រឿងអ្វីប្រញាប់ប្រញាល់បាន លើកលែងតែរឿងយកប្ដី
- 2019-03-28 04:15:00
- ចំនួនមតិ 0 | ចំនួនចែករំលែក 0
រឿងអ្វីប្រញាប់ប្រញាល់បាន លើកលែងតែរឿងយកប្ដី
មនុស្សស្រីត្រូវចាំថា ប្ដីល្អម្នាក់ នឹងនាំមកនូវជីវិតរស់នៅដ៏ល្អមួយ។ ជ្រើសរើសគូស្រករ ត្រូវការពេលវេលា និងការពិចារណាច្បាស់លាស់។ មនុស្សអាចមានកលល្បិចច្រើនដើម្បីបំភាន់ភ្នែកយើង តែពេលវេលានឹងបកស្រាយទាំងអស់។
នៅក្នុងជីវិតរបស់នារីគ្រប់រូប ជឿជាក់ថា មិនតិចក្រោមជាង១ដងឡើយ ដែលអ្នកបានធ្វើការសម្រេចចិត្តដោយតក់ក្រហល់។ ហើយក៏មិនតិចដងដែរ ដែលការសម្រេចចិត្តនោះ នាំអ្នកទៅផ្លូវខុស។ មានកំហុសខ្លះកែប្រែបាន ធ្វើឡើងវិញ តែក៏មានកំហុសខ្លះទៀតអាចនឹងធ្វើឲ្យសោកស្ដាយអស់មួយជីវិត។ ពិតប្រាកដណាស់ អ្វីក៏អាចប្រញាប់ប្រញាល់បានដែរ លើកលែងរឿងមួយ គឺការយកប្ដី។
មនុស្សស្រីឆ្លងកាត់យុវភាពជាមួយមនុស្សដែលខ្លួនស្រលាញ់ និងមានជីវិតមង្គលការមានសុភមង្គល គឺគួរឲ្យសរសើរ តែជីវិតពិតមិនដូចរឿងភាគឡើយ។ មនុស្សស្រីជាច្រើនត្រូវបៀមថ្ម លេបក្រួសក្នុងមង្គលការរបស់ខ្លួនផ្ទាល់ក៏មាន។ ហើយមាននារីជាច្រើនទៀត នៅពេលដែលក្លាយជាម្ដាយគេហើយ ក៏នៅតែស្រមៃថាខ្លួនអាចវិលត្រលប់ទៅភាពនៅលីវវិញ ព្រោះឆ្អែតនឹងជីវិតគូដែលមានតែទឹកភ្នែកពេក។
ទុក្ខសោកធំបំផុតរបស់ស្ត្រីម្នាក់នោះគឺ យកប្ដីខុស។ អ្វីទាំងអស់នៅលើលោកសុទ្ធតែអាចធ្វើជាថ្មីបាន តែបើយកប្ដីខុសហើយ ទោះបីជាក្រោយលែងគ្នា ក៏យើងមានឈ្មោះថាមេម៉ាយដែរ។ ទោះមិនមែនជាកំហុសយើង ក៏អាចត្រូវគេថា ប្រហែលជាយើងយ៉ាងម៉េចហើយ ទើបត្រូវគេលែងបែបនេះ។ នៅពេលដែលមានឈ្មោះដូចនេះហើយ បើថាត្រូវគេថាឲ្យតែម្នាក់មិនថាទេ ខ្លាចតែមួយគ្រួសារត្រូវអ្នកផងដៀលទាំងអស់ ដោយសារតែយើង។ ដូចនេះ ត្រូវចងចាំឲ្យច្បាស់ថា លុយប្រញាប់រកបាន ផ្ទះប្រញាប់សង់បាន តែយកប្ដីត្រូវគិតឲ្យច្បាស់សឹមយក កុំឲ្យដើរខុសមួយជំហាន ផុងខ្លួនមួយជីវិតឲ្យសោះ៕
ចុចអានបន្ត៖