនេះគ្រប់ពេល ព្រោះបានស្ដាប់សំឡេងដ៏គួរឱ្យស្រលាញ់នេះ ទោះមកពីធ្វើការហត់អស់កម្លាំងក៏មានកម្លាំងព្រឹសវិញដែរ។
-សម្រាប់អ្នកមានកូនដំបូងៗ ពេលមកធ្វើការអារម្មណ៍នៅតែនឹងកូន ឬពេលឃើញកូនគេតែងនឹកស្រមៃដល់កូនខ្លួនឯងដោយមិនដឹងខ្លួន។
-ពេលទៅផ្សារ ឬដើរទិញអីវ៉ាន់ម្ដងៗ នឹកឃើញតែរបស់កូនជាងរបស់ខ្លួនឯង ហើយលុយដែលធ្លាប់តែចាយវាយងាយៗពីមុនក៏ត្រូវគិតគូរសម្រាប់ទុកឱ្យកូនវិញដែរ។
-យប់ឡើងចង់តែគេងឱប និងថើបកូនមួយយប់ទល់ភ្លឺក៏បាន បើសិនមិនបាច់ត្រូវធ្វើការនៅថ្ងៃស្អែក។
-ទៅណាមកណាចង់តែយកកូនទៅតាម ព្រោះទម្លាប់ថ្នាក់ថ្នមកូន ដល់ពេលអត់មានកូនមកជាមួយដូចហេងហាង បាត់អ្វីម្យ៉ាង។
-ពេលទៅក្រៅ ឃើញកូនអ្នកណាក៏ចេះហៅថាកូនៗដែរ ខុសពីពីមុនដែលអៀន ហៅបានត្រឹមតែក្មួយ។
-មេរៀនទាក់ទងនឹងវិជ្ជាមេផ្ទះត្រូវស្វែងរកមករៀនស្ទើរតែទាំងអស់ ទាំងការបីបាច់កូនតូច វិធីធ្វើម្ហូប វិធីតុបតែងផ្ទះជាដើម។
ទុក្ខលំបាក
-ត្រូវក្រោកយប់ច្រើនដងដើម្បីដូរខោទឹកនោម ឆុងទឹកដោះគោ ឬឱ្យកូនមឹម។ ព្រឹកឡើងភ្នែកដូចខ្លាឃ្មុំ។
-សម្រាប់ប្ដីប្រពន្ធតែ២នាក់តទល់ ប្រហែលអាចត្រូវយកកូនទៅផ្ញើនឹងប៉ាម៉ាក់ឱ្យជួយមើល ឬមិនអ៊ីចឹងទេ ត្រូវមានម្នាក់នៅផ្ទះចាំមើលថែកូន។
-ធ្វើការអីមិនបានស្រួលចិត្តទេ មានកូនមកឱបដៃឱបជើង យំទ្រហឹងអឺងកង។ ជួនកាលរកតែពេលចូលបន្ទប់ទឹកមិនបានផង ត្រូវឮសំឡេងយំ ឬគោះទ្វារពីក្រៅ តូងៗ។
-គ្មានឡើយពាក្យថា "Holiday” ព្រោះទោះឈប់យូរថ្ងៃយ៉ាងណាក៏នៅតែរវល់មើលកូនដដែល។
-ទៅណាម្ដងៗ អីវ៉ាន់កូនច្រើនជាងអីវ៉ាន់ម៉ាក់ប៉ា មានទាំងកន្ទបផង ទឹកដោះគោផង រទេះរុញផង កង់ជិះផង ខ្នើយភួយផង ឆត្រផង មួកផង ដបទឹកវិញមិនចេះតិចទេ។
-ត្រូវប្រឹងរកលុយកើនទ្វេដង ព្រោះខ្លាចខ្វះខាតនៅថ្ងៃណាមួយ ជាពិសេសពេលកូនឈឺជា។
-ពេលគេង អូនៗវាទីអស់ហើយ ម៉ាក់និងប៉ាបានត្រឹមតែមួយប្រឡោះខ្លួនប៉ុណ្ណោះ ចំណែកក្នុងផ្ទះទាំងមូលវិញគឺថារាយប៉ាយ រៀបប៉ុន្មានដងក៏មិនចេះរៀបរយដែរ។
-ពេលកូនឈឺម្ដងៗ ម៉ាក់ប៉ាក៏មិនបានគេងដូចគ្នា។
ទោះបីមានទុក្ខលំបាកដូចដែលបានរៀបរាប់ខាងលើក៏ពិតមែន ប៉ុន្តែជឿជាក់ថាអារម្មណ៍ជាប៉ាម៉ាក់គេ គឺមើលឃើញក្ដីសុខច្រើនជាង ហើយក៏មិនដែលនឿយហត់នឹងមើលថែកូន និងអប់រំកូនឱ្យដើរផ្លូវល្អមានអនាគតរុងរឿងដែរ។
ជូនពរប្ដីប្រពន្ធដែលទើបរៀបការរួចឆាប់មានអូនៗឆាប់ៗ នឹងអាលបានស្គាល់បទពិសោធន៍ដូចបងកញ្ញាបានរៀបរាប់មួយត្រួសនេះទាំងអស់គ្នាណា!
ចុចអាន៖
អត់ស្រួលទេ! ១៧សន្លឹកចាក់ដោតអារម្មណ៍ម្ដាយដែលថែទាំកូនតូចៗរាល់ថ្ងៃ
ប៉ា ៥ ប្រភេទខុសៗគ្នាដែលកូនគ្រប់រូបគួរដឹង