«ទទួលស្គាល់ការពិត» ជាវិធីដែលអាចជួយឲ្យអ្នកកាត់ចិត្តពីគេបានល្អបំផុត
- 2019-03-14 07:00:00
- ចំនួនមតិ 0 | ចំនួនចែករំលែក 0
«ទទួលស្គាល់ការពិត» ជាវិធីដែលអាចជួយឲ្យអ្នកកាត់ចិត្តពីគេបានល្អបំផុត
បែកគ្នាទាំងមានម្ខាងទៀតនៅស្រឡាញ់ អ្នកដែលឈឺចាប់ខ្លាំងនោះគឺអ្នកដែលសល់ចិត្តហ្នឹងហើយ ព្រោះអ្នកដែលអស់ចិត្តគេគ្មានអីត្រូវពិបាកចិត្តទេ។
ធ្លាប់គ្រប់គ្រងខ្លួនឯងលែងបានអត់? មានន័យថាឃាត់ចិត្តលែងបាន គឺសុខចិត្តមុខក្រាស់ទៅសុំទោសគេ ទៅអង្វរគេឲ្យត្រូវគ្នាវិញ។ យំផង អង្វរផង សុំទោសគេផង ប៉ុន្តែសួរថាចុងក្រោយបានការអីទេ? ប្រាកដជាអត់ហើយ គឺបានត្រឹមគេស្ដីឲ្យ គេថាឲ្យ គេបដិសេធន៍គ្រប់យ៉ាង។ មានអារម្មណ៍ថាខ្លួនឯងអន់ ឬក៏ថោកទាបខ្លះអត់? ប្រហែលជាមានដែរ តែដោយសារក្ដីស្រឡាញ់វាជ្រាលជ្រៅពេក ទើបអ្នកលែងខ្វល់ថាខ្លួនឯងធ្លាក់ដល់កម្រិតណា។
រឿងបែបនេះមានតែអ្នកដែលធ្លាប់ជួបទេ ទើបដឹងថាវាមានរសជាតិបែបណា? បើអ្នកមិនធ្លាប់ជួបនឹងគិតថាហេតុអីចាំបាច់បន្ទាបខ្លួនដើម្បីមនុស្សម្នាក់បែបនេះ? ការពិតទៅអារម្មណ៍ដែលស្រឡាញ់អ្នកណាម្នាក់ពិតប្រាកដគឺជ្រាលជ្រៅណាស់ ដូច្នេះទើបមានមនុស្សពលីខ្លួនឯងខ្លាំងដើម្បីស្នេហា។ អារម្មណ៍ដែលមិនអស់ចិត្ត អារម្មណ៍ដែលគិតថាម្នាក់នោះនៅតែស្រឡាញ់យើង អារម្មណ៍ដែលមិនទាន់ទទួលយកការបែកបាក់នេះបាន ទាំងនេះជាអ្វីដែលជំរុញឲ្យមនុស្សម្នាក់ទៀតលះបង់គ្រប់យ៉ាងដើម្បីតែមនុស្សម្នាក់ទៀត។
នៅពេលមួយដែលអ្នកអាចប្រាប់ខ្លួនឯងឲ្យទទួលយកការពិតនៃការបែកបាក់មួយនេះ ប្រហែលអ្នកនឹងធូរស្បើយជាងនេះ។ ទទួលស្គាល់ថាគេលែងជារបស់យើងហើយ ទទួលស្គាល់ថាគេលែងស្រឡាញ់យើង ទទួលស្គាល់ថាគេចង់រស់នៅម្ខាងទៀតនៃជីវិតយើង ទទួលស្គាល់ថាយើងត្រូវតែបាត់បង់គេ។ អ្នកត្រូវរៀនទទួលស្គាល់បែបនេះ អ្នកត្រូវប្រាប់ខ្លួនឯងថាអ្នកត្រូវរៀនរស់ក្នុងជីវិតមួយថ្មីដែលគ្មានគេ អ្នកត្រូវប្រាប់ខ្លួនឯងថា អ្នកអាចរស់បាន។
គ្រប់យ៉ាងសុទ្ធតែមានទីបញ្ចប់ ដូច្នេះស្នេហាអ្នកក៏ដល់ទីបញ្ចប់ហើយដែរ អ្នកមិនអាចប្រកែកមិនទទួលបានឡើយ។ ត្រៀមខ្លួនដើរលើអ្វីថ្មី អ្វីដែលបន្តទៅមុខ៕
ចុចអាន៖នៅពេលអស់ចិត្ត គេនឹងមានមួយលានហេតុផលដែលត្រូវដើរចេញ